World Kidney Day 2024: વધુ પડતી દવાઓ લેવાથી કિડનીને થાય છે નુકસાન, આ ચીજો પણ છે ખતરનાક

World Kidney Day:કિડની આપણા શરીરનો તે ભાગ છે, જેમાં સહેજ પણ નુકસાન આપણા સ્વાસ્થ્યને ખરાબ રીતે અસર કરી શકે છે

પ્રતિકાત્મક તસવીર

World Kidney Day: કિડની આપણા શરીરનો તે ભાગ છે, જેમાં સહેજ પણ નુકસાન આપણા સ્વાસ્થ્યને ખરાબ રીતે અસર કરી શકે છે. હૃદયની જેમ કિડની પણ 24 કલાક કામ કરે છે. ફિલ્ટરની જેમ કિડની આપણા શરીરમાં લોહીને સાફ કરવા અને ગંદકી દૂર કરવાનું કામ કરે છે. જો તેમાં કોઈપણ પ્રકારની ખામી સર્જાય તો આ કાર્ય પ્રભાવિત થાય છે. જ્યારે ગંદકી શરીરમાંથી બહાર નીકળી શકતી નથી ત્યારે ઘણી બીમારીઓનું જોખમ વધી જાય છે.

કીડનીને સ્વસ્થ રાખવાનું કેટલું જરૂરી છે તે અંગે લોકોને માહિતગાર કરવા અને જાગૃત કરવાના ઉદ્દેશ્ય સાથે દર વર્ષે વિશ્વ કિડની દિવસની ઉજવણી કરવામાં આવે છે. વિશ્વ કિડની દિવસ દર વર્ષે માર્ચના બીજા ગુરુવારે ઉજવવામાં આવે છે, જે આ વખતે 14 માર્ચે ઉજવવામાં આવી રહ્યો છે. ખરાબ જીવનશૈલી, બિનઆરોગ્યપ્રદ ખાવાની આદતો કિડનીના સ્વાસ્થ્ય માટે સારી નથી, પરંતુ કેટલીક અન્ય વસ્તુઓ પણ કિડનીને નુકસાન પહોંચાડે છે, જાણો તેના વિશે.

ડાયાબિટીસ

મોટા ભાગના કિડનીના રોગો ડાયાબિટીસને કારણે થાય છે. ડાયાબિટીસના દર્દીઓના લોહીમાં શુગર લેવલ વધી જાય છે જે કિડનીના સ્વાસ્થ્ય માટે સારું નથી.

હાઈ બ્લડ પ્રેશર

કિડની સંબંધિત રોગોનું બીજું મુખ્ય કારણ હાઈ બ્લડ પ્રેશર છે. હાઈ બ્લડ પ્રેશરને કારણે કિડનીની નળીઓને નુકસાન થાય છે, જેના કારણે તેમની કામ કરવાની ક્ષમતા ઓછી થવા લાગે છે.

વધુ પડતી દવા લેવી

કોઈપણ કારણ વગર દવાઓનું વધુ પડતું સેવન કરવાથી પણ કિડની પર હાનિકારક અસર થઈ શકે છે. આમાં એસ્પિરિન, ઇબુપ્રોફેન, નેપ્રોક્સેન અને અન્ય દવાઓનો સમાવેશ થાય છે. જ્યારે તમે આ દવાઓ ડૉક્ટરની સલાહ લીધા વિના મોટી માત્રામાં લો છો અથવા નિયમિતપણે લો છો તો તેની તમારી કિડની પર ખરાબ અસર થઈ શકે છે. આ દવાઓ કિડનીમાં રક્ત પરિભ્રમણ ઘટાડી શકે છે અને પેશાબના ઉત્પાદનને અવરોધે છે, જે કિડનીના સ્વાસ્થ્યને અસર કરે છે.

દારૂ પીવો

વધુ પડતો દારૂ પીવાથી લીવરની સાથે કિડની પર પણ અસર થાય છે. આલ્કોહોલ, બીયર અથવા ડ્રગ્સનું સેવન કરવાથી યુરીનની ફિક્વન્સી અને માત્રામાં વધારો થાય છે. જેના કારણે કિડનીને તેની ક્ષમતા કરતા અનેકગણું કામ કરવું પડે છે. જેના કારણે કિડની ખરાબ થવા લાગે છે. એવું નથી કે આલ્કોહોલનું ઓછું સેવન કરવાથી કિડની સ્વસ્થ રહે છે, જો તમે તેને લાંબા સમય સુધી સ્વસ્થ રાખવા માંગતા હોવ તો દારૂ પીવાનું સંપૂર્ણપણે ટાળો.

કિડની સ્ટોન

કિડનીમાં પથરીનું વારંવાર થવું એ કિડનીના ખરાબ સ્વાસ્થ્યની નિશાની છે. કિડનીની પથરી સૂચવે છે કે તમને તમારી કિડની સાથે કાયમી અથવા અસ્થાયી સમસ્યા હોઈ શકે છે. આ એ સંકેત હોઈ શકે છે કે તમારા શરીરમાં કેલ્શિયમ, ઓક્સાલેટ અથવા અન્ય પદાર્થોનો સ્ત્રોત વધુ હોઇ શકે છે જેનાથી પથરી બને છે.