Ahmedabad News: અમદાવાદમાં બાળક પર શ્વાનનો હુમલો, શહેરમાં ફરી એક વખત રખડતા ઢોરનો જમાવડો
હાઈકોર્ટની અંતિમ ફટકાર છતાં અમદાવાદ કોર્પોરેશન સુધરવા તૈયાર નથી. કેમ કે તહેવારમાં કામગીરી ઢીલી પડતા ફરી એક વખત રસ્તે પશુઓ જોવા મળ્યા છે.
Dog Attack On Child: અમદાવાદ શહેરમાં શ્વાનના ખસીકરણના દાવાના ફરી એક વખત ધજાગરા ઉડ્યા છે. જુહાપુરા વિસ્તારમાં 14 માસ બાળક ઘરના દરવાજા પાસે રમતું હતુ. આ દરમિયાન રખડતા શ્વાને હુમલો કર્યો હતો. ઘટનાની જાણ થતા જ આસપાસના સ્થાનિકો દોડી આવ્યા અને બાળકને શ્વાનના મુખમાંથી બચાવ્યુ હતું. શ્વાનના હુમલામાં બાળકને ગંભીર ઈજા પહોંચતા તાત્કાલિક હોસ્પિટલ ખસેડવામાં આવ્યુ છે. બાળક પર હુમલાની આ પ્રથમ ઘટના નથી. પાંચ મહિના પહેલા જુહાપુરામાં સોનલ સિનેમા પાસે કન્સ્ટ્રક્શન સાઇટ પર કામ કરતા શ્રમિકના બાળક પર શ્વાને હુમલો કર્યો હતો.
અમદાવાદમાં રખડતા ઢોરનો જમાવડો
હાઈકોર્ટની અંતિમ ફટકાર છતાં અમદાવાદ કોર્પોરેશન સુધરવા તૈયાર નથી. કેમ કે તહેવારમાં કામગીરી ઢીલી પડતા ફરી એક વખત રસ્તે પશુઓ જોવા મળ્યા છે. રખડતા ઢોર અને રખડતા શ્વાનને ડામવા ચાર એજન્સીઓને કોર્પોરેશને કામગીરી સોંપી છે. પરંતુ આ કામગીરી માત્ર કાગળ પર જ હોય એમ લાગે છે. એબીપી અસ્મિતાએ શહેરના જોધપુર, સેટેલાઇટ, પ્રહલાદનગર, આનંદનગર વિસ્તારમાં રિયાલિટી ચેક કર્યું. તો અનેક સ્થળો પર રખડતા શ્વાન નજરે પડ્યા. આટલું જ નહીં રાહદારીઓને કનડગત થાય તે રીતે નજરે પડ્યા હતા. આમ, કોર્પોરેશન ભલે દાવા કરે પરંતુ જમીની વાસ્તવિક્તા અલગ જ છે.
ચાલુ વર્ષે ગત વર્ષની સરખામણીએ AMC એ કેટલા શ્વાન પકડ્યા છે તેના ઉપર નજર કરીએ તો
મહિનો 2022 2023
જૂન 5152 6002
જુલાઈ 4108 6054
ઓગષ્ટ 4084 5449
સપ્ટેમ્બર 3964 5271
ઓક્ટોબર 4468 5180
નવેમ્બર 5186 3819
ડિસેમ્બર 5996 ------
સુરતમાં શ્વાનનો આતંક
થોડા સમય પહેલા જ સુરત શહેરમાં ઠેર ઠેર હડકાયાં કુતરાનો આતંક સામે આવ્યો હતો. સુરતના બારડોલીમાં 12થી વધુ લોકોને હડકાયાં કુતરાએ બચકાં ભરી લેતા તમામ લોકો હૉસ્પીટલ લઈ જવામાં આવ્યા હતા. સુરતના બારડોલીનગરમાં હડકાયાં કુતરાઓએ આતંક મચાવી દીધો હતો. અહીં 12 થી વધુ લોકોને હડકાયાં કુતરાંએ બચકાં ભરી લેતા તમામ લોકોની હાલત ગંભીર થઇ. બારડોલીનગરના ધૂળિયા ચોકડી સહિત અલગ-અલગ વિસ્તાર આ હડકાયાં કુતરા દ્વારા બચકાં ભરવાના બનાવો બન્યા હતા. આ પછી 6 જેટલા લોકોને સરદાર હૉસ્પિટલમાં તેમજ અન્ય લોકોને અલગ-અલગ હૉસ્પિટલોમાં સારવાર અપાઈ. પાલિકા દ્વારા હડકાયાં કુતરાને પકડવાની કામગીરી શરૂ કરવામાં આવી હતી.
ટોપ સ્ટોરી
ટ્રેન્ડિંગ સમાચાર
