Ahmedabad Rain: અમદાવાદ શહેરમાં ધોધમાર વરસાદ

હવામાન વિભાગની આગાહી વચ્ચે અમદાવાદ શહરેમાં આજે વહેલી સવારથી જ ધોધમાર વરસાદ વરસી રહ્યો છે. શહેરના એસજી હાઈવે, પ્રહલાદનગર, બોપલ,શેલા, સરખેજ, ઘુમા, શીલજ સહિતના વિસ્તારોમાં ધોધમાર વરસાદ વરસી રહ્યો છે.

પ્રતિકાત્મક તસવીર

Source : તસવીર- ABP અસ્મિતા

અમદાવાદ: હવામાન વિભાગની આગાહી વચ્ચે અમદાવાદ શહરેમાં આજે વહેલી સવારથી જ ધોધમાર વરસાદ વરસી રહ્યો છે. શહેરના એસજી હાઈવે, પ્રહલાદનગર, બોપલ,શેલા, સરખેજ, ઘુમા, શીલજ સહિતના વિસ્તારોમાં ધોધમાર વરસાદ વરસી રહ્યો છે. વહેલી સવારથી જ શહેરમાં વરસાદી માહોલ જામ્યો છે. અનેક વિસ્તારોમાં પાણી ભરાવાની પણ શરુઆત થઈ ગઈ છે. લોકોને ઓફિસ જવાના સમયે વરસાદ તૂટી પડતા લોકો મુશ્કેલીમાં મુકાયા હતા. 

નારોલ, બાપુનગર, રાણીપ સહિતના વિસ્તારોમાં પણ વરસાદ વરસી રહ્યો છે. ખૂબ જ લાંબા વિરામ બાદ અમદાવાદ શહેરમાં વરસાદનું આગમન થયું છે.  મણીનગર, નરોડા, ખોખરામાં પણ વરસાદ વરસી રહ્યો છે.  એસજી હાઈવે પણ પાણી ભરાવાની શરુઆત થઈ ગઈ છે. સર્વિસ રોડ પણ પાણી ભરાઈ ગયા છે. 

વહેલી સવારથી જ વરસી રહેલા વરસાદ સાથે નાગરિકોને હાલાકીનો સામનો કરવો પડી રહ્યો છે. અલગ-અલગ રોડ પર પાણી ભરાવાની શરુઆત થઈ છે.  અમદાવાદ શહેરમાં ભારે વરસાદનું યલો એલર્ટ આપવામાં આવ્યું છે.  

રાજ્યમાં ભારે વરસાદની આગાહી

મધ્યપ્રદેશ તરફ સર્જાયેલી વરસાદી સિસ્ટમ  ધીરે ધીરે રાજ્ય પર આવતા ફરી મોટાભાગના વિસ્તારમાં વરસાદી માહોલ જામ્યો છે.  હવામાન વિભાગે (Meteorological Department) આગામી 2 દિવસ સાર્વત્રિક મધ્યમથી હળવા વરસાદનું અનુમાન વ્યક્ત કર્યું છે. આજે રાજ્યના 12 જિલ્લામાં ભારેથી અતિભારે વરસાદની (heavy rain) હવામાન વિભાગે   (Meteorological Department) આગાહી કરી છે.  

સૌરાષ્ટ્રના 6  મધ્ય અને દક્ષિણ ગુજરાતના 6 જિલ્લામાં ભારેથી અતિભારે વરસાદનું ઓરેન્જ એલર્ટ જાહેર આપવામાં આવ્યું છે.   16 જિલ્લામાં ભારે વરસાદનું યલો એલર્ટ જાહેર કરવામાં આવ્યું છે.

સૌરાષ્ટ્રની વાત કરીએ તો હવામાન વિભાગની  આગાહી મુજબ  મોરબી, સુરેન્દ્રનગર, રાજકોટ, બોટાદ, અમરેલી અને ભાવનગરમાં આજે  ભારેથી અતિભારે વરસાદની આગાહી છે.   દ્વારકા, જામનગર, પોરબંદર, જૂનાગઢ અને ગીર સોમનાથમાં પણ આજે ભારે વરસાદનું અનુમાન છે.

હવામાન વિભાગની આગાહી મુજબ મધ્યગુજરાતના આણંદ, વડોદરા, છોટા ઉદેપુરમાં આજે ભારેથી અતિભારે વરસાદ વરસી શકે છે.   ખેડા, પંચમહાલ, દાહોદમાં ભારે વરસાદની આગાહીને પગલે હવામાન વિભાગે યલો એલર્ટ જાહેર કર્યુ છે.  દક્ષિણ ગુજરાતના સુરત, ભરૂચ અને નર્મદાના છુટાછવાયા સ્થળોએ આજે ભારેથી અતિભારે વરસાદની આગાહી કરવામાં આવી છે.   તાપી, ડાંગ,નવસારી, અને વલસાડમાં પણ ભારે વરસાદની આગાહીને પગલે યલો એલર્ટ જાહેર  કરવામાં આવ્યું છે.