LIC IPO એક કલાકમાં 12% સબસ્ક્રાઇબ થયો, 2 કરોડથી વધુ શેર માટે બિડ આવી

સેબીના નિયમો મુજબ, કોઈપણ કંપનીના ઇક્વિટી શેર માત્ર ડીમેટ સ્વરૂપે જ જારી કરવામાં આવે છે. આથી કોઈ પણ વ્યક્તિ, તે પોલિસી ધારકો હોય કે છૂટક રોકાણકારો હોય, તેની પાસે ડીમેટ ખાતું હોવું જરૂરી છે.

પ્રતિકાત્મક તસવીર

Source : Getty

LICનો IPO આજથી એટલે કે 4 મેથી ખુલ્યો છે. LIC IPO માટે રોકાણકારોમાં જબરદસ્ત પ્રતિસાદ છે. દેશનો અત્યાર સુધીનો સૌથી મોટો IPO સવારે 10 વાગ્યે સબ્સ્ક્રિપ્શન માટે ખુલ્યો અને 1 કલાકની અંદર તે 12% સબસ્ક્રાઇબ થઈ ગયો. જેમાં 16,20,78,067 શેર વેચાણ માટે મુકવામાં આવ્યા છે અને અત્યાર સુધીમાં 2 કરોડથી વધુ શેર માટે બિડ મળી ચુકી છે. કર્મચારીઓ માટે અનામત શેરના 27%, પોલિસીધારકોના 24% અને છૂટક રોકાણકારોના 18% સબસ્ક્રાઇબ થયા છે. આમાં 9 મે સુધી પૈસા રોકાણ કરવાની તક મળશે.

કંપનીના શેર IPO બંધ થયાના એક સપ્તાહ પછી 17 મેના રોજ સ્ટોક એક્સચેન્જમાં લિસ્ટ થશે. કેન્દ્ર સરકારને LICના IPOમાંથી રૂ. 21,000 કરોડ એકત્ર કરવાની અપેક્ષા છે. IPO હેઠળ, સરકાર કંપનીમાં તેના 22.13 કરોડ શેરનું વેચાણ કરી રહી છે અને તેની કિંમત પ્રતિ શેર રૂ. 902 થી 949 નક્કી કરવામાં આવી છે.

IPOમાં રોકાણ કરવા માટે ડીમેટ ખાતું હોવું જરૂરી છે

સેબીના નિયમો મુજબ, કોઈપણ કંપનીના ઇક્વિટી શેર માત્ર ડીમેટ સ્વરૂપે જ જારી કરવામાં આવે છે. આથી કોઈ પણ વ્યક્તિ, તે પોલિસી ધારકો હોય કે છૂટક રોકાણકારો હોય, તેની પાસે ડીમેટ ખાતું હોવું જરૂરી છે.

પોલિસીધારક રોકાણકારોને શેર દીઠ રૂ. 60ની છૂટ

છૂટક રોકાણકારો અને પાત્ર કર્મચારીઓને શેર દીઠ રૂ. 45 અને પોલિસીધારકોને પ્રતિ શેર રૂ. 60નું ડિસ્કાઉન્ટ આપવામાં આવશે. એલઆઈસીએ તેના પોલિસીધારકોને તેમના મોબાઈલ ફોન પર મોકલેલા સંદેશમાં આઈપીઓ સંબંધિત માહિતી આપી છે. LIC ઘણા મહિનાઓથી પ્રિન્ટ અને ટીવી ચેનલો દ્વારા આ IPO વિશે માહિતી પ્રસારિત કરી રહી છે.

LICએ જણાવ્યું હતું કે IPOને સોમવારે એન્કર રોકાણકારો પાસેથી રૂ. 5,620 કરોડનું સંપૂર્ણ સબસ્ક્રિપ્શન મળ્યું હતું. LIC એ એન્કર રોકાણકારો પાસેથી રૂ. 5,627 કરોડ એકત્ર કર્યા છે જેમાં મોટાભાગની સ્થાનિક કંપનીઓ છે. 5.92 કરોડ શેર એન્કર રોકાણકારો માટે રૂ. 949 પ્રતિ ઇક્વિટી શેરના દરે આરક્ષિત હતા.