મિડલ ઈસ્ટના યુદ્ધ વચ્ચે મોદી સરકારનો મોટો નિર્ણય: LPG ને લઈ નાણામંત્રી નિર્મલા સીતારમણે સંસદમાં આપી માહિતી

નાણામંત્રી નિર્મલા સીતારમણે સંસદમાં આપી ખાતરી; વિદેશથી આવતા ગેસ પર નિર્ભરતા ઘટાડવા અને ઘરોમાં સપ્લાય જાળવી રાખવા તેલ રિફાઇનરીઓને અપાયો આદેશ.

LPG production India

Source : PTI

Show Quick Read

Key points generated by AI, verified by newsroom

ખાડી દેશો (મિડલ ઈસ્ટ) માં અત્યારે જે રીતે યુદ્ધનો માહોલ છે, તેને જોતા ભારતમાં રસોઈ ગેસ (LPG) ની અછત સર્જાવાની અટકળો ચાલી રહી હતી. પરંતુ, ગૃહિણીઓ માટે રાહતના સમાચાર છે. મંગળવારે (17 માર્ચ, 2026) નાણામંત્રી નિર્મલા સીતારમણે સંસદમાં સ્પષ્ટ કર્યું છે કે દેશમાં કોઈપણ ઘરનો ચૂલો ગેસ વગર બંધ નહીં રહે. સરકારે રસોઈ ગેસનો અવિરત પુરવઠો જાળવી રાખવા માટે દેશની અંદર જ LPG નું ઉત્પાદન 25 ટકા જેટલું વધારવાનો ઐતિહાસિક નિર્ણય લીધો છે. વિદેશથી આવતા ગેસની સપ્લાય ચેન ખોરવાઈ હોવા છતાં, ભારત પોતાની જરૂરિયાત પહોંચી વળવા માટે હવે અન્ય હાઇડ્રોકાર્બનમાંથી પણ સીધો LPG બનાવીને લોકોના ઘરો સુધી પહોંચાડશે.

મિડલ ઈસ્ટની કટોકટી અને ભારતનું ટેન્શન

રાજ્યસભામાં વિનિયોગ બિલ પર ચર્ચાનો જવાબ આપતા નાણામંત્રીએ સ્વીકાર્યું કે મિડલ ઈસ્ટની કટોકટીએ ભારત માટે એક નવો પડકાર ઊભો કર્યો છે. હકીકતમાં, ભારત પોતાની ગેસની કુલ જરૂરિયાતનો લગભગ 65 ટકા હિસ્સો વિદેશથી આયાત કરે છે. સૌથી મોટી ચિંતાની વાત એ છે કે આ આયાત થતા ગેસમાંથી પણ 90 ટકા ગેસ 'હોર્મુઝ સ્ટ્રેટ' (જે અત્યારે યુદ્ધગ્રસ્ત વિસ્તાર છે) ના રસ્તેથી જ ભારતમાં આવે છે. આ કારણે જ બજારમાં એવી અટકળો હતી કે ગેસ આવશે કે નહીં? પરંતુ નાણામંત્રીએ ખાતરી આપી છે કે કટોકટી વચ્ચે પણ ગેસનો સપ્લાય કોઈ પણ ભોગે જાળવી રખાશે.

25% ઉત્પાદન વધશે, દેશ બનશે આત્મનિર્ભર

દેશને આ સંકટમાંથી ઉગારવા અને વડાપ્રધાન નરેન્દ્ર મોદીના 'આત્મનિર્ભર ભારત' ના વિઝનને આગળ વધારવા સરકારે આગોતરું આયોજન કરી લીધું હતું. ગઈ 8 માર્ચ, 2026 ના રોજ જ કેન્દ્ર સરકારે દેશની તમામ તેલ રિફાઇનરીઓ અને પેટ્રોકેમિકલ કંપનીઓને LPG નું ઉત્પાદન વધારવાનો આદેશ આપી દીધો હતો.

નિર્મલા સીતારમણે ગૃહમાં જણાવ્યું કે, "અમે સ્થાનિક સ્તરે ઉત્પાદન ક્ષમતા વધારી રહ્યા છીએ. આપણા જ દેશમાં LPG નું ઉત્પાદન લગભગ 25 ટકા જેટલું વધારવામાં આવી રહ્યું છે, અને આ વધારાનો પૂરેપૂરો ગેસ સીધો સ્થાનિક ગ્રાહકોને જ આપવામાં આવશે."

કેવી રીતે પૂરી થશે આ જરૂરિયાત?

ઘરોમાં ગૃહિણીઓને રસોઈ બનાવવામાં કોઈ જ અગવડ ન પડે તે માટે સરકાર એકદમ એલર્ટ છે. સરકારે જહાજો મારફતે આવતા ગેસના સતત પ્રવાહ પર તો ધ્યાન કેન્દ્રિત કર્યું જ છે, પરંતુ સાથે જ એક નવો કીમિયો પણ અપનાવ્યો છે. સરકારે દેશની અંદર જ અન્ય હાઇડ્રોકાર્બનમાંથી LPG બનાવવા તરફ દિશા બદલી છે. આનાથી આપણી સ્થાનિક ઉત્પાદન ક્ષમતાનો વિસ્તાર થયો છે. પરિણામે, સ્થાનિક પુરવઠો પૂરતો જળવાઈ રહેશે અને ગેસ સપ્લાયમાં કોઈ જ અછત જોવા મળશે નહીં.

આ પણ વાંચો

4 સભ્યોના પરિવારને ધ્યાનમાં રાખી નક્કી થશે પેન્શન? 8મા પગાર પંચ સમક્ષ પેન્શનરોએ મૂકી આ શરત