હવે સરકારી બૉન્ડમાં સરળતાથી કરી શકશો રોકાણ, RBI લાવશે મોબાઇલ એપ, મળશે આ ફાયદા

આ સેગમેન્ટમાં રિટેલ રોકાણ વધારવા માટે એક મોબાઈલ એપ વિકસાવી રહી છે, જે સામાન્ય લોકો માટે સરકારી બોન્ડમાં રોકાણ કરવાનું સરળ બનાવશે

જુઓ અત્યાર સુધીના મહત્વના સમાચાર

અત્યાર સુધી સામાન્ય લોકો માટે સરકારી સિક્યોરિટીઝ (બોન્ડ) વગેરેમાં રોકાણ કરવું મુશ્કેલ છે. દેશભરની મોટી નાણાકીય સંસ્થાઓ સરકારી બોન્ડમાં રોકાણ કરે છે. આ સંસ્થાઓને આમાંથી નિશ્ચિત વળતર પણ મળે છે. હવે રિઝર્વ બેન્ક ઓફ ઈન્ડિયા (RBI) આ સેગમેન્ટમાં રિટેલ રોકાણ વધારવા માટે એક મોબાઈલ એપ વિકસાવી રહી છે, જે સામાન્ય લોકો માટે સરકારી બોન્ડમાં રોકાણ કરવાનું સરળ બનાવશે. રિઝર્વ બેન્ક ઓફ ઈન્ડિયા (RBI) ટૂંક સમયમાં સરકારી સિક્યોરિટીઝ માર્કેટમાં રિટેલ રોકાણકારોની ભાગીદારીને સરળ બનાવવા માટે એક મોબાઈલ એપ લોન્ચ કરશે. આરબીઆઈ ગવર્નર શક્તિકાંત દાસે શુક્રવારે ચાલુ નાણાકીય વર્ષની પ્રથમ નાણાકીય નીતિ સમીક્ષા રજૂ કરતી વખતે આ પ્રસ્તાવ મુક્યો હતો.

RBIની રિટેલ 'ડાયરેક્ટ સ્કીમ', નવેમ્બર, 2021માં રજૂ કરવામાં આવી હતી, જે વ્યક્તિગત રોકાણકારોને સેન્ટ્રલ બેન્કમાં ગિલ્ટ એકાઉન્ટ્સ જાળવવા અને સરકારી સિક્યોરિટીઝમાં રોકાણ કરવાની સુવિધા આપે છે. આ યોજના રોકાણકારોને પ્રાથમિક હરાજીમાં સિક્યોરિટીઝ ખરીદવા તેમજ NDS-OM પ્લેટફોર્મ મારફતે સિક્યોરિટીઝ ખરીદવા/વેચવા માટે સક્ષમ બનાવે છે.

કેન્દ્રીય બેન્કે કહ્યું હતું કે આ એક્સેસને વધુ સરળ અને સુગમ બનાવવા માટે રિટેલ 'ડાયરેક્ટ પોર્ટલ'ની એક મોબાઈલ એપ બનાવવામાં આવી રહી છે. આ એપ રોકાણકારોને તેમની સુવિધા અનુસાર સાધનો ખરીદવા અને વેચવા માટે સક્ષમ બનાવશે. એપ્લિકેશન ટૂંક સમયમાં ઉપયોગ માટે ઉપલબ્ધ થશે.

ભારતીય રિઝર્વ બેન્ક (RBI) એ શુક્રવારે પોલિસી રેપો રેટમાં કોઈ ફેરફાર કર્યો નથી અને ચાલુ નાણાકીય વર્ષની પ્રથમ દ્વિ-માસિક નાણાકીય નીતિ સમીક્ષામાં તેને 6.5 ટકા પર યથાવત રાખ્યો છે. વૈશ્વિક અનિશ્ચિતતા વચ્ચે ફુગાવાને ચાર ટકા સુધી નીચે લાવવા અને આર્થિક વૃદ્ધિને વેગ આપવાના ઉદ્દેશ્ય સાથે પોલિસી રેટ યથાવત રાખવામાં આવ્યો છે. આ સતત સાતમી વખત છે જ્યારે રેપો રેટમાં કોઈ ફેરફાર કરવામાં આવ્યો નથી.

ભારતીય રિઝર્વ બેંક (RBI)એ નાણાકીય વર્ષ 2025ની પ્રથમ નાણાકીય નીતિ બેઠકમાં UPIને લઈને મોટી જાહેરાત કરી છે. જો તમે UPI નો ઉપયોગ કરો છો તો તમારા માટે એક મોટી સુવિધા આવવાની છે. આ સુવિધા હેઠળ, ખૂબ જ ટૂંક સમયમાં તમે UPI નો ઉપયોગ કરીને તમારા બેંક ખાતામાં રોકડ જમા કરાવી શકશો. રિઝર્વ બેંક ઓફ ઈન્ડિયા (RBI)ના ગવર્નર શક્તિકાંત દાસે કહ્યું કે ટૂંક સમયમાં મશીનનો ઉપયોગ UPI દ્વારા રોકડ જમા કરવા માટે થઈ શકશે.

શક્તિકાંત દાસે જણાવ્યું હતું કે આ સેવા લોકોને મોટી સુવિધા પૂરી પાડશે. તમારે રોકડ જમા કરાવવા માટે બેંકમાં જવું પડશે નહીં. ઉપરાંત, જો બેંક તમારાથી દૂર છે, તો તમે UPI દ્વારા રોકડ જમા કરી શકશો. આ ઉપરાંત, PPI (પ્રીપેડ પેમેન્ટ ઇન્સ્ટ્રુમેન્ટ્સ) કાર્ડધારકોને ચુકવણીની સુવિધા પણ પૂરી પાડવામાં આવશે. આ લોકોને થર્ડ પાર્ટી યુપીઆઈ એપ્સ દ્વારા યુપીઆઈ પેમેન્ટ કરવાની સુવિધા આપવાનો પણ પ્રસ્તાવ મૂકવામાં આવ્યો છે.