Stock Market Today 20 October, 2022: સતત ચાર દિવસની તેજીને બ્રેક, સેન્સેક્સ 300 પોઈન્ટ ડાઉન, નિફ્ટી 17,500 ની નીચે

અમેરિકાની જેમ જ યુરોપના શેરબજારોમાં પણ છેલ્લા ટ્રેડિંગ સેશન દરમિયાન મોટો ઘટાડો જોવા મળ્યો હતો અને તમામ મુખ્ય શેરબજારો લાલ નિશાન પર બંધ થયા હતા.

પ્રતિકાત્મક તસવીર

Stock Market Today: સતત ચાર સેશનમાં તેજી કર્યા બાદ ભારતીય શેરબજાર આજે ભારે દબાણમાં જોવા મળી રહ્યું છે. વૈશ્વિક બજારમાં ચાલી રહેલા વેચાણની અસર સ્થાનિક રોકાણકારોના સેન્ટિમેન્ટ પર પણ જોવા મળી રહી છે. આજે બજાર ખુલતાની સાથે જ પ્રોફિટ બુકિંગ શરૂ થઈ ગયું છે.

આજે બીએસઈનો સેન્સેક્સ ગઈકાલના 59,107.19ની સામે 282.71 પોઈન્ટ ઘટીને 58,824.48 પર ખુલ્યો હતો જ્યારે નિફ્ટી ગઈકાલના 17,512.25ની સામે 89.15 પોઈન્ટ ઘટીને 17,423.10 પર ખુલ્યો હતો.

બજારમાં એફએમસીજી ઈન્ડેક્સ સિવાય અન્ય તમામ સેક્ટરના શેર ઘટાડા સાથે ટ્રેડ થઈ રહ્યા છે. બેન્કિંગ, ઓટો, આઈટી, ફાર્મા, મેટલ્સ, રિયલ એસ્ટેટ, મીડિયા, એનર્જી ઓઈલ એન્ડ ગેસ અને કન્ઝ્યુમર ડ્યુરેબલ્સ સેક્ટરમાં ઘટાડો નોંધાયો હતો. નિફ્ટીના 50 શૅર્સમાંથી 9 શૅર્સ લાભ સાથે અને 41 શૅર્સ ઘટાડા સાથે ટ્રેડ થઈ રહ્યા છે. સેન્સેક્સના 30 શેરોમાંથી 6 શેર લીલા નિશાનમાં ટ્રેડ થઈ રહ્યા છે, જ્યારે 24 શેર ઘટાડા સાથે ટ્રેડ થઈ રહ્યા છે.

ગઈકાલે સેન્સેક્સ 150 પોઈન્ટના વધારા સાથે 59,107 પર બંધ થયો હતો, જ્યારે નિફ્ટી 25 પોઈન્ટ વધીને 17,512 પર પહોંચ્યો હતો.

યુએસ બજારની સ્થિતિ

યુએસ શેરબજારમાં આ સપ્તાહની શરૂઆત સુધી ઘણો વેગ જોવા મળ્યો હતો, પરંતુ રોકાણકારો ફરીથી અનિશ્ચિતતામાં ઘેરાઈ ગયા છે અને છેલ્લા ટ્રેડિંગ સેશનમાં વેચવાલી શરૂ કરી છે. તેના કારણે અમેરિકાના મુખ્ય શેરબજારોમાં સમાવિષ્ટ નાસ્ડેકમાં પાછલા સત્રમાં 0.85 ટકાનો ઘટાડો જોવા મળ્યો હતો.અન્ય યુએસ બજારો ડાઉ જોન્સ અને એસએન્ડપી 500 પણ દબાણ હેઠળ હતા અને ઘટાડો નોંધાયો હતો.

યુરોપિયન બજારો પણ તૂટ્યા

અમેરિકાની જેમ જ યુરોપના શેરબજારોમાં પણ છેલ્લા ટ્રેડિંગ સેશન દરમિયાન મોટો ઘટાડો જોવા મળ્યો હતો અને તમામ મુખ્ય શેરબજારો લાલ નિશાન પર બંધ થયા હતા. યુરોપના મુખ્ય બજારોમાં સમાવિષ્ટ જર્મનીનું સ્ટોક એક્સચેન્જ પાછલા સત્રમાં 0.19 ટકા ઘટીને બંધ થયું હતું, જ્યારે ફ્રાન્સના શેરબજાર 0.43 ટકાના ઘટાડા સાથે બંધ થયા હતા અને લંડન સ્ટોક એક્સચેન્જમાં પણ 0.17 ટકાનો ઘટાડો જોવા મળ્યો હતો.

એશિયન બજારો પણ ઘટ્યા છે

એશિયાના મોટાભાગના શેરબજારો આજે સવારે ખોટ સાથે ખુલ્યા હતા અને લાલ નિશાન પર ટ્રેડ કરી રહ્યા છે. જ્યારે સિંગાપોર સ્ટોક એક્સચેન્જ 0.60 ટકાના નુકસાન સાથે ટ્રેડ કરી રહ્યો છે, જ્યારે જાપાનનો નિક્કી 1.33 ટકા ડાઉન છે. તાઈવાનનું શેરબજાર આજે 1.99 ટકા તૂટ્યું છે, જ્યારે દક્ષિણ કોરિયાનું કોસ્પી માર્કેટ 1.31 ટકાના ઘટાડા સાથે કારોબાર કરી રહ્યું છે. ચીનનો શાંઘાઈ કમ્પોઝિટ પણ આજે 0.02 ટકા નીચે છે.