Universal Pension Scheme: તમામને મળશે પેન્શન! મોદી સરકાર લાવવા જઈ રહી છે એક નવી સ્કીમ
વિકસિત દેશોની તર્જ પર ભારતમાં પણ હવે નવી પેન્શન સ્કીમ લાવવામાં આવશે. આ અંતર્ગત દરેકને પેન્શનનો લાભ મળશે.
Universal Pension Scheme: વિકસિત દેશોની તર્જ પર ભારતમાં પણ હવે નવી પેન્શન સ્કીમ લાવવામાં આવશે. આ અંતર્ગત દરેકને પેન્શનનો લાભ મળશે. આ નવી પેન્શન યોજનાનું નામ યુનિવર્સલ પેન્શન સ્કીમ (UPS) હશે. સૂત્રોને ટાંકીને જાણવા મળ્યું છે કે શ્રમ મંત્રાલયે આ યોજના પર કામ શરૂ કરી દીધું છે. આ યોજનાનો ઉદ્દેશ્ય દેશના તમામ નાગરિકોને વૃદ્ધાવસ્થામાં નાણાકીય સુરક્ષા પ્રદાન કરવાનો છે.
તમામ નાગરિકોને લાભ મળશે
કોઈપણ ભારતીય નાગરિક આ યોજનામાં યોગદાન આપી શકે છે. સરકાર આ યોજનાને EPFO હેઠળ લાવવાની યોજના બનાવી રહી છે. સરકાર હાલમાં આ યોજનાના સ્વરૂપ પર કામ કરી રહી છે. આ કાર્ય પૂર્ણ થતાંની સાથે જ શ્રમ મંત્રાલય યોજનાને પબ્લિક વચ્ચે લાવીને અને લોકો, નિષ્ણાતો, વિવિધ મંત્રાલયો અને તમામ હિતધારકો સાથે વાત કરીને તેને વધુ સારી અને ઉપયોગી બનાવશે.
સૂત્રોનું માનીએ તો સરકાર આ યોજનાને વધુ આકર્ષક બનાવવા માટે ઘણી નવી અને જૂની યોજનાઓને સામેલ કરી શકે છે. સરકાર ઈચ્છે છે કે અસંગઠિત ક્ષેત્રના વધુમાં વધુ લોકોને જેમ કે મજૂરો, સ્વરોજગાર લોકો અને વેપારીઓને આ યોજનાનો લાભ મળવો જોઈએ.
કઈ યોજનાઓનો સમાવેશ કરી શકાય
આમાં કઈ યોજનાઓનો સમાવેશ કરવામાં આવશે તે અંગે સરકાર તરફથી હજુ સુધી કોઈ સ્પષ્ટતા કરવામાં આવી નથી. નિષ્ણાતોનું કહેવું છે કે સરકાર આ યોજનામાં કેટલીક મોટી અને આકર્ષક યોજનાઓને સામેલ કરી શકે છે. જેમ કે-
પ્રધાનમંત્રી માન ધન યોજના અને રાષ્ટ્રીય પેન્શન યોજના – આ બંને યોજનાઓ સ્વૈચ્છિક છે. જેમાં 60 વર્ષ બાદ દર મહિને 3000 રૂપિયા પેન્શન આપવામાં આવે છે. આ સ્કીમમાં તમે દર મહિને 55 થી 200 રૂપિયા જમા કરાવી શકો છો. તમારી સાથે સરકાર પણ તમે જેટલું યોગદાન આપ્યું છે તેટલી રકમ આપશે.
આ મોટી યોજનામાં અટલ પેન્શન યોજનાને પણ સામેલ કરી શકાય છે. હાલમાં આ યોજના PFRDA હેઠળ આવે છે. આ બે યોજનાઓ સિવાય સરકાર બિલ્ડીંગ એન્ડ કન્સ્ટ્રક્શન વર્કર્સ એક્ટ હેઠળ એકત્ર કરાયેલા સેસને પણ સામેલ કરી શકે છે. આ સાથે બાંધકામ ક્ષેત્રના કામદારોને પણ પેન્શન આપી શકાશે.
આ સિવાય કેન્દ્ર સરકાર રાજ્ય સરકારોને તેમની પેન્શન યોજનાઓને તેમાં સામેલ કરવા માટે પણ પ્રોત્સાહિત કરી શકે છે. તેનાથી પેન્શનની રકમ પણ વધશે અને લોકોને વધુ લાભ મળી શકશે.
દેશમાં વૃદ્ધ લોકોની અંદાજિત સંખ્યા
સંયુક્ત રાષ્ટ્રના "ઇન્ડિયા એજિંગ રિપોર્ટ 2023" અનુસાર, ભારતમાં વૃદ્ધ લોકોની સંખ્યા 2036 સુધીમાં દેશની કુલ વસ્તીના લગભગ 15 ટકા થવાની ધારણા છે, જ્યારે 2050 સુધીમાં આ આંકડો 20 ટકા સુધી પહોંચી શકે છે. આવી સ્થિતિમાં, સરકાર માટે અમેરિકા, યુરોપ, ચીન, કેનેડા, રશિયા જેવા દેશોની જેમ ભારતમાં પેન્શન યોજના લાગુ કરવી મહત્વપૂર્ણ છે, જેમાં પેન્શન અને આરોગ્ય જેવી સુવિધાઓ સામેલ હોવી જોઈએ. ભારતમાં સામાજિક સુરક્ષા મોટાભાગે ભંડોળ અને પેન્શન પર આધારિત છે. આવી સ્થિતિમાં, આ નવી પેન્શન યોજના સામાજિક સુરક્ષાના ક્ષેત્રમાં એક મોટું પગલું સાબિત થઈ શકે છે.
ટોપ સ્ટોરી
ટ્રેન્ડિંગ સમાચાર
