Gujarat Corruption Case: ACBએ IB ઓફિસરને ઝડપ્યો, ફરિયાદી પાસે માંગી હતી 80 હજારની લાંચ
IB Officer Bribery Case Gujarat: સ્ટેટ ઈન્ટેલિજન્સ બ્યુરોમાં ફરજ બજાવતા અધિકારીને ACBની ટીમે લાંચ લેતા રંગેહાથ ઝડપી પાડ્યો હતો.
IB Officer Bribery Case Gujarat: સ્ટેટ ઈન્ટેલિજન્સ બ્યુરોમાં ફરજ બજાવતા અધિકારીને ACBની ટીમે લાંચ લેતા રંગેહાથ ઝડપી પાડ્યો હતો. સાણંદ સેન્ટરના સિનિયર ઈન્ટેલિજન્સ ઓફિસર કેતન દવેએ ફરિયાદી પાસે પોલીસ પ્રોટેક્શનને રીન્યુ કરવા માટે સકારાત્મક અભિપ્રાય આપવાના બદલામાં 80 હજારની માંગ કરી હતી. આ લાંચની રકમ આપવા ન માંગતા હોવાથી ફરિયાદીએ ACBમાં ફરિયાદ કરી હતી. જે ફરિયાદના આધારે ACBની ટીમે ગાંધીનગરના સરગાસણ ચોકડી પાસે ટ્રેપ ગોઠવી હતી. ફરિયાદી પોતાની કારમાં હાજર હતો ત્યારે જ લાંચિયો અધિકારી ત્યાં પહોંચ્યો હતો. હેતુલક્ષી વાતચીત કરી લાંચની રકમ સ્વીકારતા સમયે જ ACBની ટીમે લાંચિયા અધિકારીને રંગેહાથ ઝડપી પાડ્યો હતો.
મળતી જાણકારી અનુસાર, સાણંદ સેન્ટરના સિનિયર ઇન્ટેલિજન્સ ઓફિસર કેતન ગીરીશભાઈ દવેએ એક જાગૃત નાગરિકના પોલીસ પ્રોટેક્શનને રીન્યુ કરવા માટે પોઝિટિવ અભિપ્રાય આપવાના બદલામાં 80,000 રૂપિયાની માંગણી કરી હતી, જે રકમ સ્વીકારતા જ ACBની ટીમે કેતનને દબોચી લીધો હતો. ફરિયાદીને અગાઉથી જ પોલીસ પ્રોટેક્શન મળતું હતું. આ પોલીસ પ્રોટેક્શનની મુદ્દત વધારવા એટલે કે રીન્યુ કરવા માટે ફરિયાદીએ અરજી કરી હતી. આ સરકારી પ્રક્રિયાના ભાગરૂપે આરોપી કેતન દવેએ આ અરજી પર પોઝિટીવ અભિપ્રાય આપવા માટે ફરિયાદી પાસે 80 હજાર રૂપિયાની લાંચની માંગ કરી હતી.
ACBએ રંગેહાથ ઝડપી પાડ્યો
ગાંધીનગરના સરગાસણ ચોકડી પાસે જ્યારે ફરિયાદી પોતાની ગાડીમાં હાજર હતા ત્યારે આરોપી કેતન ત્યાં પહોંચ્યો હતો. બાદમાં ગાડીની અંદર જ આરોપીએ ફરિયાદી સાથે વાતચીત કરી લાંચની રકમ સ્વીકારી હતી. જેવી આરોપીએ લાંચની રકમ લીધી તરત જ એસીબીની ટીમ પહોંચી અને આરોપીને ઝડપી લીધો હતો. આ બનાવને પગલે આરોપી સામે ભ્રષ્ટાચાર નિવારણ અધિનિયમ હેઠળ ગુનો નોંધવાની કાર્યવાહી હાથ ધરવામાં આવી છે. ACB દ્વારા આરોપીની વધુ પૂછપરછ કરવામાં આવી રહી છે.
ટોપ સ્ટોરી
ટ્રેન્ડિંગ સમાચાર
