ગુજરાતની 6 મહાનગરપાલિકામાં નેતાઓનું શાસન પૂરું! સરકારે વહીવટદારોની કરી નિમણૂક, જુઓ લિસ્ટ

ગુજરાતની 6 મહાનગરપાલિકાઓની મુદત પૂરી થતાં સરકારે સનદી અધિકારીઓને વહીવટદારો તરીકે નીમ્યા. જાણો કયા શહેરમાં કોને મળી જવાબદારી અને ક્યારે યોજાશે નવી ચૂંટણીઓ.

administrators appointed 6 gujarat municipal corporations term ends

Source : તસવીર સોશિયલ મીડિયા

Show Quick Read

Key points generated by AI, verified by newsroom

• સ્થાનિક સ્વરાજ્યની સંસ્થાઓની ચૂંટણીઓ મોકૂફ રખાઈ.
• 6 મહાનગરપાલિકાઓનો વહીવટ સનદી અધિકારીઓને સોંપાયો.
• ચૂંટાયેલા જનપ્રતિનિધિઓની મુદત પૂર્ણ થતાં નિર્ણય લેવાયો.
• એપ્રિલ-મેમાં ચૂંટણી યોજાવાની શક્યતા, પક્ષોની તૈયારીઓ શરૂ.

ગુજરાત રાજ્યમાં સ્થાનિક સ્વરાજ્યની સંસ્થાઓના ચૂંટાયેલા જનપ્રતિનિધિઓની 5 વર્ષની મુદત પૂર્ણ થતાં રાજ્ય સરકારે એક બહુ મોટો અને મહત્વપૂર્ણ નિર્ણય લીધો છે. માળખાકીય ફેરફારો અને નવી બેઠકોની રચનાની પ્રક્રિયા ચાલી રહી હોવાના કારણે હાલ પૂરતી ચૂંટણીઓ મોકૂફ રહેતાં, સરકારે નવી સત્તાવાર સૂચના બહાર પાડીને અમદાવાદ, વડોદરા, સુરત, રાજકોટ, જામનગર અને ભાવનગર એમ 6 મોટી મહાનગરપાલિકાઓનો વહીવટ સનદી અધિકારીઓને સોંપી દીધો છે. જ્યાં સુધી નવી ચૂંટણીઓ ન યોજાય ત્યાં સુધી આ શહેરોનો સંપૂર્ણ વહીવટી કારભાર અને શહેરની વ્યવસ્થા હવે આ ખાસ અધિકારીઓ જ સંભાળશે.

કયા શહેરમાં કયા અધિકારીને મળી કમાન?

સરકારના સત્તાવાર આદેશ પ્રમાણે હવેથી આર્થિક પાટનગર ગણાતા અમદાવાદ શહેરનો સંપૂર્ણ વહીવટ શિક્ષણ વિભાગના અગ્ર સચિવ મુકેશ કુમારને સોંપવામાં આવ્યો છે. તેવી જ રીતે વડોદરા શહેરની મોટી જવાબદારી રાજ્યની વીજ કંપનીના સંચાલક શાલિની અગ્રવાલને સોંપાઈ છે. હીરા નગરી સુરત શહેરમાં શિક્ષણ સચિવ મિલિન્દ તોરવણે અને સંસ્કારી નગરી ભાવનગરમાં સામાજિક ન્યાય અને અધિકારિતા વિભાગના સચિવ હર્ષદ પટેલને વહીવટદાર તરીકે નિયુક્ત કરવામાં આવ્યા છે.

આ ઉપરાંત, સૌરાષ્ટ્રના પાટનગર રાજકોટમાં રેમ્યા મોહન અને જામનગરમાં આરતી કંવરની સત્તાવાર નિમણૂક કરવામાં આવી છે. આ તમામ 6 મહાનગરપાલિકાઓમાં જે ઉચ્ચ અધિકારીઓની નિમણૂક થઈ છે, તેમાંના મોટાભાગના લોકો ભૂતકાળમાં આ જ શહેરોમાં પોતાની ફરજ બજાવી ચૂક્યા છે, જેથી તેઓ સ્થાનિક ભૌગોલિક પરિસ્થિતિ અને નાગરિકોના પ્રશ્નોથી ખૂબ જ સારી રીતે વાકેફ છે.

અહીં જુઓ વહીવટદારોની સંપૂર્ણ યાદી:

• અમદાવાદ: મુકેશ કુમાર
• સુરત: મિલિન્દ તોરવણે
• વડોદરા: શાલિની અગ્રવાલ
• ભાવનગર: હર્ષદ પટેલ
• જામનગર: આરતી કંવર
• રાજકોટ: રેમ્યા મોહન

સામાન્ય નાગરિકોના કામો અટકશે નહીં

જ્યારે ચૂંટાયેલી પાંખની મુદત પૂરી થાય છે ત્યારે સામાન્ય નાગરિકોને પોતાના પ્રશ્નો લઈને કોની પાસે જવું તે મોટી મૂંઝવણ થતી હોય છે. પરંતુ આ ઉચ્ચ અધિકારીઓ શહેરના પ્રથમ નાગરિક અને સ્થાયી સમિતિ બંનેની સત્તાઓનો સીધો ઉપયોગ કરી શકતા હોવાથી વિકાસના કોઈ જ કામો અટકશે નહીં. નાગરિકો સીધા જ મહાનગરપાલિકાની મુખ્ય કચેરીએ જઈને આ વહીવટદારો સમક્ષ રસ્તા, સફાઈ કે પાણીને લગતી પોતાની રજૂઆત આસાનીથી કરી શકશે.

ચૂંટણીના ભણકારા અને રાજકીય પક્ષોની ધમધમાટ તૈયારીઓ

રાજકીય વર્તુળોમાં એવી પ્રબળ શક્યતાઓ સેવાઈ રહી છે કે આગામી એપ્રિલ અથવા મે મહિનામાં આ અટકેલી ચૂંટણીઓ યોજાઈ શકે છે. ચૂંટણીઓ નજીક આવતા જ તમામ રાજકીય પક્ષોમાં ભારે હલચલ મચી ગઈ છે. વિરોધ પક્ષ કોંગ્રેસ અને આમ આદમી પાર્ટીએ તો અત્યારથી જ પોતાની તૈયારીઓનો ધમધમાટ શરૂ કરી દીધો છે. કોંગ્રેસ પક્ષ દ્વારા આગામી સ્થાનિક ચૂંટણીઓને ધ્યાનમાં રાખીને 7 અલગ અલગ સમિતિઓની રચના કરી દેવામાં આવી છે અને બેઠકોનો દોર પણ શરૂ થઈ ગયો છે. યોગ્ય અને જીતી શકે તેવા ઉમેદવારોની પસંદગી માટે લોકો અને પાયાના કાર્યકરોના મંતવ્યો જાણવાની પ્રક્રિયા પણ પૂરજોશમાં હાથ ધરવામાં આવી છે.

આ પણ વાંચો

ગુજરાત સ્થાનિક સ્વરાજની ચૂંટણીઓમાં આમ આદમી પાર્ટી ઝંપલાવશે, 10 માર્ચથી ઉમેદવારોની પસંદગી શરૂ કરશે