કાચા મકાનો હોય તો ધ્યાન રાખજો! આંધી-વંટોળ સાથે આ જિલ્લાઓમાં વરસાદ તૂટી પડશે, અંબાલાલ પટેલની ધ્રુજાવી દે તેવી આગાહી
Gujarat Rain: અંબાલાલ પટેલે આગાહી કરી છે કે, આજથી અરબી સમુદ્રમાં લો પ્રેશર બનશે, ૨૪ થી ૨૭ મે દરમિયાન આંધી-વંટોળની શક્યતા; ચોમાસુ પાકને નુકસાનની શક્યતા છે.
Ambalal Patel: ગુજરાતમાં આગામી દિવસોમાં હવામાનનો મિજાજ બદલાવાની શક્યતા છે. હવામાન નિષ્ણાત અંબાલાલ પટેલે આગાહી કરી છે કે ૬ જૂન સુધી રાજ્યના અનેક વિસ્તારોમાં વરસાદ અને ભારે પવન ફૂંકાઈ શકે છે. ખાસ કરીને કાચા મકાનોના છાપરા ઉડી જાય તેવા વંટોળની પણ આગાહી કરવામાં આવી છે, જે ખેડૂતો માટે ચિંતાનો વિષય બની શકે છે.
રાજ્યમાં આગામી દિવસોમાં વાવાઝોડા જેવી સ્થિતિ સર્જાવાની અને વરસાદ પડવાની આગાહી હવામાન નિષ્ણાત અંબાલાલ પટેલે કરી છે. તેમણે જણાવ્યું કે, હાલમાં વાવાઝોડું નબળું પડ્યું છે, પરંતુ આજથી (૨૪ મે, ૨૦૨૫) અરબી સમુદ્રમાં કોંકણ પાસે લો પ્રેશર બનવાની શરૂઆત થશે, જે ગુજરાતના હવામાન પર અસર કરશે.
વરસાદ અને ભારે પવનની આગાહી
અંબાલાલ પટેલના જણાવ્યા અનુસાર, ૨૪ થી ૨૭ મે, ૨૦૨૫ સુધી ગુજરાતના અનેક વિસ્તારોમાં આંધી-વંટોળ અને વરસાદ જોવા મળી શકે છે. આ પછી, ૨૮ મે થી જૂનની શરૂઆત સુધી ગુજરાતના ઘણા વિસ્તારોમાં આંધી સાથે વરસાદ પડશે.
ક્યાં ક્યાં અસર થશે?
આગાહી મુજબ, દક્ષિણ ગુજરાત, સૌરાષ્ટ્ર, કચ્છ અને મધ્ય ગુજરાતમાં ભારે પવન અને ગાજવીજ સાથે વરસાદ પડશે. અંબાલાલ પટેલે ખાસ ચેતવણી આપતા જણાવ્યું છે કે, કાચા મકાનોના છાપરા ઉડી જાય તેવા પવનો ફૂંકાશે. રાજ્યમાં પવનની ગતિ વધારે રહેવાની શક્યતા છે, જેના કારણે ચોમાસુ પાક ઉપર ગંભીર અસર થઈ શકે છે.
ખેડૂતો અને સામાન્ય જનતાને આ સમયગાળા દરમિયાન સાવચેત રહેવા અને જરૂરી સાવચેતીના પગલાં લેવા માટે અપીલ કરવામાં આવી છે.
ચોમાસાનું વહેલું આગમન: આગામી ૨૪ કલાકમાં દેશમાં પ્રવેશ, કેરળમાં ૧૬ વર્ષનો રેકોર્ડ તૂટશે!
ભારતમાં લાંબા સમયથી રાહ જોવાઈ રહેલા ચોમાસાના આગમન માટે તમામ અનુકૂળ પરિસ્થિતિઓનું નિર્માણ થઈ ગયું છે. ભારતીય હવામાન વિભાગ (IMD) અનુસાર, છેલ્લા ૪ દિવસથી ૪૦ થી ૫૦ કિલોમીટર દૂર અટવાયેલું ચોમાસું શુક્રવારે (૨૩ મે, ૨૦૨૫) આગળ વધ્યું છે અને આગામી ૨૪ કલાકમાં તે સત્તાવાર રીતે દેશમાં પ્રવેશ કરશે. આ વર્ષે કેરળમાં ચોમાસાનું આગમન નિર્ધારિત સમય કરતાં એક અઠવાડિયા વહેલું એટલે કે છેલ્લા ૧૬ વર્ષમાં સૌથી વહેલું થવા જઈ રહ્યું છે. અગાઉ, ૨૦૦૯ અને ૨૦૦૧ માં ચોમાસું ૨૩ મેના રોજ કેરળ પહોંચ્યું હતું.
આગળ વધી રહેલી ચોમાસા પ્રણાલી સાથે ઓછા દબાણવાળા ક્ષેત્રને કારણે, છેલ્લા બે દિવસથી કેરળના ઘણા ભાગોમાં ભારે વરસાદ પડી રહ્યો છે.
દક્ષિણ રાજ્યોમાં ભારે વરસાદની આગાહી:
IMD એ શનિવારે (૨૪ મે, ૨૦૨૫) દક્ષિણ રાજ્યોમાં ભારે વરસાદની આગાહી કરી છે:
- કેરળ, દરિયાકાંઠાના અને દક્ષિણ આંતરિક કર્ણાટક: છૂટાછવાયા સ્થળોએ ખૂબ જ ભારે વરસાદની શક્યતા.
- કેરળ અને દરિયાકાંઠાના કર્ણાટક: ૨૯ મે સુધી ભારેથી અતિ ભારે વરસાદની શક્યતા, સાથે જ ૪૦-૫૦ કિમી પ્રતિ કલાકની ઝડપે પવન ફૂંકાશે.
- તમિલનાડુ, તેલંગાણા અને આંધ્રપ્રદેશ: આગામી પાંચ દિવસમાં છૂટાછવાયા વરસાદ અને ગાજવીજ સાથે વરસાદ પડશે.
ટોપ સ્ટોરી
ટ્રેન્ડિંગ સમાચાર
