Junagadh: ગુજરાત ભાજપની પ્રશિક્ષણ વર્ગની બેઠકનો પ્રારંભ, CM ભૂપેન્દ્ર પટેલ ઉપસ્થિત રહ્યા

જૂનાગઢ જિલ્લાના માલણકા ગીરમાં આજથી ગુજરાત ભાજપની પ્રશિક્ષણ વર્ગની બેઠકનો પ્રારંભ થયો છે.  ત્રણ દિવસ ચાલનારી બેઠકના પ્રથમ સત્રમાં મુખ્યમંત્રી ભૂપેન્દ્ર પટેલ ઉપસ્થિત રહ્યા હતા.

તસવીર-મુખ્યમંત્રી ભૂપેંદ્ર પટેલ ફેસબુક

જૂનાગઢ: જૂનાગઢ જિલ્લાના માલણકા ગીરમાં આજથી ગુજરાત ભાજપની પ્રશિક્ષણ વર્ગની બેઠકનો પ્રારંભ થયો છે.  ત્રણ દિવસ ચાલનારી બેઠકના પ્રથમ સત્રમાં મુખ્યમંત્રી ભૂપેન્દ્ર પટેલ ઉપસ્થિત રહ્યા હતા.  આગામી 3 દિવસમાં કુલ 14 સત્ર યોજાશે. જેમાં ભાજપના શીર્ષ નેતાઓ હાજરી આપશે.

પ્રશિક્ષણ વર્ગના સમાપનમાં બી. એલ. સંતોષ ઉપસ્થિત રહેશે. મુખ્યમંત્રી ભૂપેન્દ્ર પટેલે સત્રના પ્રારંભમાં આજે સરકારે કરેલા વિકાસકાર્યો અંગે પાર્ટીના આગેવાનોને માહિતગાર કર્યા. આ ઉપરાંત 2024ની લોકસભાની ચૂંટણીમાં તમામ 26 બેઠક જીતવાની રણનીતિ પર ચર્ચા કરવામાં આવી છે.  

રાજ્યના અનેક વિસ્તારોમાં ભર ઉનાળે છવાયો વરસાદી માહોલ

હવામાન વિભાગની આગાહીને પગલે રાજ્યના અનેક વિસ્તારોમાં આજે કમોસમી વરસાદ પડ્યો છે. સૌ પ્રથમ વાત કરીએ વડોદરાની તો અહીં અચાનક વાતાવરણમાં પલટો આવ્યો હતો. આકાશ કાળા વાદળોથી ઢંકાઈ ગયું હતું અને ધીમી ધારે વરસાદ શરૂ થયો હતો. હરણી, નિઝમપુરા,સમાં, છાણી, કારેલીબાગમાં વરસાદ પડ્યો હતો.

કચ્છમાં કમોસમી વરસાદ યથાવત 

તો બીજી તરફ પશ્ચિમ કચ્છના વિસ્તારોમાં પણ ભારે પવન અને કરા સાથે વરસાદ પડ્યો છે. માંડવી, નખત્રાણા બાદ હવે મુંદ્રા સહિત ગ્રામ્ય વિસ્તારમાં પવન સાથે વરસાદ શરૂ થયો છે. પૂર્વ કચ્છના પણ વાતાવરણમાં પલટો આવ્યો છે. પૂર્વ કચ્છના અંજાર સહિત આસપાસ વિસ્તારોમાં વરસાદી માહોલ જોવા મળી રહ્યો છે.

મહીસાગરના વાતાવરણમાં પલટો

મહીસાગર જિલ્લાના કડાણા તેમજ આસપાસના ગ્રામ્ય વિસ્તારોમાં વરસાદ નોંધાયો છે. વાદળછાયા વાતાવરણ બાદ કડાણા અને દીવડા પંથકમાં વરસાદ પડ્યો હતો. વરસાદના કારણે વાતાવરણમાં ઠંડક પ્રસરી હતી. તો બીજી તરફ વરસાદના કારણે વાવેતર કરેલ પાકને નુકસાનની ભીતિને લઈ ખેડૂત ચિંતિત થયા છે.

અરવલ્લીમાં વરસાદી માહોલ

અરવલ્લી જિલ્લામાં કમોસમી વરસાદ પડ્યો છે. મોડાસાના ગ્રામીણ પંથક ઈસરોલ, જીવનપુર, ટીટોઈ સહિતના વિસ્તારમાં વરસાદ નોંધાયો છે. વરસાદ પડતા ખેડૂતો મુશ્કેલીમાં મુકાયા છે. વધુ વરસાદ પડશે તો ઘઉં, ચણા સહિતના પાકને નુકશાન થવાની ભિતિ છે.

રાજ્યમાં બે દિવસ કરા સાથે કમોસમી વરસાદની આગાહી

રાજ્યમાં બે દિવસ ગાજવીજ સાથે કમોસમી વરસાદ પડશે. હવામાન વિભાગના જણાવ્યા મુજબ, બરફના કરા સાથે વરસાદની આગાહી છે. અમદાવાદ, ગાંધીનગર સહિત અનેક શહેરોમાં કમોમસી વરસાદની આગાહી છે. બનાસકાંઠા, પાટણ, બોટાદ, અમરેલીમાં વરસાદ પડી શકે છે. અમદાવાદમાં ગાજવીજ સાથે માવઠાની આગાહી કરવામાં આવી છે, આવતીકાલ સાંજથી માવઠાનું જોર ઘટશે. સાયક્લોનિક સર્ક્યુલેશનને લીધે કમોસમી વરસાદ પડશે.