વિધાનસભામાં ધારાસભ્યોએ આપેલા સૂચનો પર તાત્કાલિક એક્શન લેવા CM ભૂપેન્દ્ર પટેલનો કડક આદેશ

પ્રવક્તા મંત્રી જીતુ વાઘાણીની મોટી જાહેરાત: સરકારની નીતિઓમાં જ્યાં જરૂર પડશે ત્યાં તાત્કાલિક સુધારા કરાશે, પ્રજાની સુખાકારી જ સરકારનો મુખ્ય ટાર્ગેટ છે.

gujarat chief minister bhupendra patel orders swift action on mla suggestions for public welfare

Source : એબીપી અસ્મિતા

Show Quick Read

Key points generated by AI, verified by newsroom

• ધારાસભ્યોના સૂચનો પર તાત્કાલિક કાર્યવાહી કરવા સીએમનો આદેશ.
• નાગરિકોને મુશ્કેલી કરતી નીતિઓમાં સુધારા કરવા સરકારનો નિર્ધાર.
• સચિવોને સૂચના: ધારાસભ્યોના સૂચનોને વહીવટી સ્તરે અમલમાં મૂકો.
• સરકારી કામકાજમાં પારદર્શિતા વધારવા અને પ્રશ્નો ઉકેલવાનો ઉદ્દેશ્ય.

ગુજરાતના મુખ્યમંત્રી ભૂપેન્દ્ર પટેલે રાજ્યના વહીવટી તંત્રને એક મોટો અને જનહિતલક્ષી આદેશ આપ્યો છે. વિધાનસભાના બજેટ સત્ર દરમિયાન ધારાસભ્યો દ્વારા લોકોના હિતમાં જે પણ હકારાત્મક સૂચનો કે રજૂઆતો કરવામાં આવે છે, તેના પર સત્વરે કાર્યવાહી કરવા સીએમએ કડક સૂચના આપી છે. મુખ્યમંત્રીની અધ્યક્ષતામાં મળેલી કેબિનેટ બેઠક બાદ રાજ્ય સરકારના પ્રવક્તા મંત્રી જીતુભાઈ વાઘાણીએ આ માહિતી આપતા જણાવ્યું હતું કે, જો સરકારની કોઈ નીતિ કે નિયમથી સામાન્ય નાગરિકોને મુશ્કેલી પડતી હશે, તો તેમાં તાત્કાલિક સુધારો કરીને લોકોની સુખાકારી વધારવાનો રાજ્ય સરકારે મક્કમ નિર્ધાર કર્યો છે.

વિધાનસભા પૂરતી સીમિત નહીં રહે રજૂઆતો

કેબિનેટ બેઠકના નિર્ણયો વિશે વધુ વિગતો આપતા જીતુભાઈ વાઘાણીએ કહ્યું કે, હાલમાં ગુજરાત વિધાનસભાનું બજેટ સત્ર ચાલી રહ્યું છે. આ સત્રમાં અલગ-અલગ વિભાગોની માંગણીઓ અને બિલ (વિધેયકો) પર ચર્ચા થતી હોય છે. આ ચર્ચા દરમિયાન શાસક પક્ષ હોય કે વિપક્ષ, તમામ ધારાસભ્યો પોતાના વિસ્તાર અને જનતાને લગતા ઘણા અગત્યના પ્રશ્નો અને સૂચનો કરતા હોય છે. મુખ્યમંત્રી ભૂપેન્દ્ર પટેલે આ બધી જ રજૂઆતોને માત્ર ગૃહની ચર્ચા પૂરતી સીમિત ન રાખતા, તેને પ્રેક્ટિકલ રીતે વહીવટી સ્તરે અમલમાં મૂકવા માટે ખાસ ગંભીરતા દાખવી છે.

સચિવોને અપાયા સ્પષ્ટ આદેશ: નીતિઓમાં કરો જરૂરી ફેરફાર

આજની આ કેબિનેટ બેઠકમાં સીએમ પટેલે રાજ્યના તમામ વિભાગોના સચિવો અને ઉચ્ચ અધિકારીઓને સ્પષ્ટ શબ્દોમાં સૂચના આપી છે કે, ધારાસભ્યો દ્વારા ગૃહમાં પ્રજાના હિત માટે જે કંઈ પણ સૂચનો કરવામાં આવે, તેની ઝીણવટભરી નોંધ લેવામાં આવે. જો કોઈ સરકારી નીતિ કે સિસ્ટમની ખામીના કારણે અજાણતા પણ લોકોને હાલાકી ભોગવવી પડતી હોય, અથવા તો કોઈ નાનકડા સુધારાથી લોકોનું મોટું ભલું થતું હોય, તો તેવા સુધારા કરવા માટે તાત્કાલિક પ્રોસેસ શરૂ કરવી. ધારાસભ્યોના પોઝિટિવ સૂચનોને હકારાત્મક અભિગમ (Positive Approach) સાથે સરકારી માળખામાં સામેલ કરવાનો સીએમએ આદેશ આપ્યો છે.

કામગીરીમાં આવશે વધુ પારદર્શિતા

મંત્રી વાઘાણીએ અંતમાં જણાવ્યું કે, સરકારનો સીધો અને સ્પષ્ટ ઉદ્દેશ્ય એ જ છે કે સરકારી યોજનાઓ અને નીતિઓનો લાભ વધુમાં વધુ લોકોને એકદમ સરળતાથી મળે. મુખ્યમંત્રીના આ નિર્ણયથી સરકારી કામકાજમાં વધુ પારદર્શિતા આવશે અને લોકોના પડતર પ્રશ્નોનો ખૂબ જ ઝડપથી ઉકેલ આવશે. વડાપ્રધાન નરેન્દ્ર મોદીના "સૌનો સાથ, સૌનો વિકાસ" મંત્રને સાચા અર્થમાં સાર્થક કરવા માટે રાજ્ય સરકાર પ્રજાની આશાઓ અને અપેક્ષાઓ પૂરી કરવા પૂરી મક્કમતાથી આગળ વધી રહી છે.

આ પણ વાંચો

ગુજરાત કેબિનેટ બેઠક: ધોલેરા-મેટ્રો પ્રોજેક્ટનો રિવ્યૂ, સ્થાનિક સ્વરાજ્યની ચૂંટણીઓ અને UCC બિલ પર લેવાયા મોટા નિર્ણયો