ગુજરાત સરકારનો ઐતિહાસિક નિર્ણય, આ કર્મચારીઓને મળશે જૂની પેન્શન યોજાનો લાભ, 3 મહિનામાં કરો અરજી!

વર્ગ 3 અને 4 ના પાત્ર કર્મચારીઓએ 3 મહિનામાં અરજી કરવાની રહેશે; સામાન્ય વહીવટ વિભાગે સત્તાવાર ઠરાવ બહાર પાડીને આપી મોટી રાહત.

Gujarat Govt OPS Decision Compassionate Appointment Class 3-4 Benefit

Source : @CMOGuj

Show Quick Read

Key points generated by AI, verified by newsroom

• ગુજરાત સરકારે વર્ગ-૩, ૪ કર્મચારીઓ માટે OPS લાભ આપ્યો.
• ૦૧/૦૪/૨૦૦૫ પહેલા નિમણૂક પામેલા કર્મચારીઓને OPS લાભ મળશે.
• પાત્ર કર્મચારીઓએ OPS લાભ મેળવવા ૩ મહિનામાં અરજી કરવી.

Gujarat govt OPS decision: જો તમે કે તમારા પરિવારમાં કોઈ ગુજરાત સરકારમાં નોકરી કરતું હોય તો તમારા માટે આ ખૂબ જ સારા અને અગત્યના સમાચાર છે. ખાસ કરીને એવા લોકો માટે જેમને સરકારમાં રહેમરાહે (અનુકંપાના ધોરણે) નોકરી મળી છે. રાજ્ય સરકારે એક મોટો નિર્ણય લેતા વર્ગ 3 અને વર્ગ 4 ના પાત્ર કર્મચારીઓને જૂની પેન્શન યોજના (OPS) નો લાભ આપવાની જાહેરાત કરી છે. સામાન્ય વહીવટ વિભાગે આ અંગે સત્તાવાર ઠરાવ પણ જાહેર કરી દીધો છે. આ ઠરાવ મુજબ, જે અધિકારીઓ કે કર્મચારીઓ આ લાભ માટે લાયક છે, તેમણે આગામી 3 મહિનાની અંદર પોતાની અરજી વિભાગમાં જમા કરવાની રહેશે.

શું હતી જૂની જોગવાઈઓ અને પૃષ્ઠભૂમિ?

આપણે બોલચાલની ભાષામાં સમજીએ તો, ચાલુ નોકરીએ જ્યારે કોઈ કર્મચારીનું અવસાન થાય છે, ત્યારે તેમના આશ્રિત પરિવારના એક સભ્યને રહેમરાહે નિમણૂક આપવાનો સરકારનો નિયમ છે. અગાઉના ઠરાવો મુજબ, આવા ઉમેદવારોને શરૂઆતના 5 વર્ષ માટે ફિક્સ પગારથી એડહોક ધોરણે નોકરી આપવામાં આવતી હતી. ત્યારબાદ એક નિયમ આવ્યો કે આ 5 વર્ષની ફિક્સ પગારની નોકરીને બઢતી, ઉચ્ચતર પગાર ધોરણ અને નિવૃત્તિના લાભો માટે ગણતરીમાં લેવામાં આવશે. તાજેતરમાં નાણા વિભાગે એક નિર્ણય લીધો હતો કે જે લોકોની ભરતી પ્રક્રિયા 01/04/2005 પહેલા પૂરી થઈ ગઈ હોય, તેમને જૂની પેન્શન યોજનાનો લાભ અપાશે. જેના આધારે હવે રહેમરાહે નોકરી મેળવનારા માટે આ નવો ઠરાવ કરવામાં આવ્યો છે.

આ નિર્ણયનો લાભ કોને મળશે?

સામાન્ય વહીવટ વિભાગે આ અંગે સ્પષ્ટતા કરી છે કે પુખ્ત વિચારણાના અંતે નીચે મુજબની બે શરતોમાંથી કોઈ એકમાં આવતા કર્મચારીઓને આ લાભ મળશે:

જે કર્મચારીઓને 15/06/2004 થી 31/03/2005 ના સમયગાળા વચ્ચે (એટલે કે 01/04/2005 પહેલા) રહેમરાહે નિમણૂક મળી ચૂકી હોય.

અથવા, જે કર્મચારીઓને 15/06/2004 થી 31/03/2005 સુધીમાં ગુજરાત ગૌણ સેવા પસંદગી મંડળ અથવા પંચાયત, ગ્રામ ગૃહ નિર્માણ અને ગ્રામ વિકાસ વિભાગ દ્વારા નોકરી માટે ફાળવણી કે ભલામણ કરી દેવામાં આવી હોય, પરંતુ તેમને સત્તાવાર નિમણૂક 01/04/2005 પછી મળી હોય.

ખાસ શરત અને અરજીની સમયમર્યાદા

ઉપર જણાવેલ બંનેમાંથી કોઈ પણ કિસ્સામાં નિમણૂક કે ભલામણ પામેલા અને 01/04/2005 પછી પોતાનો ફિક્સ પગારનો સમયગાળો સફળતાપૂર્વક પૂરો કરીને નિયમિત (કાયમી) નિમણૂક પામેલા તમામ કર્મચારીઓને આ નિર્ણય લાગુ પડશે. આ તમામ પાત્ર કર્મચારીઓને નાણા વિભાગના 08/11/2024 અને 16/04/2025 ના ઠરાવ મુજબ જૂની પેન્શન યોજનાનો પૂરેપૂરો લાભ આપવામાં આવશે.

સૌથી અગત્યની વાત એ છે કે, જે પણ અધિકારીઓ અને કર્મચારીઓ આ શરતો પૂરી કરતા હોય, તેમણે જૂની પેન્શન યોજનાનો લાભ મેળવવા માટે આ ઠરાવ પ્રસિદ્ધ થયાની તારીખથી બરાબર 3 માસ (મહિના) ની અંદર અરજી કરી દેવાની રહેશે. આ પ્રક્રિયામાં નાણા વિભાગના અગાઉના ઠરાવોની અન્ય તમામ સૂચનાઓનું પાલન કરવાનું રહેશે.

અત્રે નોંધનીય છે કે, સામાન્ય વહીવટ વિભાગે નાણા વિભાગની 18/09/2025 ની અને સરકારશ્રીની 01/08/2026 ની મળેલી મંજૂરી બાદ આ સત્તાવાર ઠરાવ પ્રસિદ્ધ કરીને કર્મચારીઓને મોટી રાહત આપી છે.