Gujarat Rain: આ તારીખથી ગુજરાતમાં વરસાદનો વધુ એક નવો રાઉન્ડ આવશે, પરેશ ગોસ્વામીની મોટી આગાહી
બંગાળની ખાડીમાં નવી સિસ્ટમ સક્રિય, દક્ષિણ ગુજરાત, સૌરાષ્ટ્ર અને ઉત્તર ગુજરાત માં છૂટાછવાયા વરસાદની શક્યતા; રાજ્યમાં અત્યાર સુધી 96% વરસાદ નોંધાયો.
Paresh Goswami prediction: ગુજરાતમાં ચોમાસું હજુ સક્રિય છે અને બંગાળની ખાડીમાં એક નવી અસ્થિરતા સક્રિય થઈ રહી છે. હવામાન નિષ્ણાત પરેશ ગોસ્વામીની આગાહી અનુસાર, આ સિસ્ટમ 15 થી 20 સપ્ટેમ્બર વચ્ચે રાજ્યમાં વરસાદનો એક નવો રાઉન્ડ લાવી શકે છે. જોકે આ વરસાદ હળવો કે મધ્યમ રહેશે, જેમાં ગાજવીજ અને પવનનું પ્રમાણ વધુ જોવા મળી શકે છે. રાજ્યમાં અત્યાર સુધીમાં 96% વરસાદ વરસી ચૂક્યો છે, જે ચોમાસાની સામાન્ય ટકાવારીની ખૂબ નજીક છે.
રાજ્યમાં ચોમાસાની વર્તમાન સ્થિતિ
તાજેતરમાં, 4 થી 8 સપ્ટેમ્બર દરમિયાન રાજ્યમાં વરસાદનો એક સાર્વત્રિક રાઉન્ડ આવ્યો હતો, જેમાં ગુજરાતનાં લગભગ 80 થી 85% વિસ્તારમાં ખૂબ સારો વરસાદ થયો હતો. આ રાઉન્ડમાં અમુક જગ્યાએ તો 12 થી 15 ઇંચ સુધીનું અતિભારે વરસાદ પણ નોંધાયું હતું. આ વરસાદ સાથે, 2025 ના ચોમાસાનો કુલ વરસાદ 96% સુધી પહોંચી ગયો છે. નિષ્ણાતની શરૂઆતની આગાહી 98% થી 106% ની હતી, જે મુજબ ચોમાસું સામાન્ય રહેવાની સંભાવના ખૂબ ઊંચી છે.
નવા વરસાદી રાઉન્ડની આગાહી
પરેશ ગોસ્વામીનાં જણાવ્યા અનુસાર, બંગાળની ખાડી માં જે નવી અસ્થિરતા બની રહી છે તે કોઈ મોટી સિસ્ટમ નથી, પરંતુ તે એક સાયક્લોનિક સર્ક્યુલેશન બનીને ગુજરાત તરફ આગળ વધી શકે છે. આ નબળી સિસ્ટમના કારણે 15 થી 20 સપ્ટેમ્બર વચ્ચે રાજ્યના લગભગ 40 થી 50% વિસ્તારમાં છૂટાછવાયા અને મધ્યમ વરસાદની શક્યતા છે.
- કયા વિસ્તારોમાં વરસાદ? આ વરસાદ ખાસ કરીને દક્ષિણ ગુજરાત, સૌરાષ્ટ્ર, અને ઉત્તર ગુજરાત ના કેટલાક ભાગોમાં જોવા મળશે.
- વરસાદનું પ્રમાણ: આ વિસ્તારોમાં 1 થી 2 ઇંચ અને અમુક જગ્યાએ 2 થી 4 ઇંચ સુધીનો વરસાદ પડી શકે છે.
- અસર: આ વરસાદ સાથે ગાજવીજ અને પવનનું પ્રમાણ સામાન્ય કરતાં વધુ રહેવાની શક્યતા છે.
ગરમી અને ઉકળાટમાંથી રાહત નહીં
એક મહત્વપૂર્ણ બાબત એ છે કે હવે જે વરસાદ પડશે તે ગરમી અને ઉકળાટમાંથી કોઈ મોટી રાહત નહીં આપે. અત્યારે જે ઊંચા તાપમાન અને બફારાનો માહોલ છે તે આ વરસાદ પછી પણ યથાવત રહેશે. માત્ર વરસાદ દરમિયાન થોડું તાપમાન નીચું આવી શકે છે, પરંતુ સમગ્ર સપ્ટેમ્બર મહિના દરમિયાન ગરમી અને બફારામાંથી મોટી રાહત મળવાની કોઈ શક્યતા નથી. આ નવા રાઉન્ડ પછી પણ ચોમાસું સક્રિય રહેશે અને તેની વિદાયની કોઈ સંભાવના હાલ પૂરતી નથી.
ટોપ સ્ટોરી
ટ્રેન્ડિંગ સમાચાર
