ગુજરાતમાં આગામી 5 દિવસ વરસાદની આગાહી; જાણો કયા 6 જિલ્લામાં ઓરેન્જ એલર્ટ?

gujarat rain forecast: કેરળ તરફ ઝડપથી આગળ વધી રહ્યું છે ચોમાસું, ગુજરાતમાં 1 થી 4 જૂન સુધી ભારે પવન અને ગાજવીજ સાથે પ્રી-મોન્સૂન એક્ટિવિટી જામશે.

gujarat rain forecast orange alert next 5 days relief heat

Source : ai

Show Quick Read

Key points generated by AI, verified by newsroom

• ગુજરાતમાં 5 દિવસ પ્રી-મોન્સૂન એક્ટિવિટી, 6 જિલ્લામાં ઓરેન્જ એલર્ટ.
• 1 જૂને 60 કિમી/કલાકની ઝડપે પવન, માછીમારોને સાવચેતી સૂચવી.
• 2-3 જૂને રાજ્યભરમાં હળવાથી મધ્યમ વરસાદની યલો એલર્ટ.
• 4 જૂનથી તાપમાન 2-4 ડિગ્રી ઘટશે, ચોમાસું કેરળમાં પ્રવેશ કરશે.

gujarat rain forecast: ગુજરાતના લોકોને કાળઝાળ ગરમીમાંથી હવે મોટી રાહત મળવાના એંધાણ છે. હવામાન વિભાગ (IMD) ની લેટેસ્ટ આગાહી મુજબ, આગામી 5 દિવસ એટલે કે 1 જૂનથી 4 જૂન સુધી રાજ્યના મોટાભાગના વિસ્તારોમાં વાતાવરણમાં મોટો પલટો જોવા મળશે. બે સાયક્લોનિક સિસ્ટમ સક્રિય થવાને કારણે પ્રી-મોન્સૂન એક્ટિવિટી જામશે, જેમાં આજે રાજ્યના 6 જિલ્લામાં ગાજવીજ અને ભારે પવન સાથે વરસાદનું ઓરેન્જ એલર્ટ આપવામાં આવ્યું છે. સાથે જ આગામી દિવસોમાં તાપમાનનો પારો 2 થી 4 ડિગ્રી નીચે ગગડતા લોકોને આકરી ગરમીમાંથી છુટકારો મળશે.

આજનું હવામાન અને પવનની ગતિ (1 જૂન):

ઓરેન્જ એલર્ટ: મહિનાના પહેલા જ દિવસે પૂર્વ અને મધ્ય ગુજરાતના 6 જિલ્લાઓ (સાબરકાંઠા, અરવલ્લી, મહીસાગર, દાહોદ, છોટા ઉદેપુર અને નર્મદા) માં પ્રમાણમાં વધુ વરસાદની શક્યતા હોવાથી ત્યાં ઓરેન્જ એલર્ટ આપવામાં આવ્યું છે.

યલો એલર્ટ: કચ્છ, ઉત્તર, મધ્ય અને દક્ષિણ ગુજરાત સહિત સૌરાષ્ટ્રના મોટાભાગના જિલ્લાઓમાં (દેવભૂમિ દ્વારકા, જામનગર અને પોરબંદર સિવાય) હળવાથી મધ્યમ વરસાદ માટે યલો એલર્ટ જાહેર કરાયું છે.

પવનની ગતિ: આજે ગુજરાતના ઘણા ભાગોમાં 50 થી 60 કિમી પ્રતિ કલાકની ઝડપે ભારે પવન ફૂંકાઈ શકે છે. સૌરાષ્ટ્ર અને કચ્છમાં પણ 40 થી 50 કિમીની ઝડપે પવન ફૂંકાવાની ચેતવણી છે. દરિયામાં વાવાઝોડા અને ભારે પવનની સ્થિતિને જોતા માછીમારોને સાવચેત રહેવા અપીલ કરાઈ છે.

આ પણ વાંચોઃ આવતીકાલનું હવામાન: 1 જૂનથી બદલાશે હવામાન, દેશના 19 રાજ્યોમાં વાવાઝોડા સાથે ભારે વરસાદની આગાહી

2 થી 4 જૂન: ક્યાં કેવો રહેશે માહોલ?

2 જૂન: ઓરેન્જ એલર્ટ હળવું થઈ જશે. પશ્ચિમ સૌરાષ્ટ્રના ત્રણ જિલ્લાઓ (દ્વારકા, જામનગર, પોરબંદર) ને બાદ કરતાં લગભગ આખા ગુજરાતમાં હળવાથી મધ્યમ વરસાદ માટે યલો એલર્ટ રહેશે.

3 જૂન: આખા ગુજરાતમાં વરસાદી માહોલ જામશે. બાકી રહી ગયેલા સૌરાષ્ટ્રના વિસ્તારોનો પણ તેમાં સમાવેશ થઈ જશે, એટલે કે સમગ્ર ગુજરાત રાજ્યમાં યલો એલર્ટ લાગુ પડશે.

4 જૂન: વરસાદી સિસ્ટમનો વ્યાપ થોડો ઘટશે. કચ્છ, અમદાવાદ, ગાંધીનગર, પાટણ, મહેસાણા અને રાજકોટ સહિતના મધ્ય-ઉત્તર ગુજરાત અને સૌરાષ્ટ્રના કેટલાક ભાગોને રાહત મળશે. જોકે, દક્ષિણ ગુજરાત (સુરત, નવસારી, વલસાડ વગેરે), પૂર્વ ગુજરાત અને સૌરાષ્ટ્રના દરિયાકાંઠાના વિસ્તારોમાં (ભાવનગર, ગીર સોમનાથ, દીવ) હળવાથી મધ્યમ વરસાદ ચાલુ રહેશે.

આ પણ વાંચોઃ 3-3 સિસ્ટમ સક્રિય થતાં ગુજરાતમાં 6 દિવસ તોફાની વરસાદની આગાહી, આવતીકાલે 30 જિલ્લામાં ભુક્કા બોલાવશે, જુઓ લિસ્ટ

અમદાવાદનું તાપમાન અને ચોમાસાની એન્ટ્રી

અમદાવાદ શહેરની વાત કરીએ તો, આગામી સમયમાં અહીં પણ સામાન્ય રીતે વાદળછાયું વાતાવરણ રહેશે. મોડી રાત્રે અથવા વહેલી સવારે ગાજવીજ સાથે હળવો કે મધ્યમ વરસાદ થવાની પૂરી સંભાવના છે. હાલ શહેરમાં મહત્તમ તાપમાન 41 ડિગ્રી સેલ્સિયસ આસપાસ રહેવાની શક્યતા છે, પરંતુ 4 જૂન પછી તાપમાનમાં 2 થી 4 ડિગ્રીનો ઘટાડો નોંધાશે.

બીજી તરફ, દક્ષિણ-પશ્ચિમ ચોમાસું હવે ખૂબ ઝડપથી આગળ વધી રહ્યું છે. હાલ તે અરબી સમુદ્રના દક્ષિણ ભાગ, લક્ષદ્વીપ અને બંગાળની ખાડીના મોટાભાગના વિસ્તારોમાં પહોંચી ચૂક્યું છે. આગામી 2 થી 5 દિવસમાં તે કેરળ અને તમિલનાડુમાં એન્ટ્રી કરે તેવા એકદમ સાનુકૂળ સંજોગો સર્જાઈ રહ્યા છે.