Gujarat Rain: આજથી રાજ્યમાં ગાજવીજ સાથે વરસાદ તૂટી પડશે! પરેશ ગોસ્વામીએ કહ્યું - હજી ચોમાસું ગયું નથી
Gujarat Rain Alert: 15 થી 21 સપ્ટેમ્બર દરમિયાન વરસાદનો નવો રાઉન્ડ, 40 થી 50% વિસ્તારમાં ગાજવીજ સાથે વરસાદની શક્યતા
Paresh Goswami weather prediction: ગુજરાતમાં ચોમાસાની વિદાય થઈ હોવાના અહેવાલો વચ્ચે, હવામાન નિષ્ણાંત પરેશ ગોસ્વામીએ સ્પષ્ટતા કરી છે કે હજુ પણ ચોમાસું રાજ્યમાં સક્રિય છે. તેમણે આગાહી કરી છે કે 15 સપ્ટેમ્બરથી વરસાદનો એક નવો રાઉન્ડ શરૂ થશે, જે 21 સપ્ટેમ્બર સુધી ચાલશે. આ વરસાદ સાર્વત્રિક નહીં હોય, પરંતુ રાજ્યના 40 થી 50% વિસ્તારોને આવરી લેશે. આ વરસાદ મુખ્યત્વે ગાજવીજ અને પવન સાથે બપોર પછીના સેશનમાં પડશે, અને તેનાથી ખેડૂતોને અમુક અંશે ફાયદો અને નુકસાન બંને થઈ શકે છે.
ચોમાસાની વિદાય હજુ દૂર
હવામાન નિષ્ણાંત પરેશ ગોસ્વામીના જણાવ્યા અનુસાર, ગુજરાતમાંથી ચોમાસાની વિદાયની પ્રક્રિયા હજુ શરૂ થઈ નથી. કેટલાક અહેવાલો ભલે આ વિશે વાત કરી રહ્યા હોય, પરંતુ વાસ્તવમાં ચોમાસું હજુ પણ સક્રિય છે. તેમના અનુમાન મુજબ, ગુજરાતમાંથી ચોમાસાની વિદાયની શરૂઆત લગભગ 22 સપ્ટેમ્બરની આસપાસ થશે. જોકે, આ પ્રક્રિયા ધીમી ગતિએ ચાલશે અને સપ્ટેમ્બરના અંત સુધીમાં એટલે કે 28 થી 29 સપ્ટેમ્બર સુધી ચાલુ રહેવાની શક્યતા છે.
વરસાદનો નવો રાઉન્ડ: 15 થી 21 સપ્ટેમ્બર
ગોસ્વામીએ આગાહી કરી છે કે 15 સપ્ટેમ્બરથી ગુજરાતમાં વરસાદનો એક નવો રાઉન્ડ શરૂ થશે. આ વરસાદ શરૂઆતમાં સીમિત વિસ્તારોમાં પડશે, પરંતુ 16 અને 17 સપ્ટેમ્બરથી તેનો વિસ્તાર વધશે. ખાસ કરીને 18, 19, 20 અને 21 સપ્ટેમ્બરના ચાર દિવસમાં અનેક જગ્યાએ છૂટાછવાયા વરસાદની શક્યતા વધુ છે. આ વરસાદ મુખ્યત્વે બપોર પછીના સેશનમાં ગાજવીજ અને પવન સાથે જોવા મળશે.
આ રાઉન્ડમાં સાર્વત્રિક વરસાદની અપેક્ષા નથી, અને તે ગુજરાતના લગભગ 40 થી 50% વિસ્તારને આવરી લેશે. વરસાદની તીવ્રતા પણ મર્યાદિત રહેશે. જ્યાં વરસાદ પડશે ત્યાં 1 થી 2 ઇંચ અને અમુક વિસ્તારોમાં 2 થી 4 ઇંચ સુધીનો વરસાદ વરસી શકે છે. આ રાઉન્ડમાં અતિવૃષ્ટિ થવાની કોઈ શક્યતા નથી.
કયા વિસ્તારોમાં વરસાદની શક્યતા?
આગામી વરસાદી રાઉન્ડમાં ખાસ કરીને દક્ષિણ ગુજરાત અને સૌરાષ્ટ્રમાં વરસાદની શક્યતા વધુ રહેશે. ત્યારબાદ, મધ્ય ગુજરાતના આણંદ, નડિયાદ અને વડોદરા જેવા વિસ્તારોમાં અને ઉત્તર ગુજરાતના છૂટાછવાયા વિસ્તારોમાં પણ વરસાદ થઈ શકે છે. આ વરસાદ ઘણા ખેડૂતો માટે ફાયદાકારક સાબિત થઈ શકે છે, જેમણે હજુ પણ તેમના પાકને પિયતની જરૂર છે. જોકે, ઘણા વિસ્તારોમાં પાક તૈયાર થઈ ગયો હોવાથી, આ વરસાદ નુકસાન પણ પહોંચાડી શકે છે.
ગોસ્વામીએ ખેડૂતોને આ વરસાદને "લોટરી" સમાન ગણાવ્યો છે, કારણ કે 5 ગામમાં વરસાદ પડે અને બાજુના 5 ગામમાં ન પણ પડે તેવી પરિસ્થિતિનું નિર્માણ થઈ શકે છે.
ચોમાસાની વિદાયની પ્રક્રિયા
22 સપ્ટેમ્બરથી ચોમાસાની વિદાયની પ્રક્રિયા શરૂ થઈ શકે છે. આ પ્રક્રિયા ધીમી ગતિએ બનાસકાંઠા અને કચ્છના પાકિસ્તાન બોર્ડર લાગુ વિસ્તારોથી શરૂ થવાની શક્યતા છે. જોકે, આનો અર્થ એ નથી કે 22 તારીખથી વરસાદ સંપૂર્ણપણે બંધ થઈ જશે. સપ્ટેમ્બરના અંત સુધી એટલે કે 30 તારીખ સુધી છૂટાછવાયા વરસાદની શક્યતા રહેશે અને ઓક્ટોબરના પહેલા અઠવાડિયામાં પણ હળવા વરસાદના ઝાપટા પડી શકે છે. હવામાન વિભાગ દ્વારા આ વિશે વધુ વિગતો સમયસર આપવામાં આવશે.
ટોપ સ્ટોરી
ટ્રેન્ડિંગ સમાચાર
