મુખ્યમંત્રી ભૂપેન્દ્ર પટેલે ગુજરાતના 19 શહેરો માટે ₹4179 કરોડના વિકાસ કાર્યો મંજૂર કર્યા; પાણી, રસ્તા અને ડ્રેનેજ સહિત....

આ ભંડોળનો ઉપયોગ મુખ્યત્વે માળખાકીય સુવિધાઓના વિકાસ, આઇકોનિક રોડ્સ, પાણી પુરવઠા, સ્ટોર્મ વોટર ડ્રેનેજ અને આઉટગ્રોથ વિસ્તારોના વિકાસ માટે કરવામાં આવશે.

મુખ્યમંત્રી ભૂપેન્દ્ર પટેલે ગુજરાતના 19 શહેરો માટે ₹4179 કરોડના વિકાસ કાર્યો મંજૂર કર્યા

Source : એબીપી લાઇવ

Gujarat urban development: ગુજરાત સરકાર દ્વારા 'શહેરી વિકાસ વર્ષ-2025' ની ઉજવણી નિમિત્તે મુખ્યમંત્રી ભૂપેન્દ્ર પટેલે રાજ્યના શહેરોમાં બહુવિધ વિકાસ કાર્યો માટે ₹4179 કરોડની મોટી રકમ મંજૂર કરી છે. આ ભંડોળ સ્વર્ણિમ જયંતિ મુખ્યમંત્રી શહેરી વિકાસ યોજના હેઠળ ફાળવવામાં આવ્યું છે. આ રકમ અમદાવાદ, વડોદરા, રાજકોટ, ગાંધીનગર સહિત નવરચિત મહાનગરપાલિકાઓ મોરબી, પોરબંદર, અને નડિયાદને તથા 12 નગરપાલિકાઓને મળશે, જેનાથી નાગરિકોના જીવનધોરણમાં સુધારો થશે.

આ ભંડોળનો ઉપયોગ મુખ્યત્વે માળખાકીય સુવિધાઓના વિકાસ, આઇકોનિક રોડ્સ, પાણી પુરવઠા, સ્ટોર્મ વોટર ડ્રેનેજ અને આઉટગ્રોથ વિસ્તારોના વિકાસ માટે કરવામાં આવશે. આ નિર્ણયનો હેતુ વડાપ્રધાન નરેન્દ્ર મોદીના 'નાગરિક કેન્દ્રિત' શહેરોના નિર્માણના વિઝનને આગળ ધપાવવાનો છે, જેનાથી શહેરી જીવન વધુ સુવિધાજનક અને સુખદ બનશે.

ભંડોળની ફાળવણી અને મુખ્ય કામો

મુખ્યમંત્રી ભૂપેન્દ્ર પટેલે સ્વર્ણિમ જયંતિ મુખ્યમંત્રી શહેરી વિકાસ યોજના અંતર્ગત ₹4179 કરોડ ના કામોને મંજૂરી આપી છે, જે વિવિધ કેટેગરીમાં વહેંચાયેલા છે:

માળખાકીય સુવિધાઓ: માળખાકીય વિકાસ માટે સૌથી વધુ ₹3768 કરોડ ફાળવવામાં આવ્યા છે. આ અંતર્ગત અમદાવાદને ₹2940 કરોડ, વડોદરાને ₹455 કરોડ અને રાજકોટને ₹367 કરોડ મળશે.

આઇકોનિક રોડ અને ગૌરવ પથ: શહેરોને આધુનિક લુક આપવા માટે આઇકોનિક રોડ્સ અને ગૌરવ પથના નિર્માણ માટે કુલ ₹219 કરોડ મંજૂર થયા છે. મોરબી, નડિયાદ, રાજકોટ મહાનગરપાલિકાઓ અને ઉના, હળવદ, ખંભાળિયા જેવી નગરપાલિકાઓને આ ભંડોળનો લાભ મળશે.

પાણી પુરવઠો અને ડ્રેનેજ: પાણી પુરવઠાની લાઈનો અને વરસાદી પાણીના નિકાલ માટેના સ્ટોર્મ વોટર ડ્રેનેજ સિસ્ટમ માટે ₹93 કરોડ ફાળવવામાં આવ્યા છે. આ રકમનો મોટો હિસ્સો મોરબી, સાવરકુંડલા અને ધાનેરાને મળશે.

આઉટગ્રોથ વિસ્તારોનો વિકાસ: શહેરોની બહારના વિસ્તારોના વિકાસ માટે રાજકોટને ₹80 કરોડ અને પાટણને ₹2.72 કરોડ ફાળવવામાં આવ્યા છે.

લાભાર્થી શહેરો

આ યોજનાનો લાભ રાજ્યની 7 મહાનગરપાલિકાઓને મળશે, જેમાં અમદાવાદ, વડોદરા, રાજકોટ, ગાંધીનગર અને નવરચિત મહાનગરપાલિકાઓ મોરબી, પોરબંદર અને નડિયાદનો સમાવેશ થાય છે. આ ઉપરાંત, વિસનગર, બોરસદ, વિરમગામ, પાટણ, આમોદ, ઉના, હળવદ, ખંભાળિયા, સાવરકુંડલા, ધાનેરા અને વેરાવળ-પાટણ જેવી 12 નગરપાલિકાઓને પણ વિકાસ કામો માટે ભંડોળ મળશે.

ધ્યેય અને દ્રષ્ટિકોણ

મુખ્યમંત્રી ભૂપેન્દ્ર પટેલનો ઉદ્દેશ્ય 'નાગરિક કેન્દ્રિત' શહેરોનું નિર્માણ કરવાનો છે. આ ભંડોળનો હેતુ નાગરિકોને વધુ સારી સુવિધાઓ પૂરી પાડવાનો, પરિવહન વ્યવસ્થા સુધારવાનો અને શહેરી જીવનને વધુ સુખદ બનાવવાનો છે. 'અર્નિંગ વેલ-લિવિંગ વેલ' ના મંત્રને સાકાર કરીને સ્માર્ટ, સસ્ટેઇનેબલ અને ગતિશીલ શહેરો બનાવવા માટે આ નિર્ણય એક મહત્વનું પગલું છે.

આ પણ વાંચો

ગુજરાતના આ જિલ્લાઓમાં વરસાદનું યલો એલર્ટ: આગામી 24 કલાકમાં વરસાદ તૂટી પડશે, જાણો હવામાન વિભાગની આગાહી

અમદાવાદ ગ્રામ્ય પોલીસે બાળ તસ્કરીની આંતરરાજ્ય ગેંગનો પર્દાફાશ કર્યો: માસ્ટરમાઇન્ડ મહિલા સહિત 5ની ધરપકડ