અમરેલીની જાફરાબાદ પાલિકામાં ભાજપનું શાસન, ચૂંટણી પહેલા જાણો કેટલા ઉમેદવાર થયા બિનહરિફ
અમરેલી જિલ્લામાં ભાજપનું ઓપરેશન જાફરાબાદ સફળ થયું છે. અમરેલીની જાફરાબાદ પાલિકામાં ભાજપનું શાસન આવશે.
અમરેલી: અમરેલી જિલ્લામાં ભાજપનું ઓપરેશન જાફરાબાદ સફળ થયું છે. અમરેલીની જાફરાબાદ પાલિકામાં ભાજપનું શાસન આવશે. જાફરાબાદ પાલિકાની ચૂંટણી પહેલા 16 ઉમેદવાર બિનહરિફ થયા છે. ધારાસભ્ય હીરા સોલંકીએ ઓપરેશન જાફરાબાદ પાર પાડ્યું હતું.
16 ઉમેદવાર બિનહરિફ જાહેર થયા
28 બેઠક પૈકી ભાજપના 16 ઉમેદવાર બિનહરિફ જાહેર થયા છે. બિનહરિફ ઉમેદવારોએ ધારાસભ્યના નિવાસસ્થાને પહોંચી ઉજવણી કરી હતી. ઢોલ-નગારા અને મોંઢા મીઠા કરાવી ભાજપે ખુશી વ્યકત કરી છે. ગત ટર્મમાં આખી જાફરાબાદ પાલિકા બિનહરિફ થઈ હતી.
હાલોલ નગરપાલિકામાં ભાજપે સત્તા કબજે કરી
પંચમહાલ જિલ્લાની હાલોલ નગરપાલિકામાં ભાજપે સત્તા કબજે કરી છે. ચૂંટણી પહેલા જ આ નગરપાલિકામાં ભાજપે સત્તા મેળવી છે. હાલોલ નગરપાલિકાના કુલ 9 વોર્ડના 36 બેઠકોમાંથી 20 બેઠકો બિન હરીફ થઈ જતા ભાજપે ચૂંટણી પહેલા જ હાલોલ પાલિકા કબજે કરી છે. હાલોલ નગરપાલિકાના અલગ-અલગ વોર્ડમાં થઈને કુલ 20 ઉમેદવારો બિન હરીફ જાહેર થયા છે. પાલિકાના વોર્ડ નંબર 2, 3 અને 5 સંપૂર્ણ બિન હરીફ થયા હતા.
હાલોલ નગરપાલિકાની ચૂંટણી યોજાય તે પહેલા ભાજપને સત્તા મળે તેવી સ્થિતિ સર્જાઇ છે. નવ વોર્ડમાં 72 ફોર્મ ભરાયા હતા. જે પૈકી પાંચ ફોર્મ અમાન્ય થયા. જ્યારે 67 ફોર્મ માન્ય રખાયા. 13 ઉમેદવારોએ પોતાનું ફોર્મ પરત ખેંચતા 14 ઉમેદવારો બિનહરીફ થયા છે.
કુલ મળીને ૨૧૫ બેઠકો પર બિનહરીફ વિજય
ભારતીય જનતા પાર્ટીએ સ્થાનિક સ્વરાજ્યની ચૂંટણીમાં ૬૮ નગરપાલિકામાં કુલ ૧૯૬ નગરપાલિકાની બેઠકો ચૂંટણી પહેલા વિજય મેળવ્યો છે, જેમાં ૪ નગરપાલિકામાં બહુમતી કરતાં વધારે બેઠકો પર બિનહરીફ થતાં ભચાઉમાં ૨૮ માંથી ૨૨ બેઠકો, હાલોલમાં ૩૬ માંથી ૧૯ બેઠકો, જાફરાબાદમાં ૨૮ માંથી ૧૬ બેઠકો તેમજ બાંટવામાં ૨૪ માંથી ૧૫ બેઠકો પર નગરપાલિકામાં ભારતીય જનતા પાર્ટીએ બિનહરીફ વિજય પ્રાપ્ત કર્યો છે. તેમજ, જુનાગઢ મહાનગરપાલિકાની ૯ બેઠકો અને તાલુકા પંચાયત તેમજ પેટા ચૂંટણીની ૧૦ બેઠકો એમ કુલ મળીને ૨૧૫ બેઠકો પર ભારતીય જનતા પાર્ટીએ બિનહરીફ વિજય મેળવ્યો છે.
સ્થાનિક સ્વરાજની ચૂંટણીની મહત્વની તારીખો
- ચૂંટણીની જાહેરાતની તારીખ તા 21/01/2025
- જાહેરનામું પ્રસિદ્ધ કરવાની તારીખ તા 27/01/2025
- ઉમેદવારી પત્રો ભરવાની છેલ્લી તારીખ તા 01/02/2025
- ઉમેદવારી પત્રોની ચકાસણીની તારીખ તા 03/02/2025
- ઉમેદવારી પાછી ખેંચી લેવાની છેલ્લી તારીખ 04/02/2025
- મતદાનની તારીખ તા.16/02/2025 (રવિવાર) સવારના 7-00 વાગ્યા થી સાંજના 6-00 વાગ્યા સુધી
- પુન:મતદાનની તારીખ (જરૂરી જણાય તો) તા.17/02/2025
- મતગણતરીની તારીખ તા.18/02/2025
- ચૂંટણી પ્રક્રિયા પૂર્ણ થવાની તારીખ તા.21/02/2025
ટ્રેન્ડિંગ સમાચાર
ટોપ સ્ટોરી
