Gujarat Election 2022: વિધાનસભાની ચૂંટણી પ્રક્રિયા જોવા શ્રીલંકા અને મોરેશિયસના અધિકારીઓ ગુજરાત આવ્યા

Gujarat Assembly Election 2022: ગુજરાતમાં વિધાનસભાની ચૂંટણી ચાલી રહી છે. એક તબક્કાનું મતદાન સમાપ્ત થઈ ગયું છે અને બીજા તબક્કાનું મતદાન આવતીકાલે થવાનું છે.

શ્રીલંકા અને મોરેશિયસના અધિકારીઓ ગુજરાત આવ્યા

Gujarat Assembly Election 2022: ગુજરાતમાં વિધાનસભાની ચૂંટણી ચાલી રહી છે. એક તબક્કાનું મતદાન સમાપ્ત થઈ ગયું છે અને બીજા તબક્કાનું મતદાન આવતીકાલે થવાનું છે. ગુજરાત વિધાનસભાની ચૂંટણી પ્રક્રિયાનો અભ્યાસ કરવા શ્રીલંકાના કમિશનર જનરલ ઓફ ઇલેક્શન્સ રથનાયકે અને મોરેશિયસના ચીફ ઇલેક્ટોરલ ઓફિસર શ્રીમતી વિજીયાની કૂંજન ગુજરાત આવ્યા છે.

ગાંધીનગરમાં મુખ્ય નિર્વાચન અધિકારી પી. ભારતીની અધ્યક્ષતામાં યોજાયેલી બેઠકમાં આ બંને મહાનુભાવોએ ગુજરાત વિધાનસભાની સમગ્ર ચૂંટણી પ્રક્રિયા અને ચૂંટણી તંત્રની સજ્જતા વિશે વિગતવાર જાણકારી મેળવી હતી. શ્રીલંકાના કમિશનર જનરલ ઓફ ઇલેક્શન્સ એમ. કે. એસ. એસ. રથનાયકે અને મોરેશિયસના ચીફ ઇલેક્ટોરલ ઓફિસર શ્રીમતી વીજીયાની કૂંજન ઇલેક્શન કમિશન ઓફ ઇન્ડિયાના ઇન્ટરનેશનલ ઇલેક્શન વીઝીટર પ્રોગ્રામ અંતર્ગત ગુજરાત આવ્યા છે

આજે સવારે આ બંને મહાનુભાવોએ અમદાવાદમાં ડિસ્પેચ સેન્ટરની મુલાકાત લીધી હતી અને સમગ્ર પ્રક્રિયાનું નિરીક્ષણ કર્યું હતું. શ્રીલંકા અને મોરેશિયસના આ બંને અધિકારીઓ ગુજરાતની ચૂંટણી, ચૂંટણી તંત્રની સજ્જતા અને કામગીરીથી અત્યંત પ્રભાવિત થયા હતા.  આવતીકાલે બીજા તબક્કાના મતદાનના દિવસે આ બંને અધિકારીઓ મતદાન મથકોની મુલાકાત લેશે અને સમગ્ર પ્રક્રિયાનું અવલોકન કરશે.

મતદાન કરાવવા જળમાર્ગે પહોંચ્યા ચૂંટણી અધિકારીઓ

સોમવારે એટલે કે પાંચ તારીખે બીજા તબક્કાનું મતદાન થવાનું છે. જેને લઈને ચૂંટણીપંચના અધિકારીઓ તૈયારીમાં લાગી ગયા છે. તમામ સામગ્રીઓ બુથ સુધી પહોંચાડવામાં આવી રહી છે.  આ કડીમાં હવે મહીસાગર વિધાનસભાની ચૂંટણીને લઈને સંતરામપુર વિધાનસભામાં રાઠડા બેટ ગામે કર્મચારીઓ જળ માર્ગે ચૂંટણીલક્ષી સામગ્રી લઈને પહોંચ્યા હતા.

રાઠડા બેટ ગામ કડાણા ડેમમાં પાણીની મધ્યમાં આવેલ છે. મતદાન પ્રક્રિયાને લઇ અને ચૂંટણીલક્ષી સામગ્રી સાથે કર્મચારીઓ હોડીમાં બેસી મતદાન મથકે પહોંચ્યા હતા. આદિવાસી વિસ્તારમાં આવેલ આ મતદાન મથકને આદિવાસી જીવન શૈલીને રજૂ કરતી વિવિધ આદિવાસી કળાઓથી સુશોભિત કરવામાં આવ્યું છે. રાઠવા બેટ ગામે 712 મતદારો પોતાના મત અધિકારનો ઉપયોગ કરશે. મતદારો મતદાન કરી શકે તે માટે જળ માર્ગે પણ વહીવટી તંત્ર રાઠડા બેટ ગામે પહોંચ્યું હતું. તેમની મધ્યમાં આવેલ હોવાના કારણે રાઠડાબેટ પર પહોંચવા માટે એકમાત્ર માર્ગ જળમાર્ગ છે. 

બીજા તબક્કાના મતદાન પહેલા પેટ્રોલ પંપ એસોસિએશનની મોટી જાહેરાત

અમદાવાદ સહિત 14 જિલ્લાની 93 બેઠક માટે બીજા તબક્કાનું મતદાન 5 ડિસેમ્બરે બીજા તબક્કાનું મતદાન યોજાશે. પ્રથમ તબક્કામાં થયેલા ઓછા મતદાનના કારણે બીજા તબક્કાના મતદાન પહેલા પેટ્રોલપંપ એસોસિએશન દ્વારા મોટી જાહેરાત કરવામાં આવી છે. જે મુજબ મતદાનનું ચિહ્ન બતાવનારા મતદારોને એક લીટર પર એક રૂપિયા ડિસ્કાઉન્ટની જાહેરાત કરવામાં આવી છે. વધુમાં વધુ લોકો મતદાન કરે તે માટે એસોસિએશન દ્વારા પ્રયાસ કરવામાં આવ્યો છે.