શોધખોળ કરો

Gujarat Rain: બપોર બાદ રાજ્યના અનેક વિસ્તારોમાં વરસાદ શરુ, આ ગામમાં ઘરોમાં ભરાયા પાણી

Gujarat Rain: હવામાન વિભાગની આગાહીને પગલે રાજ્યના કેટલાક વિસ્તારોમાં બપોર બાદ ફરી વરસાદની શરુઆત થઈ છે. આજે અમરેલી શહેરમાં બપોરબાદ વાતાવરણ પલટો આવ્યો હતો.

By : gujarati.abplive.com | Updated at : 12 Jul 2023 06:44 PM (IST)

Rains in Amreli, Botad and Valsad, flooded houses in Malvan village Gujarat Rain: બપોર બાદ રાજ્યના અનેક વિસ્તારોમાં વરસાદ શરુ, આ ગામમાં ઘરોમાં ભરાયા પાણી

વલસાડ વિસ્તારમાં ધોધમાર વરસાદ

Gujarat Rain: હવામાન વિભાગની આગાહીને પગલે રાજ્યના કેટલાક વિસ્તારોમાં બપોર બાદ ફરી વરસાદની શરુઆત થઈ છે. આજે અમરેલી શહેરમાં બપોરબાદ વાતાવરણ પલટો આવ્યો હતો. શહેરમા ફરી બીજા રાઉન્ડમાં મુશળધાર વરસાદ ખાબક્યો હતો. અસહ્ય ગરમી બાદ ભારે વરસાદ પડતાં શહેરની બજારોમાં નદી માફક વરસાદી પાણી વહેતા થયા હતા. શહેરના રાજકમલ, હરી રોડ, લાઠી રોડ, ભીડભંજન ચિતલરોડ, સહિતના વિસ્તારમાં ધોધમાર વરસાદ ખાબક્યો હતો.

તાપી જિલ્લામાં વિરામ બાદ ફરી વરસાદી માહોલ જોવા મળ્યો હતો. કેટલાક વિસ્તારોમાં ધીમીધારે તો કેટલાક વિસ્તારોમાં વરસાદી ઝાપટા પડ્યા હતા. વ્યારા શહેરના સ્ટેશન રોડ વિસ્તારમાં વરસાદ પડ્યો હતો. જેને લઈને વાતાવરણમાં ઠંડક પ્રસરી હતી.

બોટાદ વરસાદી માહોલ

બરવાળા શહેર સહિત તાલુકા પંથકમાં વરસાદ શરૂ થયો છે. બે દિવસના વિરામ બાદ ફરી વરસાદી માહોલ જોવા મળી રહ્યો છે. બરવાળા શહેરના વાગડીયા શેરી, સોની શેરી, કુંડળ દરવાજા, ઝબુબા હાઈસ્કુલ,ખારા વિસ્તાર, ખોડિયાર નગર, જલારામ જીન, કેશવનગર સહિત તમામ વિસ્તારોમાં વરસાદ પડી રહ્યો છે. આ ઉપરાંત તાલુકાના વહીયા, કુંડળ, ટીંબલા, રોજીદ, કાપડીયાળી, ખમીદાણા સહિતના આસપાસના ગ્રામ્ય વિસ્તારોમાં પણ વરસાદ પડી રહ્યો છે. સાંજના સમયે વાતાવરણમાં પલટો આવતા ઠંડક પ્રસરી છે.

વલસાડ જિલ્લામાં વરસાદી માહોલ

વલસાડ જિલ્લાના તમામ તાલુકામાં વરસાદી માહોલ જોવા મળી રહ્યો છે.વલસાડના માલવણ અને આસપાસના ગામોમાં ભારે વરસાદ પડી રહ્યો છે.ભારે વરસાદથી માલવણ ગામ સુધી જતા રસ્તા પર પાણીફરી વળ્યા છે.ગામના નીચાણવાળા વિસ્તારમાં પણ કેટલાક ઘરોમાં પાણી ભરાયા છે. ગામ જતા રસ્તા પર પણ પાણી ભરાઈ જતા અવરજવરમાં લોકોને હાલાકીનો સામનો કરવો પડી રહ્યો છે.

સુરત જિલ્લામાં વરસાદી માહોલ

માંડવી પંથકમાં વરસાદને કારણે વીસડાલીયા નજીક પુલ પર પાણી ભરાયા છે. પુલ ઉપર ખાડાઓ પડતા અનેક વાહન ચાલકોને હાલાકીનો સામનોો કરવો પડી રહ્યો છે. ધોધમાર વરસાદને પગલે અનેક વાહન ચાલકોએ હેડલાઇટ ચાલુ કરીને જવાની નોબત આવી છે. જળાશયોમાં નવા નીરની આવક પણ યથાવત છે.

છેલ્લા 24 કલાકમાં રાજ્યના 104 તાલુકામાં નોંધાયો વરસાદ