રોઝડું આડું ઉતરતા સોમનાથથી દ્વારકા જતી બસ પલટી: 2 શ્રદ્ધાળુઓના કમકમાટીભર્યા મોત, અનેક ઘાયલ

ભાવનગરના 40થી વધુ યાત્રાળુઓ સોમનાથ દાદાના દર્શન કરી દ્વારકા જઈ રહ્યા હતા ત્યારે માંગરોળના રઈજ ગામ પાસે સર્જાયો ગમખ્વાર અકસ્માત; હાઈ-વે પર મચી ચીસાચીસ.

Somnath to Dwarka Bus Accident, 2 Pilgrims Dead and Many Injured

Source : abp asmita

Show Quick Read

Key points generated by AI, verified by newsroom

• ભાવનગરના શ્રદ્ધાળુઓની બસ રોઝડાને કારણે પલટી.
• બે યાત્રાળુઓના ઘટનાસ્થળે જ મૃત્યુ.
• ઘાયલોને તાત્કાલિક હોસ્પિટલમાં ખસેડાયા.
• પોલીસે ટ્રાફિક ખુલ્લો કરાવી તપાસ હાથ ધરી.

Somnath to Dwarka Bus Accident: ગુજરાતના હાઈ-વે પર અકસ્માતોની વણથંભી વણઝાર ચાલુ જ છે. સોમનાથ મહાદેવના દર્શન કરી દ્વારકા જઈ રહેલી ભાવનગરના શ્રદ્ધાળુઓની એક ખાનગી બસને જૂનાગઢના માંગરોળ તાલુકાના રઈજ ગામ નજીક ગમખ્વાર અકસ્માત નડ્યો છે. રસ્તામાં અચાનક એક રોઝડું (નીલગાય) આવી જતાં ડ્રાઈવરે બસ પરથી કાબુ ગુમાવ્યો હતો અને બસ જોરદાર પલટી ખાઈ ગઈ હતી. આ ગોઝારી ઘટનામાં 2 યાત્રાળુઓના ઘટનાસ્થળે જ કમકમાટીભર્યા મોત નીપજ્યા છે, જ્યારે અનેક મુસાફરો ગંભીર રીતે ઘાયલ થતાં તેમને તાત્કાલિક 108 એમ્બ્યુલન્સ મારફતે કેશોદ અને જૂનાગઢની હોસ્પિટલમાં સારવાર અર્થે ખસેડવામાં આવ્યા છે.

રસ્તા વચ્ચે અચાનક પશુ આવી જતાં સર્જાઈ દુર્ઘટના

મળતી પ્રાથમિક માહિતી મુજબ, આ ખાનગી ટ્રાવેલ્સની બસમાં ભાવનગરના 40થી વધુ શ્રદ્ધાળુઓ સવાર હતા. આ તમામ યાત્રિકો ધાર્મિક પ્રવાસે નીકળ્યા હતા અને સોમનાથ મહાદેવના દર્શન કરીને દેવભૂમિ દ્વારકા જવા રવાના થયા હતા. બસ જ્યારે પૂરઝડપે માંગરોળ પાસે આવેલા રઈજ ગામ નજીક હાઈ-વે પરથી પસાર થઈ રહી હતી, ત્યારે અચાનક જ રસ્તાની વચ્ચે એક રોઝડું આવી ગયું હતું. પશુને બચાવવા જતાં ચાલકે સ્ટીયરીંગ પરથી કાબુ ગુમાવી દીધો હતો અને જોતજોતામાં આખી બસ પલટી ખાઈને રસ્તા પર પછડાઈ હતી. આ અકસ્માતમાં બે શ્રદ્ધાળુઓ માટે આ યાત્રા તેમની અંતિમ સફર બની ગઈ હતી.

હાઈ-વે પર ગુંજી ઉઠી મરણચીસો, સ્થાનિકો મદદે દોડ્યા

અકસ્માત એટલો ભયાનક હતો કે બસ પલટી મારતા જ અંદર સવાર મુસાફરોમાં ભારે ફફડાટ અને બૂમાબૂમ મચી ગઈ હતી. ઘાયલ લોકોની ચીસોથી આખો હાઈ-વે ગુંજી ઉઠ્યો હતો. બસ પલટી ખાવાનો જોરદાર અવાજ સાંભળીને આસપાસના સ્થાનિક લોકો અને રસ્તા પરથી પસાર થતા અન્ય વાહનચાલકો તાત્કાલિક મદદ માટે દોડી આવ્યા હતા. લોકોએ ભારે જહેમત ઉઠાવીને બસમાંથી ફસાયેલા શ્રદ્ધાળુઓને બહાર કાઢ્યા હતા અને 108 ને જાણ કરી હતી.

ઈજાગ્રસ્તોને હોસ્પિટલ ખસેડાયા, પોલીસે રસ્તો ખુલ્લો કરાવ્યો

આ દુર્ઘટનામાં ગંભીર રીતે ઘાયલ થયેલા લોકોને તાત્કાલિક કેશોદ અને જૂનાગઢની હોસ્પિટલોમાં દાખલ કરવામાં આવ્યા છે. પ્રાથમિક માહિતી મુજબ, ઈજાગ્રસ્તોમાં નીચેના લોકોનો સમાવેશ થાય છે:

પ્રવિણાબેન ગઢવી (ઉંમર 55 વર્ષ)

પરીતાબેન મકવાણા (ઉંમર 18 વર્ષ)

જીજુબેન દેવકુભાઈ (ઉંમર 60 વર્ષ)

સોનલબેન (ઉંમર 33 વર્ષ)

ઉષાબેન ગઢવી (ઉંમર 40 વર્ષ)

રાજેશભાઈ રાવત (ઉંમર 55 વર્ષ)

બીજી તરફ, હાઈ-વે પર બસ પલટી જવાના કારણે વાહનોની લાંબી કતારો લાગી ગઈ હતી અને ભારે ટ્રાફિકજામના દ્રશ્યો સર્જાયા હતા. ઘટનાની જાણ થતાં માંગરોળ પોલીસનો કાફલો તરત જ ઘટનાસ્થળે પહોંચી ગયો હતો. પોલીસે ક્રેન બોલાવીને બસને રસ્તા પરથી હટાવી હતી અને ટ્રાફિક ક્લિયર કરાવ્યો હતો. હાલમાં પોલીસે અકસ્માતનો ગુનો નોંધીને મૃતકોના પોસ્ટમોર્ટમ સહિતની આગળની કાયદેસરની કાર્યવાહી હાથ ધરી છે. આ ઘટનાથી ભાવનગર અને માંગરોળ પંથકમાં ભારે શોકનું મોજું ફરી વળ્યું છે.