વડાલીમાં હૃદયદ્રાવક ઘટના: એક જ પરિવારના પાંચ સભ્યોએ ગટગટાવ્યું ઝેર, પતિ-પત્નીનું મોત, ત્રણ બાળકો ગંભીર
ત્રણ સંતાનો ગંભીર હાલતમાં અમદાવાદ ખસેડાયા, આત્મહત્યાનું કારણ અકબંધ, પોલીસ તપાસ ચાલુ.
Vadali family suicide: સાબરકાંઠા જિલ્લાના વડાલી શહેરમાં એક અત્યંત દુઃખદ ઘટના સામે આવી છે. અહીં સગર પરિવારના પાંચ સભ્યોએ ઝેરી દવા પીને સામૂહિક આત્મહત્યાનો પ્રયાસ કર્યો હતો. આ ઘટનામાં પતિ અને પત્નીનું સારવાર દરમિયાન મોત નીપજ્યું છે, જ્યારે તેમના ત્રણ સંતાનોની હાલત ગંભીર હોવાથી તેમને વધુ સારવાર માટે અમદાવાદ ખસેડવામાં આવ્યા છે. આ સામૂહિક આત્મહત્યા પાછળનું કારણ હજુ સુધી જાણી શકાયું નથી અને પોલીસ દ્વારા આ અંગે વધુ તપાસ હાથ ધરવામાં આવી છે.
વડાલી શહેરમાં છૂટક મજૂરી કરીને ગુજરાન ચલાવતા સગર પરિવારના પાંચ સભ્યો - વિનુભાઈ સગર, તેમના પત્ની કોકીલાબેન સગર, અને તેમના ત્રણ સંતાનો નિલેશ સગર, નરેન્દ્ર સગર અને ક્રિષ્નાબેન સગરે એક સાથે ઝેરી દવા પી લીધી હતી. આ ઘટનાની જાણ થતાં જ તાત્કાલિક પરિવારના તમામ સભ્યોને વડાલી સામૂહિક આરોગ્ય કેન્દ્ર ખાતે પ્રાથમિક સારવાર માટે લઈ જવામાં આવ્યા હતા. જો કે, તેમની તબિયત વધુ નાજુક જણાતા તેમને વધુ સારવાર માટે ઈડરની ખાનગી હોસ્પિટલમાં રિફર કરવામાં આવ્યા હતા.
ઈડરની ખાનગી હોસ્પિટલમાં પણ તેમની તબિયતમાં કોઈ સુધારો ન જણાતા તેમને તાત્કાલિક હિંમતનગર સિવિલ હોસ્પિટલમાં ખસેડવામાં આવ્યા હતા. હિંમતનગર સિવિલ હોસ્પિટલમાં સારવાર દરમિયાન પરિવારના મોભી એવા વિનુભાઈ સગર અને તેમના પત્ની કોકીલાબેન સગરનું મોત નીપજ્યું હતું. જ્યારે તેમના ત્રણ સંતાનોની હાલત અત્યંત ગંભીર જણાતા તેમને મોડી રાત્રે ડાયાલિસિસ કરવામાં આવ્યું હતું અને ત્યારબાદ આજે સવારે વધુ સારવાર માટે અમદાવાદ ખાતે ખસેડવામાં આવ્યા છે.
આ ઘટનાની જાણ થતાં જ પોલીસ પણ તાત્કાલિક ઘટના સ્થળે પહોંચી ગઈ હતી અને તપાસ શરૂ કરી દીધી હતી. પોલીસે પરિવારજનો અને આસપાસના પાડોશીઓના નિવેદન લીધા છે. મૃતક દંપતીના મોબાઈલ ફોનને પણ ફોરેન્સિક સાયન્સ લેબોરેટરી (FSL)માં તપાસ માટે મોકલવામાં આવ્યા છે અને તેમના કોલ ડિટેઇલ રેકોર્ડ્સ (CDR)ની પણ તપાસ કરવામાં આવી રહી છે. પોલીસ એ જાણવાનો પ્રયાસ કરી રહી છે કે પરિવારે આ આત્યંતિક પગલું કયા કારણોસર ભર્યું. હાલમાં આત્મહત્યા પાછળનું કારણ અકબંધ છે, પરંતુ પોલીસ દ્વારા સુસાઇડ નોટ મળી છે કે કેમ તે અંગે પણ તપાસ કરવામાં આવી રહી છે. પોલીસની અલગ અલગ ટીમો આ દિશામાં તપાસ કરી રહી છે.
સગર પરિવાર દ્વારા સામૂહિક આત્મહત્યાના પ્રયાસની ઘટનાથી સમગ્ર વડાલી શહેરમાં અને સગર સમાજમાં શોકનું મોજુ ફરી વળ્યું છે. હાલમાં લોકોમાં આ ઘટનાને લઈને અનેક અટકળો ચાલી રહી છે. પોલીસ દ્વારા તમામ સંભવિત કારણોને ધ્યાનમાં રાખીને તપાસ કરવામાં આવી રહી છે. મૃતક દંપતીના મૃતદેહને પોસ્ટમોર્ટમ માટે મોકલી દેવામાં આવ્યા છે અને ત્રણ બાળકોની તબિયત સુધરે તે માટે પ્રાર્થના કરવામાં આવી રહી છે.
ટોપ સ્ટોરી
ટ્રેન્ડિંગ સમાચાર
