Banaskantha News: ‘નલ સે જલ’ યોજના માત્ર કાગળ પર, ગુજરાતના વિસ્તારમાં દિવસે કાળી મજૂરી કર્યા બાદ પાણી માટે કલાકો લાઈનમાં ઉભી રહે છે મહિલાઓ

Banaskantha News: બનાસકાંઠાના અંતરિયાળ વિસ્તારોમા પાણી માટેના દાવા પોકળ સાબિત થયા છે. દાંતા તાલુકાના બાનોદરા ગામે 300 ઘરનાં પરિવારો પાણી માટે વલખાં મારી રહ્યા છે. બે હેડપંપથી આ લોકો હાલ પાણી મેળવી રહ્યા છે.

બનાસકાંઠાના અંતરિયાળ વિસ્તારોમા પાણીની તંગી

Banaskantha News: બનાસકાંઠાના અંતરિયાળ વિસ્તારોમા પાણી માટેના દાવા પોકળ સાબિત થયા છે. દાંતા તાલુકાના બાનોદરા ગામે 300 ઘરનાં પરિવારો પાણી માટે વલખાં મારી રહ્યા છે. બે હેડપંપથી આ લોકો હાલ પાણી મેળવી રહ્યા છે. આ વિસ્તારમાં નલ સે જલ યોજનાની માત્ર વાતો છે. આ યોજનાનો લાભ હજુય વિસ્તારમાં લોકોને મળ્યો નથી.

અંતરિયાળ વિસ્તારોમા પીવાના પાણીના પોકારો

દાંતા તાલુકાના અંતરિયાળ વિસ્તારોમા પીવાના પાણીના પોકારો સામે આવી રહ્યા છે.  હેડપંપ પર આદિવાસી મહિલાઓની પાણી ભરવા કતારો હોય છે. દિવસ ભરની મજૂરી બાદ પીવાના પાણી માટે લાઇનમા ઊભા રહેવું પડે છે. હેડપંપમાં પણ ધીરે ધીરે પાણી આવતા લોકો કલાકો સુધી લાઈનમાં ઊભા રહી પાણી ભરી રહ્યા છે.

નળમાં પાણી નથી હેડ પંપો સુકાઈ ગયા છે

દાંતા તાલુકામા અનેક ગામોમા નળ સે જળ યોજનામાં પાણીનાં ટાંકા બનાવ્યા છે. નળ નખાયા છે પરંતુ પાણી પહોંચ્યું નથી. નળ સે જળ યોજનાના નળ તો પહોંચ્યા છે.પરંતુ ટાંકા ખાલી છે.  નળમાં પાણી નથી હેડ પંપો સુકાઈ ગયા છે અને અન્ય કોઈ પાણીની વ્યવસ્થા નથી. જેથી અંતરિયાળ વિસ્તારના લોકોની માગણી છે કે યોજનાનું પાણી ઘર સુધી પહોંચે.

આ યોજનાઓ હજુ છેવાડાનાં ગામો સુધી પહોંચી નથી

સરકાર યોજનાઓ થકી પાણી માટે પ્રયાસ કરી રહી છે. જોકે આ યોજનાઓ હજુ છેવાડાનાં ગામો સુધી પહોંચી નથી. આ વિસ્તારોમાં પાણીના સુવિધા ન હોવાને કારણે હેડ પંપ પરથી પાણી ભરવું પડે છે અને લાઈનમાં ઊભા રહેવા માટે લોકો મજબૂર છે ત્યારે અંતરિયાળ વિસ્તારમાં અનેક ગામડાઓમાં પાણીની લાઈન માટેના દ્રશ્યો જોવા મળતા હોય છે અને પીવાના પાણી માટે લોકો વલખા મારતા જોવા મળી રહ્યા છે.

આ વિસ્તારનાં લોકો અનેકવાર રજૂઆત કરી ચૂક્યા છે

જો કે છેલ્લા કેટલાય વર્ષોથી પીવાના પાણીની વિકટ સમસ્યાથી ત્રાહિમામ પોકારી ઊઠયા છે. આ વિસ્તારનાં લોકો અનેકવાર રજૂઆત કરી ચૂક્યા છે પરંતુ હજુ સુધી કોઈ નક્કર કામગીરી પાણી માટે કરવામાં આવી નથી. તેથી લોકોની માગ છે કે, વહેલામાં વહેલી તકે પાણીની સમસ્યાનો હલ કરવામાં આવે, કારણ કે ઉનાળો જેમ આગળ વધશે તેમ તેમ હજુ પરિસ્થિતિ વિકટ બનશે.