નોટબંધી જેવો જ મોટો ઝાટકો આપશે મોદી સરકાર! ઘરમાં રાખેલી આ વસ્તુની જાણકારી આપવી પડશે

આ એમનેસ્ટી સ્કીમ હેઠળ ગોલ્ડની કિંમત નક્કી કરવા માટે વેલ્યુએશન સેન્ટરથી સર્ટિફિકેટ લેવું પડશે.

નવી દિલ્હીઃ મોદી સરકારે કાળાનાણાં વિરૂદ્ધ અભિયાન શરૂ કર્યું છે. નોટબંધી બાદ હવે ખોટી રીતે જમા કરવામાં આવેલ ગોલ્ડ (સોનું) પર ગાળીયો કસવાની તૈયારી છે. કહેવાય છે કે, નોટબંધી દરમિયાન મોટા પાયે લોકોએ ખોટી રીતે સોનામાં રોકાણ કર્યું હતું. હવે સરકાર કાળાનાણાંથી ખરીદવામાં આવેલ સોનું બહાર લાવાવની તૈયારીમાં છે. મળતી માહિતી પ્રમાણે ઇનકમ ટેક્સની એમનેસ્ટી સ્કીમને લઇને સોના માટે એમનેસ્ટી સ્કીમ લાવી શકે છે. એક નક્કી કરેલા પ્રમાણથી વધારે ચિઠ્ઠી વગરના સોનુ હોવા પર તેની જાણકારી આપવી પડશે અને સોનાની કિંમત સરકારને કહેવી પડશે. સુત્રો અનુસાર આ એમનેસ્ટી સ્કીમ હેઠળ ગોલ્ડની કિંમત નક્કી કરવા માટે વેલ્યુએશન સેન્ટરથી સર્ટિફિકેટ લેવું પડશે. રિસીપ્ટ વગરના જેટલા ગોલ્ડનો ખુલાસો થશે તેની પર એક નક્કી કરેલી કિંમતમાં ટેક્સ આપવો પડશે. આ સ્કીમ એક ખાસ સમય મર્યાદા માટે જ ખોલવામાં આવશે. સ્કીમ પૂરી થયા બાદ નક્કી કરેલા પ્રમાણથી વધારે પ્રમાણમાં સોનુ મળવા પર તેને મોટા પ્રમાણમાં દંડ કરવામાં આવશે. મંદિર અને ટ્રસ્ટની પાસે પડેલા ગોલ્ડને પણ પ્રોડક્ટિવ ઇન્વેસ્ટમેન્ટ તરીકે ઉપયોગ કરવા માટે ખાસ જાહેરાત થવાની શક્યતા છે. સૂત્રોના હવાલાથી મળતી જાણકારી મુજબ, એમનેસ્ટી સ્કીમની સાથોસાથ સોનાને અસેટ ક્લાસ તરીકે પ્રોત્સાહન આપવાની પણ જાહેરાત થઈ શકે છે. તેના માટે સોવરન ગોલ્ડ બૉન્ડ સ્કીમને આકર્ષક બનાવવા માટે મહત્વપૂર્ણ ફેરફાર કરવામાં આવી શકે છે. સોવરન ગોલ્ડ બૉન્ડ સર્ટિફિકેટને મોર્ગેજ કરવાનો પણ વિકલ્પ આપી શકાય છે અને ગોલ્ડ બોર્ડ બનાવવાની જાહેરાત કરવામાં આવી શકે છે. સરકારની સોનાને પ્રોડક્ટિવ ઇન્વેસ્ટમેન્ટ તરીકે વિકસિત કરવાની ઈચ્છા છે. તેના માટે આઈઆઈએમના પ્રોફેસરની ભલામણના આધારે મુસદ્દો તૈયાર કરવામાં આવ્યો છે. આ મામલે સુત્રો અનુસાર નાણા મંત્રાલયના ઇકોનોમિક અફેયર્સ વિભાગ અને રાજસ્વ વિભાગે મળીને આ સ્કીમનો પ્લાન તૈયાર કર્યો છે. નાણા મંત્રાલયે તેના પ્રસ્તાવ કેબિનેટ પાસે મોકલ્યો છે. ટૂંકમાં જ કેબિનેટની તેને મંજૂરી મળી શકે છે. ઓક્ટોબરથી બીજા અઠવાડિયામાં જ કેબિનેટમાં તેની પર ચર્ચા થવાની હતી. મહારાષ્ટ્ર અને હરિયાણાના રાજ્ય ચૂંટણીના કારણથી અંતિમ સમય પર નિર્ણય ટાળી દેવામાં આવ્યો હતો.