Election Result 2026: બે મુખ્યમંત્રી હાર્યા, ત્રણને મળી જીત, પાંચ રાજ્યોના ચૂંટણી પરિણામમાં મોટો ઉલટફેર
Election Result 2026: દેશના ચાર રાજ્યો અને એક કેન્દ્રશાસિત પ્રદેશમાં યોજાયેલી વિધાનસભા ચૂંટણીના પરિણામોએ રાજકીય પરિદૃશ્ય સંપૂર્ણપણે બદલી નાખ્યું છે.
Election Result 2026: દેશના ચાર રાજ્યો અને એક કેન્દ્રશાસિત પ્રદેશમાં યોજાયેલી વિધાનસભા ચૂંટણીના પરિણામોએ રાજકીય પરિદૃશ્ય સંપૂર્ણપણે બદલી નાખ્યું છે. પશ્ચિમ બંગાળમાં ભાજપે શાનદાર પ્રદર્શન કર્યું, પહેલી વાર સત્તા કબજે કરી. 206 બેઠકો જીતીને TMCને હરાવ્યું હતું. તમિલનાડુમાં પણ મોટી રાજકીય ઉથલપાથલ જોવા મળી હતી. તમિલનાડુમાં DMK ને મોટો ઝટકો લાગ્યો અને અભિનેતામાંથી રાજકારણી બનેલા વિજયનો પક્ષ સૌથી મોટા પક્ષ તરીકે ઉભરી આવ્યો. જોકે, સ્પષ્ટ બહુમતી ન હોવાને કારણે પાર્ટીને સરકાર બનાવવા માટે સાથી પક્ષો પર આધાર રાખવો પડશે. આસામમાં મુખ્યમંત્રી હિમંતા બિસ્વા સરમાના નેતૃત્વમાં ભાજપે સતત ત્રીજી વખત જીત મેળવીને પોતાની સ્થિતિ મજબૂત કરી છે. રાજ્યમાં NDAએ 102 બેઠકો મેળવી છે.
લાંબા સમયથી ડાબેરી પક્ષોનો ગઢ ગણાતા કેરળમાં કોંગ્રેસના નેતૃત્વ હેઠળના UDF એ શાનદાર પ્રદર્શન કર્યું છે, બહુમતી મેળવી છે અને સત્તામાં પાછા ફરવાના માર્ગે છે. દરમિયાન NDAએ પુડુચેરીમાં પોતાનો દબદબો જાળવી રાખ્યો છે, જેમાં મુખ્યમંત્રી એન. રંગાસામીના નેતૃત્વ હેઠળનું ગઠબંધન સતત બીજી વખત સરકાર બનાવવાની સ્થિતિમાં છે.
બંગાળમાં મમતા હારી ગયા
બધાની નજર પશ્ચિમ બંગાળની હાઇ-પ્રોફાઇલ ભવાનીપુર બેઠક પર હતી. અહીં ભાજપના સુવેન્દુ અધિકારીએ મુખ્યમંત્રી મમતા બેનર્જીને સીધો પડકાર ફેંક્યો હતો. ચૂંટણી પ્રચાર દરમિયાન આ સ્પર્ધા ખૂબ ચર્ચામાં રહી હતી. પરિણામોમાં સુવેન્દુ અધિકારીએ મમતા બેનર્જીને 15,000થી વધુ મતોથી હરાવ્યા જેનાથી એક મોટો રાજકીય સંદેશ ગયો. આ હારને TMC માટે પણ મોટો ફટકો માનવામાં આવી રહ્યો છે.
આસામમાં હિમંતા બિસ્વા જીત્યા
મુખ્યમંત્રી હિમંતા બિસ્વા સરમાએ ફરી એકવાર આસામની જલુકબારી બેઠક પર પોતાની લોકપ્રિયતા સાબિત કરી. તેમણે કોંગ્રેસના બિદિશા નિયોગને 89,000 મતોના મોટા માર્જિનથી હરાવ્યા. નોંધનીય છે કે તેમણે સતત પાંચમી વખત આ બેઠક જીતી છે, બે વાર કોંગ્રેસની ટિકિટ પર અને ત્રણ વખત ભાજપની ટિકિટ પર.
તમિલનાડુમાં એમકે સ્ટાલિન હારી ગયા
મુખ્યમંત્રી એમકે સ્ટાલિનને આ વખતે તમિલનાડુની કોલાથુર બેઠક પર હારનો સામનો કરવો પડ્યો. 2011, 2016 અને 2021માં સતત જીત મેળવનારા સ્ટાલિનને ટીવીકેના વીએસ બાબુએ હાર આપી, જેમણે 82,997 મત મેળવ્યા. સ્ટાલિનને કુલ 74,202 મત મળ્યા, જે આ મતવિસ્તારમાં સત્તા વિરોધી વલણ દર્શાવે છે.
કેરળમાં પિનરાઈ વિજયન ફરી જીત્યા
કેરળમાં મુખ્યમંત્રી પિનરાઈ વિજયન ધર્મડમ બેઠક જીતીને પોતાનો દબદબો જાળવી રાખ્યો. તેમણે કોંગ્રેસના વીપી અબ્દુલ રશીદને 19,000 થી વધુ મતોથી હરાવ્યા. જોકે, રાજ્યનો સત્તાનો માહોલ અલગ દેખાતો હતો, જેમાં યુડીએફ ગઠબંધન વાપસી કરી રહ્યું છે
આ પણ વાંચોઃ કેરળ ચૂંટણી 2026: 10 વર્ષ બાદ UDF ની શાનદાર વાપસી, જંગી જીત પર રાહુલ ગાંધીની પહેલી પ્રતિક્રિયા
પુડુચેરીમાં રંગાસામીનું વર્ચસ્વ
પુડુચેરીમાં મુખ્યમંત્રી એન. રંગાસામીએ થટ્ટનચાવડી અને મંગલમ બંને મતવિસ્તારો જીતીને પોતાની મજબૂત સ્થિતિ સાબિત કરી. થટ્ટનચાવડીમાં તેમણે NMKના E. Vinayagam ને 4,441 મતોથી હરાવ્યા, જ્યારે મંગલમમાં તેમણે DMKના S.S. રંગનને 7,050 મતોથી હરાવ્યા હતા.
ટોપ સ્ટોરી
ટ્રેન્ડિંગ સમાચાર
