કોકરોચ જનતા પાર્ટીની મોટી જાહેરાત: દિલ્હી બાદ હવે 11 જૂને આ શહેરમાં થશે ઉગ્ર વિરોધ પ્રદર્શન

Cockroach Janata Party protest: પાર્ટીના સ્થાપક અભિજીત દિપકેની જનતાને અપીલ; દિલ્હીના જંતર-મંતર પર સફળ પ્રદર્શન બાદ હવે મહારાષ્ટ્રમાં શિક્ષણ મંત્રી ધર્મેન્દ્ર પ્રધાનના રાજીનામાની માંગ ઉઠશે.

cockroach janata party pune protest abhijeet dipke minister resignation

Source : PTI

Show Quick Read

Key points generated by AI, verified by newsroom

• CJP સ્થાપક અભિજીત દિપકેએ પુણેમાં આગામી વિરોધની જાહેરાત કરી.
• શિક્ષણમંત્રીના રાજીનામા માટે 11 જૂને પુણે યુનિવર્સિટીમાં પ્રદર્શન.
• આ પહેલા 6 જૂને દિલ્હીમાં સફળ વિરોધ પ્રદર્શન થયું હતું.

Cockroach Janata Party protest: કોકરોચ જનતા પાર્ટી (CJP) ના સ્થાપક અભિજીત દિપકેએ દિલ્હીના જંતર-મંતર ખાતે સફળ વિરોધ પ્રદર્શન કર્યા બાદ, હવે પોતાનું બીજું વિરોધ પ્રદર્શન જાહેર કર્યું છે. આગામી 11 જૂનના રોજ મહારાષ્ટ્રના પુણેમાં આયોજિત આ પ્રદર્શનમાં દેશના શિક્ષણ મંત્રી ધર્મેન્દ્ર પ્રધાનના રાજીનામાની ઉગ્ર માંગ કરવામાં આવશે. આ માટે અભિજીત દિપકેએ લોકોને મોટી સંખ્યામાં જોડાવા અને શાંતિપૂર્ણ રીતે વિરોધ નોંધાવવા અપીલ કરી છે. દિલ્હી બાદ હવે પુણેમાં યુવાનો અને વિદ્યાર્થીઓ રસ્તા પર ઉતરીને શિક્ષણ વ્યવસ્થા સામે પોતાનો અવાજ બુલંદ કરશે.

પુણેમાં ક્યાં અને ક્યારે થશે પ્રદર્શન?

અભિજીત દિપકે અને તેમની પાર્ટીએ સોશિયલ મીડિયા પર પોસ્ટ કરીને આ વિરોધ પ્રદર્શનની સત્તાવાર જાહેરાત કરી છે. પોસ્ટમાં જણાવ્યા મુજબ, મહારાષ્ટ્રની 'શૈક્ષણિક રાજધાની' ગણાતા પુણે શહેરમાં કોકરોચ જનતા પાર્ટી દ્વારા શિક્ષણ મંત્રીના રાજીનામાની માંગ કરવામાં આવશે. આ પ્રદર્શન આગામી ગુરુવારે, 11 જૂનના રોજ સાંજે 4 વાગ્યે પુણેની પ્રખ્યાત સાવિત્રીબાઈ ફૂલે યુનિવર્સિટી ખાતે યોજાશે.

દિલ્હીના જંતર-મંતર પર યોજાયું હતું પહેલું પ્રદર્શન

અત્રે ઉલ્લેખનીય છે કે, કોકરોચ જનતા પાર્ટીની રચના થયા બાદ શનિવારે (6 જૂન) પાર્ટીએ દિલ્હીના જંતર-મંતર ખાતે પોતાનો પહેલો વિરોધ નોંધાવ્યો હતો. આ પ્રદર્શનમાં ભાગ લેવા માટે પાર્ટીના સ્થાપક અભિજીત દિપકે ખાસ અમેરિકાથી ભારત આવ્યા હતા. તેમની સાથે આ પ્રદર્શનમાં પ્રખ્યાત એન્જિનિયર, શિક્ષણ સુધારક અને પર્યાવરણ કાર્યકર્તા સોનમ વાંગચુક પણ જોડાયા હતા.

કોકરોચ માસ્ક અને ફૂલો સાથે અનોખો વિરોધ

દિલ્હીના આ પ્રદર્શનમાં સેંકડો લોકો ઉમટી પડ્યા હતા, જેમાં મોટાભાગે યુવાનો, યુવા પ્રોફેશનલ્સ અને વિદ્યાર્થીઓ હતા. ઘણા લોકોએ મોઢા પર કોકરોચના માસ્ક પહેર્યા હતા અને હાથમાં ફૂલો રાખ્યા હતા. એટલું જ નહીં, શાળાના બાળકો પણ તેમના માતા-પિતા સાથે આ અનોખા વિરોધમાં જોડાયા હતા અને શિક્ષણ મંત્રીના રાજીનામાની માંગ કરી હતી.

શાંતિ અને પોલીસનું સન્માન જાળવવા અપીલ

પોતાની તાજેતરની અપીલમાં અભિજીત દિપકેએ ફરી એકવાર સ્પષ્ટ કર્યું છે કે વિરોધ પ્રદર્શન સંપૂર્ણપણે શાંતિપૂર્ણ હોવું જોઈએ. તેમણે ખાસ ભાર મૂક્યો છે કે પ્રદર્શન દરમિયાન કોઈએ પણ કાયદો હાથમાં ન લેવો અને ફરજ પર હાજર પોલીસ અધિકારીઓ સાથે આદરપૂર્વક વર્તન કરવું. દિલ્હીના સફળ પ્રદર્શન બાદ અભિજીતે એક મહત્વપૂર્ણ જાહેરાત કરી હતી, જેના ભાગરૂપે હવે પુણેમાં આ કાર્યક્રમ યોજાવા જઈ રહ્યો છે.