દિલ્લી બની ગેસ ચેમ્બર, AQI ગંભીર સ્તરે, વિઝિબિલિટી શૂન્ય, 169 ફ્લાઇટ લેઇટ
દિલ્હીમાં AQI ખતરનાક સ્તરે પહોંચી ગયો છે, વિઝિબિલિટી શૂન્ય થઇ ગઇ છે. જેના કારણે 169 ફ્લાઇટ મોડી થઇ છે.
Delhi Air Pollution:રવિવારે (14 ડિસેમ્બર) દિલ્હીમાં હવા ગુણવત્તા સૂચકાંક 461 પર પહોંચી ગયો, જે શિયાળાનો સૌથી પ્રદૂષિત દિવસ અને ડિસેમ્બરનો બીજો સૌથી ખરાબ દિવસ બન્યો. રોહિણી અને વઝીરપુર જેવા વિસ્તારોમાં AQI 500 ની નજીક નોંધાયું. નવી દિલ્હી અને નોઈડા સહિત સમગ્ર NCRમાં જાહેર આરોગ્ય, ટ્રાફિક અને રોજિંદા જીવન પર પ્રદૂષણના આ ગંભીર સ્તરની અસર સ્પષ્ટપણે દેખાઈ રહી હતી.
પ્રદૂષણની સ્થિતિ અને રેકોર્ડ સ્તર
કેન્દ્રીય પ્રદૂષણ નિયંત્રણ બોર્ડના જણાવ્યા મુજબ, ધીમી પવનની ગતિ અને નીચા તાપમાને પ્રદૂષકો વાતાવરણમાં વિખેરાઈ જવાને બદલે સપાટીની નજીક ફસાઈ ગયા. વઝીરપુર હવા ગુણવત્તા મોનિટરિંગ સ્ટેશને દિવસ દરમિયાન મહત્તમ AQI 500 નોંધ્યું હતું, ત્યારબાદ CPCB હવે ડેટા રેકોર્ડ કરતું નથી. CPCBની SAMEER એપ અનુસાર, સાંજે 4 વાગ્યા સુધીમાં, દિલ્હીના 39 એક્ટિવ મોનિટરિંગ સ્ટેશનોમાંથી 38 પર હવાની ગુણવત્તા "ગંભીર" શ્રેણીમાં રહી, જ્યારે શાદીપુરમાં "ખૂબ જ ખરાબ" શ્રેણીમાં નોંધાઈ.
રોહિણીમાં પણ દિવસ દરમિયાન 500 AQI નોંધાયું, જ્યારે અશોક વિહાર, જહાંગીરપુરી અને મુંડકામાં 499 નોંધાયું. રાજધાનીમાં ગાઢ ધુમ્મસ છવાઈ ગયું, અને સરેરાશ AQI, જે અગાઉના દિવસે 432 હતું, અચાનક રેકોર્ડ સ્તરે પહોંચી ગયું. એપ્રિલ 2015 માં મોનિટરિંગ સિસ્ટમ શરૂ થઈ ત્યારથી, ડિસેમ્બરમાં પ્રદૂષણ સૌથી વધુ ગંભીર બન્યું છે, તે 21 ડિસેમ્બર, 2017 ના રોજ હતું, જ્યારે સરેરાશ AQI 469 પર પહોંચ્યો હતો.
15 ડિસેમ્બર સુધીમાં, સરદાર પટેલ માર્ગનો AQI 483, પંડિત પંત માર્ગ 417, બારખંભા રોડ 474, અક્ષરધામ વિસ્તાર 493, દ્વારકા સેક્ટર-14 469 અને બારાપુલ્લા ફ્લાયઓવર પર 433 છે.
હવાઈ ટ્રાફિક ગંભીર રીતે પ્રભાવિત
ધુમ્મસ અને ઓછી વિઝિબિલિટીના કારણે, ઇન્ડિગો એરલાઇન્સે મુસાફરો માટે એક એડવાઇઝરી જાહેર કરી છે. એરપોર્ટની આસપાસ ઓછી વિઝિબિલિટીના કારણે 169 ફ્લાઇટ્સ મોડી પડી છે. રવિવારે, દિલ્હીમાં સરેરાશ AQI 461 નોંધાયું હતું, જે તેને સિઝનના સૌથી પ્રદૂષિત દિવસોમાંનો એક બનાવ્યો છે. નોઇડા NCRમાં સૌથી વધુ પ્રદૂષણ નોંદાયું છે, જેનો AQI 466 છે. ગાઝિયાબાદમાં 459, ગ્રેટર નોઇડામાં 435 અને ગુરુગ્રામમાં 291 નોંધાયું હતું. ફરીદાબાદની હવાની ગુણવત્તા તુલનાત્મક રીતે સારી હતી, જેનો AQI 218 હતો
સ્વાસ્થ્ય પર અસર અને નિષ્ણાતોની ચેતવણી
આરોગ્ય નિષ્ણાતોએ પ્રદૂષિત હવાના લાંબા સમય સુધી સંપર્કમાં રહેવાથી ગંભીર સ્વાસ્થ્ય જોખમોની ચેતવણી આપી છે. નિષ્ણાત શીલા યાદવે જણાવ્યું હતું કે, જ્યારે AQI સ્તર 300 થી 400 ની વચ્ચે રહે છે, અને ક્યારેક 450 થી વધુ હોય છે, ત્યારે લોકોએ બહાર જવાનુ ટાળવું જોઇએ,
પ્રદૂષિત હવામાં રહેલા PM 2.5 જેવા સૂક્ષ્મ કણો ફેફસાંમાં ઊંડે સુધી પ્રવેશી શકે છે, જેનાથી શ્વસન રોગોનું જોખમ વધી જાય છે. શીલા યાદવે લોકોને સલાહ આપી હતી કે જ્યારે ખૂબ જ જરૂરી હોય ત્યારે જ બહાર નીકળો, ઊંડા શ્વાસ લેવાની જરૂર હોય તેવી પ્રવૃત્તિઓ ટાળો અને શરીરમાંથી ઝેરી તત્વો બહાર કાઢવા માટે સંતુલિત આહાર લો. આ માટે પુષ્કળ પાણી પીવા અને મોસમી ફળો ખાવાનો આગ્રહ રાખો.
ટોપ સ્ટોરી
ટ્રેન્ડિંગ સમાચાર
