દિલ્હી જ નહીં, દેશના આ મોટા રાજ્યોમાં પણ કોંગ્રેસનો થયો છે સફાયો, એક ધારાસભ્ય નથી

દિલ્હી સહિત 4 રાજ્યોમાં કોંગ્રેસ ખાતું ખોલાવી શકી નથી, આંધ્ર અને બંગાળ જેવા મોટા રાજ્યો પણ બાકાત નથી.

દિલ્હી જ નહીં, દેશના આ મોટા રાજ્યોમાં પણ કોંગ્રેસનો થયો છે સફાયો

Source : PTI

Congress Zero Seats in Assembly Elections: દિલ્હી વિધાનસભા ચૂંટણીમાં કોંગ્રેસ ફરી એકવાર ખાતું ખોલાવવામાં નિષ્ફળ રહી છે અને શૂન્ય બેઠકો પર સમેટાઈ ગઈ છે. જો કે, કોંગ્રેસ માટે આ કોઈ નવી વાત નથી. દેશમાં અન્ય 4 રાજ્યો એવા છે જ્યાં કોંગ્રેસ વિધાનસભામાં શૂન્ય પ્રતિનિધિત્વ ધરાવે છે. આ રાજ્યોમાં આંધ્ર પ્રદેશ અને પશ્ચિમ બંગાળ જેવા મોટા અને રાજકીય રીતે મહત્વપૂર્ણ રાજ્યોનો પણ સમાવેશ થાય છે.

દિલ્હીની જનતાએ આ વખતે આમ આદમી પાર્ટી અને ભારતીય જનતા પાર્ટીને સમર્થન આપ્યું, પરંતુ કોંગ્રેસ માટે સ્થિતિ યથાવત રહી. 70 વિધાનસભા બેઠકો ધરાવતી દિલ્હીમાં કોંગ્રેસને ફરી શૂન્ય બેઠકો મળી. પરંતુ દિલ્હી એકમાત્ર એવું રાજ્ય નથી જ્યાં કોંગ્રેસ ધારાસભ્ય વિનાની છે.

દેશના ઓછામાં ઓછા 4 રાજ્યો એવા છે જ્યાં કોંગ્રેસ પાસે એક પણ ધારાસભ્ય નથી, જેમાં આંધ્રપ્રદેશ અને પશ્ચિમ બંગાળ જેવા નોંધપાત્ર રાજ્યો પણ સામેલ છે.

આંધ્ર પ્રદેશ વિધાનસભા: 175 બેઠકો, કોંગ્રેસ શૂન્ય

આંધ્રપ્રદેશમાં મે 2024માં યોજાયેલી વિધાનસભા ચૂંટણીમાં કોંગ્રેસે પુરી તાકાત લગાવી હોવા છતાં, એક પણ બેઠક જીતવામાં સફળતા મળી નથી. મોટાભાગના કોંગ્રેસી ઉમેદવારો કાં તો ત્રીજા સ્થાને રહ્યા અથવા તો તેમની ડિપોઝીટ પણ બચાવી શક્યા નહીં.

આંધ્રપ્રદેશ વિધાનસભામાં એનડીએ ગઠબંધન પાસે 164 ધારાસભ્યોનું જંગી બહુમતી છે, જ્યારે વિપક્ષ વાયએસઆર પાસે માત્ર 11 ધારાસભ્યો છે. નોંધપાત્ર બાબત એ છે કે 2014 સુધી આંધ્રપ્રદેશમાં કોંગ્રેસનું શાસન હતું.

પશ્ચિમ બંગાળ વિધાનસભા: કોંગ્રેસ ફરી શૂન્ય પર

પશ્ચિમ બંગાળ વિધાનસભામાં કુલ 294 બેઠકો છે. મે 2021માં યોજાયેલી ચૂંટણીમાં કોંગ્રેસે ડાબેરી મોરચા સાથે ગઠબંધન કરીને ચૂંટણી લડી હતી, પરંતુ સફળતા મળી નહોતી. બંગાળના રાજકીય ઇતિહાસમાં પહેલીવાર કોંગ્રેસ વિધાનસભામાં શૂન્ય પર પહોંચી ગઈ. હાલમાં, પશ્ચિમ બંગાળમાં તૃણમૂલ કોંગ્રેસની સરકાર છે, જેની પાસે 224 ધારાસભ્યો છે, જ્યારે વિપક્ષમાં ભાજપ પાસે 66 ધારાસભ્યો છે.

વર્ષ 2022માં કોંગ્રેસે મુર્શિદાબાદની સાગરદિઘી બેઠક પેટાચૂંટણીમાં જીતી હતી, પરંતુ તે ધારાસભ્ય પણ બાદમાં તૃણમૂલ કોંગ્રેસમાં જોડાઈ ગયા. ત્યારથી બંગાળમાં યોજાયેલી તમામ પેટાચૂંટણીમાં કોંગ્રેસને હારનો સામનો કરવો પડ્યો છે.

સિક્કિમ વિધાનસભા: NDAનો સંપૂર્ણ કબજો

સિક્કિમ વિધાનસભામાં કુલ 32 બેઠકો છે. એક સમયે સિક્કિમમાં કોંગ્રેસ મજબૂત સ્થિતિમાં હતી, પરંતુ આજે સ્થિતિ એવી છે કે પાર્ટી પાસે એક પણ ધારાસભ્ય નથી. સિક્કિમમાં પણ કોંગ્રેસ ખાતું ખોલાવી શકી નથી. રાજ્યની તમામ 32 બેઠકો સિક્કિમ ક્રાંતિકારી મોરચા (એસકેએમ) પાસે છે, જે ભાજપ સાથે ગઠબંધનમાં છે.

નાગાલેન્ડ વિધાનસભા: કોંગ્રેસ ફરી ખાલી હાથે

નાગાલેન્ડ વિધાનસભામાં કુલ 60 બેઠકો છે. ફેબ્રુઆરી 2023માં યોજાયેલી વિધાનસભા ચૂંટણીમાં કોંગ્રેસ પાર્ટી એક પણ બેઠક જીતી શકી નથી. નાગાલેન્ડમાં નેશનાલિસ્ટ ડેમોક્રેટિક પ્રોગ્રેસિવ પાર્ટી (એનડીપીપી) પાસે 25, ભાજપ પાસે 12, રાષ્ટ્રવાદી કોંગ્રેસ પાર્ટી (એનસીપી) પાસે 7, નેશનલ પીપલ્સ પાર્ટી (એનપીપી) પાસે 5, લોક જનશક્તિ પાર્ટી (રામવિલાસ) (એલજેપી (આર)) પાસે 2, અને રિપબ્લિકન પાર્ટી ઓફ ઈન્ડિયા (આરપીઆઈ) પાસે 2 ધારાસભ્યો છે.

આ ઉપરાંત, નાગાલેન્ડમાં નાગા પીપલ્સ ફ્રન્ટ (એનપીએફ) પાસે 2 અને 5 અપક્ષ ધારાસભ્યો પણ છે. રસપ્રદ વાત એ છે કે નાગાલેન્ડમાં તમામ મુખ્ય પક્ષો સરકારમાં સહભાગી છે અને કોઈ સત્તાવાર વિરોધ પક્ષ નથી.

આ પણ વાંચો....