Kusum Yojana નો લાભ લેવા માટે પહેલા 5600 રૂપિયા ભરવા પડશે ? જાણો મોદી સરકારે શું ખુલાસો કર્યો

સોશિયલ મીડિયા પર એક ફોટો શેર કરવામાં આવી રહ્યો છે. જેને કુસુમ યોજનાના લેટરપેડની જેમ ડિઝાઇન કરવામાં આવ્યો છે. વળી, તેમાં અશોક સ્તંભ પણ છે, જે સરકારી દસ્તાવેજો જેવો લાગે છે.

(તસવીરનો ઉપયોગ પ્રસ્તુતિકરણ માટે કરવામાં આવ્યો છે)

નવી દિલ્હીઃ સોશિયલ મીડિયા પર અવાર નવાર કોઈને કોઈ ખબર વાયરલ થતી હોય છે. જેમાંની ઘણી ભ્રામક હોય છે. હાલ કેન્દ્ર સરકારની કુસુમ યોજના વિશે માહિતી શેર કરવામાં આવી રહી છે. જેમાં કુસુમ યોજના વિશે માહિતી આપવા સાથે કાનુની ચાર્જ રૂપે 5600 રૂપિયા આપવાનું કહેવામાં આવી રહ્યું છે. ઉપરાંત, આ માહિતી સરકારી દસ્તાવેજોની જેમ ડિઝાઇન કરવામાં આવી છે. આવી સ્થિતિમાં માહિતી સાચી છે કે નહીં તે જાણવું જરૂરી છે. સોશિયલ મીડિયા પર એક ફોટો શેર કરવામાં આવી રહ્યો છે. જેને કુસુમ યોજનાના લેટરપેડની જેમ ડિઝાઇન કરવામાં આવ્યો છે. વળી, તેમાં અશોક સ્તંભ પણ છે, જે સરકારી દસ્તાવેજો જેવો લાગે છે. આ ફોટો અંગ્રેજી અને હિન્દીમાં લખ્યો છે, 'કુસુમ યોજના અંતર્ગત, ખેડૂતોને સૌર ઉર્જા ઉપકરણો સ્થાપિત કરવા માટે માત્ર 10 ટકા રકમ ચૂકવવાની રહેશે. સરકાર 90 ટકા ખર્ચ ખેડૂતોને સબસિડી તરીકે આપશે. આ સાથે આ પત્રમાં પ્રોજેક્ટ વિશે માહિતી પણ આપવામાં આવી છે. જેમાં કહેવામાં આવ્યું છે કે આ યોજના માટે તમારે કાનૂની ચાર્જ માટે 5600 રૂપિયા ચૂકવવા પડશે. આ ઉપરાંત કેટલાક બેંક ખાતાના નંબર પણ આપવામાં આવ્યા છે અને લોકોને પૈસા માંગવામાં આવી રહ્યા છે. આ મેસેજ વાયરલ થયા બાદ પીઆઈબી ફેક્ટ ચેકે સ્પષ્ટતા કરી હતી. પીઆઈબી ફેક્ટચેકે ટ્વીટ કરીને લખ્યું, નવી અને પુનઃપ્રાપ્ય ઉર્જા મંત્રાલયે જાહેર કરેલા મંજૂરી પત્રમાં જણાવ્યું છે કે કુસુમ યોજના હેઠળ સોલાર પમ્પ સ્થાપિત કરવાના કાયદાકીય ચાર્જના બહાને રૂ. 56૦૦ માંગવામાં આવી રહ્યા છે. આ પત્ર નકલી છે. મંત્રાલયે આવો કોઈ મંજૂરી પત્ર જાહેર કર્યો નથી.

પીઆઈબી ફેક્ટ ચેક કેન્દ્ર સરકારની પોલિસી- સ્કીમ, વિભાગો, મંત્રાલયોને લઈને ફેલાતી ખોટી સૂચનાઓને રોકવા માટેનું કામ કરે છે. સરકારથી જોડાયેલી કોઈ પણ ખબર સાચી છે કે ખોટી તે જાણવા માટે પીઆઈબી ફેક્ટ ચેકની મદદ લઈ શકાય છે. પીઆઈબી ફેક્ટ ચેકને કોઈ પણ શંકાસ્પદ સમાચારનો સ્ક્રિનશોટ, ટ્વિટ, ફેસબુક પોસ્ટ અથવા યુઆરએલ વોટ્સએપ નંબર 918799711259 પર મોકલી શકો છો અથવા pibfactcheck@gmail.com પર મેઈલ કરી શકો છો.