પાકિસ્તાન પર ભારતનો બદલો શરૂ: લાહોર પર ડ્રોન હુમલો, પાકિસ્તાનના નિષ્ફળ પ્રયાસોનો જડબાતોડ જવાબ
પાકિસ્તાનના જમ્મૂ, રાજસ્થાન, પંજાબ પર ડ્રોન-મિસાઈલ હુમલાના પ્રયાસોને ભારતે S-400 સિસ્ટમથી નિષ્ફળ બનાવ્યા બાદ કાર્યવાહી, રાજસ્થાન-પંજાબ-જમ્મુ કશ્મીરના ઘણા વિસ્તારોમાં બ્લેકઆઉટ યથાવત.
India drone attack on Lahore: જમ્મુ અને કાશ્મીરના પહેલગામમાં થયેલા આતંકવાદી હુમલા બાદ ભારત અને પાકિસ્તાન વચ્ચે તણાવ ચરમસીમાએ છે. પાકિસ્તાન દ્વારા ભારતીય ક્ષેત્રમાં મિસાઈલ અને ડ્રોન હુમલાના નિષ્ફળ પ્રયાસો બાદ, ભારતે હવે પાકિસ્તાન પર વળતો પ્રહાર કરવાનું શરૂ કર્યું છે. આ કાર્યવાહીના ભાગરૂપે, ભારતે પાકિસ્તાનના લાહોર શહેરને નિશાન બનાવી ડ્રોન હુમલો કર્યો હોવાના અહેવાલો છે.
પાકિસ્તાન દ્વારા જમ્મુ, રાજસ્થાન અને પંજાબના ઘણા વિસ્તારોમાં ડ્રોન અને મિસાઈલ દ્વારા હુમલા કરવાનો નિષ્ફળ પ્રયાસ કરવામાં આવ્યો હતો, જેનો ભારતીય વાયુ સંરક્ષણ પ્રણાલીએ યોગ્ય જવાબ આપીને નિષ્ફળ બનાવ્યો. ભારતે તેની કાઉન્ટર ડ્રોન સિસ્ટમ અને S-400 જેવી અત્યાધુનિક સંરક્ષણ પ્રણાલીનો ઉપયોગ કરીને પાકિસ્તાનની બધી મિસાઈલોને આકાશમાં જ તોડી પાડી.
પાકિસ્તાની ફાઈટર જેટ પણ તોડી પાડ્યા
મિસાઈલો ઉપરાંત, ભારતે પાકિસ્તાનના ઘણા ફાઈટર જેટને પણ તોડી પાડ્યા છે. ભારતીય વાયુસેનાએ પાકિસ્તાનના બે સૌથી અદ્યતન ફાઇટર જેટ JF-17 અને એક F-16 ફાઈટર જેટ સહિત કુલ ત્રણ લડાકુ વિમાનોને તોડી પાડ્યા. આ પાકિસ્તાની લડાકુ વિમાનો ભારતીય હવાઈ ક્ષેત્રમાં ઘૂસવાનો પ્રયાસ કરી રહ્યા હતા, જેને ભારતીય સુરક્ષા દળોએ સફળતાપૂર્વક રોકીને તોડી પાડ્યા.
લાહોર પર ભારતનો ડ્રોન હુમલો: બદલાની શરૂઆત?
પાકિસ્તાનના આ ઉશ્કેરણીજનક અને નિષ્ફળ પ્રયાસોનો ભારતે હવે વળતો જવાબ આપવાનું શરૂ કર્યું છે. પાકિસ્તાનના લાહોર શહેર પર ભારતે ડ્રોન હુમલો કર્યો હોવાના અહેવાલો આવી રહ્યા છે. આ કાર્યવાહીને પાકિસ્તાનના મિસાઈલ હુમલાના નિષ્ફળ પ્રયાસોનો જડબાતોડ જવાબ માનવામાં આવે છે અને ભારત દ્વારા પાકિસ્તાન સામે બદલો લેવાની શરૂઆત તરીકે જોવામાં આવી રહી છે.
બ્લેકઆઉટની સ્થિતિ અને રક્ષા મંત્રીની નજર
હાલમાં જમ્મુ શહેરમાં વીજળી પુરવઠો પુનઃસ્થાપિત કરવામાં આવ્યો છે, પરંતુ રાજસ્થાન, પંજાબ તેમજ જમ્મુ અને કાશ્મીરના ઘણા સરહદી વિસ્તારોમાં હજુ પણ અંધારપટ (બ્લેકઆઉટ) છવાઈ ગયો છે, જે સુરક્ષાની ગંભીરતા દર્શાવે છે. પાકિસ્તાન સામે ભારતની આ જવાબી કાર્યવાહી અને સરહદ પરની ગતિવિધિઓ વચ્ચે, સંરક્ષણ પ્રધાન રાજનાથ સિંહ ચીફ ઓફ ડિફેન્સ સ્ટાફ (CDS) અને ત્રણેય સેનાના વડાઓ સાથે સતત સંપર્કમાં રહીને પરિસ્થિતિ પર નજર રાખી રહ્યા છે.
લાહોર પર થયેલો કથિત ડ્રોન હુમલો દર્શાવે છે કે ભારત પાકિસ્તાનના કોઈપણ દુષ્કૃત્યનો યોગ્ય અને સખત જવાબ આપવા માટે તૈયાર છે. સરહદ પરનો તણાવ હજુ યથાવત છે અને આગામી સમયમાં પરિસ્થિતિ કયો વળાંક લે છે તે જોવું મહત્વપૂર્ણ રહેશે.
ટોપ સ્ટોરી
ટ્રેન્ડિંગ સમાચાર
