Indian Student Death: અમેરિકામાં ગૂમ થયેલા વિદ્યાર્થી સાકેતનો 6 દિવસ બાદ મળ્યો મૃતદેહ
Indian Student Death:ગુમ થયેલા ભારતીય વિદ્યાર્થી સાકેત શ્રીનિવાસૈયાનો મૃતદેહ અમેરિકાના કેલિફોર્નિયામાં મળી આવ્યો છે. ભારતીય કોન્સ્યુલેટે આ મામલે પરિવારને શક્ય તમામ મદદ કરવાની ખાતરી આપી છે.
Indian Student Death:9 ફેબ્રુઆરીથી અમેરિકામાં ગુમ થયેલા 22 વર્ષીય ભારતીય વિદ્યાર્થી સાકેત શ્રીનિવાસૈયાનો મૃતદેહ મળી આવ્યો છે. સાન ફ્રાન્સિસ્કો સ્થિત ભારતીય કોન્સ્યુલેટે રવિવારે આ વાતની પુષ્ટિ કરી છે. સાકેત શ્રીનિવાસૈયા કર્ણાટકના ટુમકુર જિલ્લાનો રહેવાસી હતો અને કેલિફોર્નિયા યુનિવર્સિટી, બર્કલેમાં અનુસ્નાતકનો અભ્યાસ કરી રહ્યો હતો. તેને છેલ્લે કેલિફોર્નિયામાં ટિલ્ડેન રિજનલ પાર્ક નજીક એક તળાવ પાસે જોવા મળ્યો હતો.
ભારતીય કોન્સ્યુલેટે સોશિયલ મીડિયા પ્લેટફોર્મ X પર જણાવ્યું હતું કે સ્થાનિક પોલીસે સાકેતના મૃતદેહ મળ્યાંની પુષ્ટિ કરી છે. દૂતાવાસે તેના પરિવાર પ્રત્યે ઊંડી સંવેદના વ્યક્ત કરી હતી અને કહ્યું હતું કે, તેઓ આ મુશ્કેલ સમયમાં તેમની સાથે ઉભા છે. દૂતાવાસે એમ પણ કહ્યું હતું કે તેઓ સ્થાનિક અધિકારીઓ સાથે સંકલન કરી રહ્યા છે અને મૃતદેહને ભારત પરત લાવવાની પ્રક્રિયામાં તમામ શક્ય સહાય પૂરી પાડશે. કોન્સ્યુલર અધિકારીઓ પરિવાર સાથે સંપર્કમાં છે અને જરૂરી ઔપચારિકતાઓમાં મદદ કરી રહ્યા છે.
પરિવારે મદદ માંગી
સાકેતના પિતાએ જણાવ્યું કે, તેમણે છેલ્લે 9 ફેબ્રુઆરીએ તેમના પુત્ર સાથે વાત કરી હતી. તેમનો પુત્ર ગુમ થયા પછી, પરિવારે તેના મિત્રો અને રૂમમેટનો સંપર્ક કર્યો. જ્યારે કોઈ માહિતી મળી નહીં, ત્યારે બર્કલે પોલીસ વિભાગમાં ફરિયાદ દાખલ કરવામાં આવી. 13 ફેબ્રુઆરીએ, સાકેતના માતા-પિતાએ પણ કર્ણાટક સરકાર પાસે મદદ માંગી. કર્ણાટક સરકારે વિદેશ મંત્રાલયને હસ્તક્ષેપ કરવા અને શક્ય તમામ સહાય પૂરી પાડવા વિનંતી કરી.
સાકેતની શૈક્ષણિક લાયકાત
સાકેત યુનિવર્સિટી ઓફ કેલિફોર્નિયા, બર્કલેમાં પ્રોડક્ટ ડેવલપમેન્ટ પ્રોગ્રામમાં માસ્ટર ઓફ સાયન્સનો અભ્યાસ કરી રહ્યો હતો. આ પહેલા, તેમણે IIT મદ્રાસમાંથી કેમિકલ એન્જિનિયરિંગમાં B.Tech ડિગ્રી મેળવી હતી.
અમેરિકાના કેલિફોર્નિયાનો 22 વર્ષીય વિદ્યાર્થી સાકેત શ્રીનિવાસૈયા છ દિવસથી ગુમ હતો. તેના પરિવારે તેને શોધવા માટે સરકારને અપીલ કરી હતી. છ દિવસની શોધખોળ બાદ આજે સાકેતનો મૃતદેહ મળી આવ્યો હતો. સાન ફ્રાન્સિસ્કો સ્થિત ભારતીય કોન્સ્યુલેટ દ્વારા આ વાતની પુષ્ટિ કરવામાં આવી હતી. કોન્સ્યુલેટે પરિવારને તેના સમર્થનની ખાતરી આપી છે. તેના મૃતદેહને ભારત પરત લાવવાની તૈયારીઓ પણ શરૂ કરી દેવામાં આવી છે. સાકેત છેલ્લે 9 ફેબ્રુઆરીએ યુનિવર્સિટી કેમ્પસથી લગભગ એક કિલોમીટર દૂર જોવા મળ્યો હતો. ત્યારથી તે ગુમ હતો. તેના ગુમ થયા પછી તરત જ મોટા પાયે શોધખોળ અભિયાન શરૂ કરવામાં આવ્યું હતું. જોકે, પાર્ક પાસે સાકેતની એક બેગ મળી હતી જેમાં પાસપોર્ટ પણ હતો.
ટોપ સ્ટોરી
ટ્રેન્ડિંગ સમાચાર
