ટ્રાન્સફર પોસ્ટિંગ કેસમાં પૂર્વ મુખ્યમંત્રી દેવેન્દ્ર ફડણવીસની બે કલાક પૂછપરછ કરાઇ, જાણો શું છે કેસ?

ટ્રાન્સફર પોસ્ટિંગ કેસમાં મુંબઈ સાયબર પોલીસની એક ટીમે મહારાષ્ટ્રના પૂર્વ મુખ્યમંત્રી અને વિપક્ષના નેતા દેવેન્દ્ર ફડણવીસની બે કલાક સુધી પૂછપરછ કરી હતી.

મુંબઇઃ ટ્રાન્સફર પોસ્ટિંગ કેસમાં મુંબઈ સાયબર પોલીસની એક ટીમે મહારાષ્ટ્રના પૂર્વ મુખ્યમંત્રી અને વિપક્ષના નેતા દેવેન્દ્ર ફડણવીસની બે કલાક સુધી પૂછપરછ કરી હતી. પૂછપરછ બાદ દેવેન્દ્ર ફડણવીસે ભાજપના નેતાઓ સાથે બેઠક પણ કરી હતી. આ બેઠકમાં પ્રવીણ દારકર, કિરીટ સોમૈયા, નિતેશ રાણે, મનોજ કોટક સહિત અનેક નેતાઓ હાજર રહ્યા હતા.

દેવેન્દ્ર ફડણવીસે જણાવ્યું હતું કે ટ્રાન્સફર પોસ્ટિંગ કેસમાં પોલીસની એક ટીમે મારું નિવેદન નોંધ્યું હતું. મેં બધા પ્રશ્નોના જવાબ આપ્યા. મહારાષ્ટ્ર સરકાર છેલ્લા છ મહિનાથી આ મામલાને ફગાવી રહી હતી. હું આ બાબતનો વ્હિસલબ્લોઅર છું.

A police team recorded my statement in the transfer, posting case. I answered all questions. Maharashtra govt had been brushing aside the case for the past six months. I am a whistleblower of this case: Former Maharashtra chief minister and BJP leader Devendra Fadnavis pic.twitter.com/JKO9cpGWGG

— ANI (@ANI) March 13, 2022

ઓફિશિયલ સિક્રેટ એક્ટ હેઠળ દાખલ કેસમાં મુંબઈ સાયબર પોલીસે મહારાષ્ટ્રના પૂર્વ સીએમ ફડણવીસને સમન્સ પાઠવ્યા હતા. સમન્સમાં તેમને આજે BKC પોલીસ સ્ટેશનના પહેલા માળે સ્થિત સાયબર પોલીસ સ્ટેશનમાં હાજર રહેવા માટે કહેવામાં આવ્યું હતું. જોકે, બાદમાં મુંબઈ પોલીસનું સાયબર યુનિટ ફડણવીસના મલબાર હિલ ખાતેના સરકારી બંગલા પર પહોંચ્યું અને તેમનું નિવેદન નોંધ્યું.

આ મામલો એક વર્ષ જૂનો છે જ્યારે માર્ચ 2021 માં, ફડણવીસે એક પ્રેસ કોન્ફરન્સ દરમિયાન પોલીસ વિભાગમાં ટ્રાન્સફર પોસ્ટિંગ અંગે ઘણા સવાલ ઉઠાવ્યા હતા. દેવેન્દ્ર ફડણવીસે આ મામલે ટ્વિટ કરીને કહ્યું હતું કે તેમને જોઈન્ટ સીપી ક્રાઈમનો ફોન આવ્યો છે, જેમાં તેમણે કહ્યું હતું કે મારે BKC પોલીસ સ્ટેશન જવાની જરૂર નથી. જરૂરી માહિતી એકત્ર કરવા માટે ટીમ ઘરે આવશે. હું મારા નિવાસસ્થાને રહીશ. તેઓ ગમે ત્યારે આવી શકે છે. જય હિંદ, જય મહારાષ્ટ્ર!

ફડણવીસ પર આ આરોપ છે

મહારાષ્ટ્રના પૂર્વ સીએમ પર આરોપ છે કે ફડણવીસ કેન્દ્ર સરકારના કેન્દ્રીય ગૃહ સચિવને મળ્યા હતા અને પોલીસ ટ્રાન્સફર સંબંધિત કેટલાક ગુપ્ત દસ્તાવેજો કેન્દ્રીય ગૃહ સચિવને સોંપ્યા હતા. આ પછી બે દિવસમાં મુંબઈ પોલીસે દેવેન્દ્ર ફડણવીસ વિરુદ્ધ સિક્રેટ એક્ટના ઉલ્લંઘનનો કેસ નોંધ્યો હતો. આ જ કેસમાં સપ્ટેમ્બર 2021માં મુંબઈ પોલીસના સાયબર યુનિટ દ્વારા ફડણવીસને બેથી ત્રણ નોટિસ આપવામાં આવી હતી. છેલ્લી નોટિસના જવાબમાં ફડણવીસે સાયબર યુનિટને સીલબંધ કવરમાં જવાબ મોકલ્યો હતો કે તેઓ ટૂંક સમયમાં જવાબ આપશે.

સીબીઆઈ પણ તપાસ કરી રહી છે

સાયબર યુનિટ દ્વારા મોકલવામાં આવેલી નોટિસ મુજબ, ફડણવીસે પોતાનો જવાબ નોંધ્યો ન હતો, જેના કારણે હવે સાયબર યુનિટ સીધુ ફડણવીસના સરકારી બંગલા પર પહોંચી ગયું છે. સીબીઆઈ આ મામલે તપાસ કરી રહી છે. આ કેસમાં અત્યાર સુધી મહારાષ્ટ્રના પૂર્વ ગૃહમંત્રી અનિલ દેશમુખ અને મુંબઈના પૂર્વ પોલીસ કમિશનર પરમબીર સિંહની પણ પૂછપરછ કરવામાં આવી છે.