પહલગામ હુમલા પર સર્વપક્ષીય બેઠકનો આ પાર્ટીએ કર્યો બહિષ્કાર, કહ્યું - 'ત્યાં માત્ર ચા-નાસ્તો કરવા.... '
કેન્દ્ર સરકાર અને કોંગ્રેસ પર નિશાન સાધ્યું, PoK પર હુમલો કરીને તેને જોડવાનો સમય આવી ગયો – બેનીવાલ.
Hanuman Beniwal boycott: જમ્મુ અને કાશ્મીરના પહેલગામમાં થયેલા તાજેતરના આતંકવાદી હુમલા બાદ કેન્દ્ર સરકારે ગુરુવારે (૨૪ એપ્રિલ, ૨૦૨૫) તમામ રાજકીય પક્ષોની એક સર્વપક્ષીય બેઠક બોલાવી છે. આ બેઠકમાં સરકાર પહલગામ હુમલા અંગે તમામ પક્ષોને માહિતી આપશે અને તેમના અભિપ્રાય તથા સૂચનો જાણશે. જોકે, રાષ્ટ્રીય લોકતાંત્રિક પાર્ટી (RLP) ના સાંસદ અને વડા હનુમાન બેનીવાલે આ સર્વપક્ષીય બેઠકનો બહિષ્કાર કરવાની જાહેરાત કરી છે અને કેન્દ્ર સરકાર તથા કોંગ્રેસ પર આકરા પ્રહારો કર્યા છે.
હનુમાન બેનીવાલે પહલગામ હુમલાને લઈને બોલાવવામાં આવેલી સર્વપક્ષીય બેઠકમાં ભાગ નહીં લેવાનું સ્પષ્ટ કર્યું છે. તેમણે સર્વપક્ષીય બેઠકોના ઉદ્દેશ્ય પર સવાલ ઉઠાવતા કહ્યું, "હું પહેલગામ હુમલાને લઈને બોલાવવામાં આવેલી સર્વપક્ષીય બેઠકમાં ભાગ લઈશ નહીં. સર્વપક્ષીય બેઠક માત્ર ચા-નાસ્તો માટે જ યોજાય છે. તેમાં કોઈ મુદ્દાઓ પર ગંભીર ચર્ચા થતી નથી."
પાકિસ્તાન પર સીધા હુમલા અને PoKને જોડવાની માંગણી:
બેનીવાલે સ્પષ્ટ શબ્દોમાં કેન્દ્ર સરકારને જણાવ્યું કે જો સરકારને કંઈક કરવું જ હોય, તો તેણે પાકિસ્તાન પર સીધો હુમલો કરવો જોઈએ. તેમણે વધુમાં કહ્યું કે, "કેન્દ્ર સરકારે પાકિસ્તાન અધિકૃત કાશ્મીર (PoK) પર હુમલો કરીને તેને ભારત સાથે જોડી દેવું જોઈએ. પાકિસ્તાન અધિકૃત કાશ્મીરને જોડવા માટે આનાથી વધુ સારો સમય હોઈ શકે નહીં."
સરકારની નિષ્ફળતા અને કોંગ્રેસ પર નિશાન:
હનુમાન બેનીવાલે પહલગામ હુમલા માટે કેન્દ્ર સરકારને જવાબદાર ઠેરવતા આક્ષેપ કર્યો કે "સરકારની નિષ્ફળતાઓને કારણે આ હુમલો થયો છે. આતંકવાદને ખતમ કરવાના મુદ્દે ભાજપે સરકાર બનાવી હતી," તેમ પણ તેમણે યાદ અપાવ્યું હતું.
આ ઉપરાંત, સાંસદ હનુમાન બેનીવાલે કોંગ્રેસ પાર્ટી પર પણ નિશાન સાધ્યું હતું. તેમણે કહ્યું કે કોંગ્રેસ પાર્ટી આવા સંવેદનશીલ મુદ્દા પર પણ ગંભીર નથી અને કોંગ્રેસ હવે 'મૃત્યુ પામેલી પાર્ટી' બની રહી છે.
હનુમાન બેનીવાલનું આ નિવેદન પહલગામ હુમલા બાદ રાજકીય વર્તુળોમાં ચર્ચાનો વિષય બન્યું છે. એક તરફ કેન્દ્ર સરકાર તમામ પક્ષોને સાથે લઈને રાષ્ટ્રીય સુરક્ષાના મુદ્દે ચર્ચા કરવા માંગે છે, ત્યારે બેનીવાલ દ્વારા બેઠકનો બહિષ્કાર અને સીધા સૈન્ય કાર્યવાહીની માંગણી કરવામાં આવી રહી છે. સરકાર અને કોંગ્રેસ પર તેમના પ્રહારો પણ હાલના રાજકીય માહોલને વધુ ગરમાવી રહ્યા છે.
ટોપ સ્ટોરી
ટ્રેન્ડિંગ સમાચાર
