PM Modi Kashmir Visit: 370 દૂર થયા બાદ પીએમ મોદી પહેલીવાર કરશે કાશ્મીરનો પ્રવાસ, મોટી જાહેરાત કરી શકે છે પ્રધાનમંત્રી

PM Modi Kashmir Visit: દેશમાં ચૂંટણીનો માહોલ છે. ગેરેન્ટની મોસમ છે. આ દરમિયાન વડાપ્રધાન મોદી શ્રીનગર જઈ રહ્યા છે. 370 હટાવ્યા બાદ વડાપ્રધાન મોદીની કાશ્મીરની આ પ્રથમ મુલાકાત હશે. શ્રીનગરમાં તેમની રેલી છે.

( Image Source : PTI )

Source : PTI

PM Modi Kashmir Visit: દેશમાં ચૂંટણીનો માહોલ છે. ગેરેન્ટની મોસમ છે. આ દરમિયાન વડાપ્રધાન મોદી શ્રીનગર જઈ રહ્યા છે. 370 હટાવ્યા બાદ વડાપ્રધાન મોદીની કાશ્મીરની આ પ્રથમ મુલાકાત હશે. શ્રીનગરમાં તેમની રેલી છે. જેને લઈને ભાજપનો દાવો છે કે કાશ્મીરના ઈતિહાસની આ સૌથી મોટી રેલી હશે, જેમાં 2 લાખથી વધુ લોકો એકઠા થશે. પીએમ મોદીની આ રેલી માટે શ્રીનગરમાં કડક સુરક્ષા વ્યવસ્થા કરવામાં આવી છે. શ્રીનગર ત્રિરંગા અને ભાજપના ઝંડાઓથી ઢંકાયેલું જોવા મળી રહ્યું છે. વડાપ્રધાન મોદી 7 કિલોમીટરનો રોડ શો કરીને શ્રીનગરના બક્ષી સ્ટેડિયમ જશે.

વડાપ્રધાન મોદી રૂ. 6400 કરોડની અનેક વિકાસ યોજનાઓનું અનાવરણ કરશે

બક્ષી સ્ટેડિયમ ખાતે જાહેર સભાને સંબોધીને વડાપ્રધાન મોદી રૂ. 6400 કરોડની અનેક વિકાસ યોજનાઓનું અનાવરણ કરશે. પીએમના આગમન પહેલા શ્રીનગર લગભગ 10 હજાર ત્રિરંગા અને ભાજપના ઝંડાઓથી ઢંકાઈ ગયું છે. શ્રીનગરમાં નાના રસ્તાઓ સીલ કરી દેવામાં આવ્યા છે. સ્ટેડિયમની બહાર 24 કલાક અગાઉથી જ બેરિકેડિંગ કરી દેવામાં આવ્યું છે. તાજેતરમાં કાશ્મીરમાં આટલો મોટો જાહેર મેળાવડો જોવા મળ્યો નથી.

વડાપ્રધાન મોદી કાશ્મીર માટે પણ મોટી જાહેરાત કરી શકે છે

જમ્મુ-કાશ્મીર પ્રશાસનની સાથે ભાજપ દ્વારા પણ રેલીને યાદગાર બનાવવાના પ્રયાસો કરવામાં આવી રહ્યા છે. દરેક વ્યક્તિ તૈયારીઓમાં વ્યસ્ત છે. લોકસભા ચૂંટણી પહેલા પીએમ મોદી અને ભાજપ દેશને સંદેશ આપવાનો પ્રયાસ કરી રહ્યા છે કે કાશ્મીર સંપૂર્ણપણે બદલાઈ ગયું છે. આવી સ્થિતિમાં એવું માનવામાં આવે છે કે ગેરંટીની આ સિઝનમાં વડાપ્રધાન મોદી કાશ્મીર માટે પણ મોટી જાહેરાત કરી શકે છે.

કાશ્મીરના લોકોને ધમકીભર્યા ફોન આવી રહ્યા છે.

શ્રીનગરમાં વડાપ્રધાન મોદીની જાહેરસભા પહેલા કાશ્મીરના લોકોને ધમકીભર્યા ફોન આવી રહ્યા છે. જેમાં સ્થાનિક લોકોને પીએમની જાહેર સભામાં ન આવવાની ધમકી આપવામાં આવી છે. સૂત્રોના જણાવ્યા અનુસાર, પાકિસ્તાનની ગુપ્તચર એજન્સી ISI કાશ્મીરમાં પીએમની રેલીનો બહિષ્કાર કરવા માટે મોબાઈલ અને લેન્ડલાઈન પર ધમકીભર્યા કોલ કરી રહી છે. કાશ્મીરના લોકોને અલગ-અલગ આંતરરાષ્ટ્રીય ફોન નંબર પરથી કોલ આવી રહ્યા છે. ફોન ઉપાડતી વખતે લોકોને ધમકાવવામાં આવી રહ્યા છે અને પીએમની રેલીથી દૂર રહેવા માટે કહેવામાં આવી રહ્યું છે. આ અંગે સુરક્ષા દળો અને ગુપ્તચર એજન્સીઓ સતર્ક થઈ ગઈ છે.