મોદીનાં માતા હીરાબાના માનમાં રાહુલ ગાંધીએ મોકૂફ રાખ્યો ક્યો કાર્યક્રમ? કોંગ્રેસે શું કર્યું એલાન?

પાર્ટીએ ઈન્દિરા અને રાજીવ ગાંધીની હત્યાનો ઉલ્લેખ કરીને ગૃહ મંત્રાલયને પત્ર લખ્યો છે. દિલ્હીમાં 24 ડિસેમ્બરે ભારત જોડો યાત્રા દરમિયાન રાહુલની સુરક્ષામાં ખામી જોવા મળી હતી.

રાહુલ ગાંધી (ફાઈલ ફોટો)

Source : PTI

રાહુલ ગાંધીની ભારત જોડો યાત્રાના દિલ્હી મુકામ દરમિયાન સુરક્ષાના કથિત ભંગને લઈને કોંગ્રેસ અને ભાજપ વચ્ચે શાબ્દિક યુદ્ધ ચાલ્યું છે. કોંગ્રેસે આ મુદ્દે કેન્દ્રીય ગૃહમંત્રી અમિત શાહને પણ પત્ર લખ્યો છે. શુક્રવારે, કોંગ્રેસ સાંસદની સુરક્ષાનો હવાલો સંભાળતા CRPF દ્વારા પ્રોટોકોલનું ઉલ્લંઘન કરવાના આરોપોનો જવાબ આપવાનું નક્કી કરવામાં આવ્યું હતું. જોકે, વડાપ્રધાન નરેન્દ્ર મોદીના માતા હીરાબાના નિધનને કારણે પાર્ટીએ તેની પ્રેસ કોન્ફરન્સ એક દિવસ માટે મોકૂફ રાખી હતી. કોંગ્રેસના પ્રવક્તા પવન ખેરાએ કહ્યું કે પાર્ટીએ આ નિર્ણય "મૃત આત્માના આદરના ચિહ્ન તરીકે" લીધો છે.

નોંધનીય છે કે, કોંગ્રેસ નેતા રાહુલ ગાંધીની સુરક્ષામાં ખામીને લઈને હોબાળો થયો છે. પાર્ટીએ ઈન્દિરા અને રાજીવ ગાંધીની હત્યાનો ઉલ્લેખ કરીને ગૃહ મંત્રાલયને પત્ર લખ્યો છે. દિલ્હીમાં 24 ડિસેમ્બરે ભારત જોડો યાત્રા દરમિયાન રાહુલની સુરક્ષામાં ખામી જોવા મળી હતી.

છેલ્લા 10 મહિનામાં 5 વખત રાહુલ ગાંધીની સુરક્ષામાં ખામી હોવાના અહેવાલો સામે આવ્યા છે. રાહુલની સુરક્ષામાં બે વખત પંજાબ, એક વખત રાજસ્થાન અને એક વખત મધ્યપ્રદેશમાં ક્ષતિ જોવા મળી હતી. CRPFએ પણ રાહુલની સુરક્ષામાં ખામીને લઈને નિવેદન જાહેર કર્યું છે. વાસ્તવમાં, રાહુલ ગાંધીને CRPFની Z+ સુરક્ષા આપવામાં આવી છે.

મીડિયા રિપોર્ટ્સ અનુસાર, 2022માં રાહુલ રોડ શો કરવા પંજાબના લુધિયાણા પહોંચ્યા હતા. આ દરમિયાન એક યુવકે કાફલા પર ઝંડો ફેંક્યો હતો, જે સીધો રાહુલ પર પડ્યો હતો.

મીડિયા રિપોર્ટ્સ અનુસાર જૂન 2022માં સિદ્ધુ મુસેવાલાની હત્યા બાદ રાહુલ ગાંધી પંજાબના પટિયાલા સ્થિત તેમના ઘરે પહોંચ્યા હતા. આ દરમિયાન તેમનો કાફલો રૂટથી અલગ થઈ ગયો હતો.

મીડિયા રિપોર્ટ્સ અનુસાર, 4 ડિસેમ્બર, 2022ના રોજ રાહુલ ગાંધીની ભારત જોડો યાત્રા એમપીના અગર માલવા પહોંચી હતી. અહીં એક યુવકે સિક્યોરિટી કોર્ડન તોડીને તેને ગળે લગાવી દીધો.

મીડિયા રિપોર્ટ્સ અનુસાર 10 ડિસેમ્બરે રાજસ્થાનના કોટામાં રાહુલની સામે એક યુવક સુરક્ષા કોર્ડન તોડીને આત્મદાહ કરવા પહોંચ્યો હતો. સુરક્ષા જવાનોએ તુરંત જ પરિસ્થિતિને કાબુમાં લીધી હતી.

મીડિયા રિપોર્ટ્સ અનુસાર 24 ડિસેમ્બરે જ્યારે યાત્રા દિલ્હીમાં પ્રવેશી ત્યારે ભીડે કોર્ડન તોડી નાખ્યું હતું. કોંગ્રેસનો આરોપ છે કે સુરક્ષાકર્મીઓ તેને સંભાળવામાં નિષ્ફળ રહ્યા છે.