રાજા રઘુવંશી હત્યા કેસ: નવા ખુલાસાથી ખળભળાટ, 'લગ્ન પહેલા સોનમે આરોપીઓ સાથે હોટલમાં...!'

ક્રાઈમ બ્રાન્ચમાં સોનમના ભાઈ ગોવિંદ અને ઓફિસ સ્ટાફની પૂછપરછ, હત્યાના કાવતરાના વધુ પડળો ખૂલ્યા.

રાજા રઘુવંશી હત્યા કેસમાં મોટો ખુલાસો

Source : Social Media

Raja Raghuvanshi murder: મધ્યપ્રદેશના ઈન્દોરમાં ચકચારી રાજા રઘુવંશી હત્યા કેસમાં દરરોજ નવા અને ચોંકાવનારા ખુલાસા થઈ રહ્યા છે. આ કેસની તપાસ કરી રહેલી શિલોંગ પોલીસ હાલ ઈન્દોરમાં છે અને આરોપીઓની ઊંડાણપૂર્વક પૂછપરછ કરી રહી છે. આ દરમિયાન, એક મોટો ઘટસ્ફોટ થયો છે કે, રાજા રઘુવંશી સાથેના લગ્ન પહેલાં, મુખ્ય આરોપી સોનમે પાંચેય આરોપીઓ સાથે રાજાની હત્યાનું કાવતરું ઘડવા માટે ઈન્દોરની અવંતિ રેસ્ટોરન્ટમાં સમય વિતાવ્યો હતો. જોકે, રેસ્ટોરન્ટના માલિક જય સોનીએ આ અંગે ચોક્કસપણે યાદ ન હોવાનું જણાવ્યું છે, પરંતુ તેમણે શક્યતા વ્યક્ત કરી છે કે આરોપીઓ ત્યાં આવ્યા હશે. સોનીએ વધુમાં જણાવ્યું કે તેમની પાસે તે સમયના CCTV ફૂટેજ નથી, કારણ કે તેમના રૂમમાં ફક્ત 10 દિવસનો બેકઅપ હોય છે.

ક્રાઈમ બ્રાન્ચમાં સોનમના ભાઈ અને ઓફિસ સ્ટાફની પૂછપરછ

આ ઘટનાક્રમ વચ્ચે, સોનમના ભાઈ ગોવિંદ રઘુવંશી અને તેમનો ઓફિસ સ્ટાફ ક્રાઈમ બ્રાન્ચ પહોંચ્યા હતા. શિલોંગ પોલીસ સોનમના વર્તન અને ગતિવિધિઓ અંગે ઓફિસ સ્ટાફની ઝીણવટભરી પૂછપરછ કરી રહી છે. ગોવિંદે મીડિયાને જણાવ્યું કે તેમની પૂછપરછ કરવામાં આવી નથી, પરંતુ તેમના ઓફિસ સ્ટાફને સોનમ અને તેના વર્તન અંગે પૂછપરછ માટે બોલાવવામાં આવ્યા છે. ક્રાઈમ બ્રાન્ચે રાજાના કેટલાક પરિચિતોને પણ પૂછપરછ માટે બોલાવ્યા છે, જેથી કેસના તમામ પાસાઓ પર પ્રકાશ પાડી શકાય.

સોનમનો વ્યવસાય અને રાજ કુશવાહા સાથેનો સંબંધ

જાણવા મળ્યું છે કે સોનમનો પરિવાર ફર્નિચરમાં વપરાતી સનમિકા શીટનો વ્યવસાય કરે છે અને ધરપકડ પહેલાં સોનમ આ પારિવારિક વ્યવસાયનું કામ સંભાળતી હતી. સ્થાનિક પોલીસના જણાવ્યા અનુસાર, રાજા રઘુવંશીની હત્યાનું કાવતરું ઘડવામાં મુખ્ય આરોપી રાજ કુશવાહા, જે 12મા ધોરણમાં નાપાસ થયો હોવા છતાં, આ જ સ્થાપનામાં એકાઉન્ટન્ટ તરીકે કામ કરતો હતો. એવી શંકા છે કે આ સમયગાળા દરમિયાન જ તે સોનમની કથિત રીતે નજીક આવ્યો હતો.

તપાસમાં એ પણ સામે આવ્યું છે કે માર્ચ મહિનામાં સોનમ સાથે વાત કરતો 'સંજય વર્મા' નામનો વ્યક્તિ ખરેખર રાજ કુશવાહા જ હતો. શિલોંગ પોલીસને સોનમના મોબાઈલની કોલ ડિટેઈલ્સ પરથી આ હકીકત જાણવા મળી હતી. માર્ચ મહિનામાં સોનમે 'સંજય વર્મા'ને કુલ 112 વાર ફોન કર્યો હતો, જેનો અર્થ છે કે લગભગ દરરોજ 4-5 વાર તેમની વચ્ચે વાતચીત થતી હતી. પોલીસના મતે, આ સામાન્ય મિત્રતા કરતાં ઘણું વધારે હતું, જે કાવતરા તરફ ઈશારો કરે છે.

વારાણસીથી ગાઝીપુરની રહસ્યમય મુસાફરી અને ચાના સ્ટોલ પરનો ખુલાસો

સોનમની ગાઝીપુરની મુસાફરી દરમિયાન કેટલાક મહત્વપૂર્ણ સાક્ષીઓ પણ સામે આવ્યા છે. ગાઝીપુરના રહેવાસી ઉજાલા યાદવે જણાવ્યું કે 8 જૂનની રાત્રે વારાણસીથી ગાઝીપુર જતી બસમાં સોનમ તેમની સાથે હતી. ઉજાલાએ ચોંકાવનારો ખુલાસો કર્યો કે સોનમ એકલી નહોતી. તેની સાથે બે યુવકો હતા, જેમાંથી એકે સફેદ શર્ટ પહેર્યો હતો અને બંનેએ પોતાના ચહેરા ઢાંકેલા હતા. ઉજાલા જ્યારે બસમાં રાજા હત્યા કેસનો વીડિયો જોઈ રહી હતી, ત્યારે સોનમ ડરી ગઈ હતી. તેણે ઉજાલાને વીડિયો બંધ કરવા કહ્યું અને પછી તેનો ફોન માંગીને એક નંબર ટાઇપ કર્યો અને ફોન કર્યા વિના તેને ડિલીટ કરી દીધો.

આ ઉપરાંત, ગાઝીપુરમાં કાશી ટી સ્ટોલના માલિક સાહિલ યાદવે પણ પોલીસને મહત્વપૂર્ણ માહિતી આપી છે. તેમણે જણાવ્યું કે સોનમ ડરતી નહોતી. તે કારમાંથી નીચે ઉતરી અને આરામથી દુકાન પર આવી. ત્યાંથી તેણે તેના ભાઈ ગોવિંદને ફોન કર્યો. આના પરથી પોલીસનું માનવું છે કે સોનમનો પ્લાન પહેલેથી જ નક્કી હતો અને તે કોઈની સાથે કારમાં આવી હતી, જે આ કેસમાં વધુ રહસ્ય ઉમેરે છે.