Raja Raghuwanshi: સોનમે સૂટકેસમાં રાખી હતી આ ચીજ જેનાથી પોલીસને થઇ હતી શંકા, થયો ચોંકાવનારો ખુલાસો

Raja Raghuwanshi Murder Case: પોલીસ અધિકારીએ જણાવ્યું હતું કે સોનમ એક કોન્ટ્રાક્ટ કિલર સાથે સ્કૂટી પર બેઠી હતી.

રાજા રઘુવંશી, સોનમ રઘુવંશી

Source : Social Media

Raja Raghuwanshi Murder Case: મેઘાલયમાં હનિમૂન દરમિયાન પતિ રાજા રઘુવંશીની હત્યાના આરોપમાં ધરપકડ કરાયેલી સોનમ રઘુવંશી અને તેના ચાર અન્ય સાથીઓને શિલોંગ કોર્ટે 8 દિવસની પોલીસ કસ્ટડીમાં મોકલી દીધા હતા. કેસની તપાસ કરતી વખતે પોલીસને એક એવા સંકેત મળ્યા જેનાથી તેમને સોનમ પર શંકા ગઈ હતી.

જ્યાં રોકાઇ હતી ત્યાં સોનમ આ વસ્તુઓ ભૂલી ગઈ હતી

સોનમ રઘુવંશી મેઘાલયમાં તેના હોટલના રૂમમાં તેનું મંગળસૂત્ર છોડી ગઈ હતી, જેના કારણે રાજ્ય પોલીસને તેના પર શંકા ગઈ હતી. ડીઆઈજી ડીએનઆર માર્કે જણાવ્યું હતું કે 23 મેના રોજ હોમસ્ટે છોડતા પહેલા સોનમ તેનું મંગળસૂત્ર અને વીંટી રૂમમાં ભૂલી ગઈ હતી. ત્યારબાદ પોલીસને શંકા ગઈ કે હમણાં જ લગ્ન કરનાર દંપતી પોતાનું મંગળસૂત્ર અને વીંટી સુટકેસમાં કેવી રીતે છોડી શકે છે.

ડીઆઈજીએ જણાવ્યું કે સોનમ પર કેવી શંકા હતી?

એનડીટીવીના રિપોર્ટ અનુસાર,  ડીઆઈજી ડીએનઆર માર્કે કહ્યું કે અમને હોમસ્ટે રૂમમાં સુટકેસમાં સોનમનું મંગળસૂત્ર અને વીંટી મળી, જેનાથી અમારી પહેલી શંકા ગઈ. પોલીસ અધિકારીએ જણાવ્યું હતું કે સોનમ એક કોન્ટ્રાક્ટ કિલર સાથે સ્કૂટી પર બેઠી હતી, જ્યારે અન્ય બે હત્યારાઓ બીજી સ્કૂટી લઈને ગયા હતા. તેઓ રાજાના મૃતદેહને માવલખિયાત નામની જગ્યાએ લઈ ગયા અને ત્યાં લાશ ફેંકી દીધી હતી.

'સોનમે લાશને ખાડામાં ફેંકવામાં મદદ કરી'

ડીઆઈજીએ કહ્યું, "અન્ય આરોપીઓએ કહ્યું છે કે સોનમે પણ લાશને ખાડામાં ફેંકવામાં તેમની મદદ કરી હતી." પોલીસ અધિકારીએ કહ્યું કે રાજા અને સોનમ પાસે બે-બે મોબાઈલ ફોન હતા, જેમાંથી ફક્ત એક જ મળી આવ્યો છે, બાકીના ત્રણ ફોનની શોધ ચાલુ છે.

ડીઆઈજીએ કહ્યું કે સોનમનો ફોન હજુ સુધી મળ્યો નથી, જ્યારે અમે ઈન્દોરમાં ઘટનાના દિવસે બીજા આરોપીએ પહેરેલા કપડાં જપ્ત કર્યા છે. પૂછપરછ અંગે તેમણે કહ્યું કે અત્યાર સુધી આરોપીઓને સામસામે બેસાડીને પૂછપરછ કરવામાં આવી નથી.

ડીઆઈજી માર્કે વધુમાં કહ્યું કે અત્યાર સુધી બધા આરોપીઓ એકબીજાને માસ્ટરમાઇન્ડ કહી રહ્યા છે. સોનમ કહે છે કે રાજ માસ્ટરમાઇન્ડ છે, જ્યારે રાજ કહે છે કે સોનમ આ કાવતરાનો મુખ્ય માસ્ટરમાઇન્ડ છે. સત્ય ત્યારે જ બહાર આવશે જ્યારે બધા આરોપીઓની રૂબરૂ પૂછપરછ કરવામાં આવશે.