Manish Sisodia Bail Plea: મનિષ સિસોદિયાની જામીન અરજી પર સુનાવણી ટળી, જજે ખુદને કેસથી અલગ કર્યા
Manish Sisodia News: દિલ્હીના પૂર્વ ડેપ્યુટી સીએમ અને આમ આદમી પાર્ટી (AAP)ના નેતા મનિષ સિસોદિયાની મુશ્કેલીઓનો અંત નથી આવી રહ્યો
Manish Sisodia News: દિલ્હીના પૂર્વ ડેપ્યુટી સીએમ અને આમ આદમી પાર્ટી (AAP)ના નેતા મનિષ સિસોદિયાની મુશ્કેલીઓનો અંત નથી આવી રહ્યો. ગુરુવારે (11 જુલાઈ) સુપ્રીમ કોર્ટમાં સિસોદિયાની જામીન અરજી પર સુનાવણી મોકૂફ રાખવામાં આવી હતી. તે લગભગ 16 મહિનાથી જેલમાં છે અને તેણે ઘણી વખત જામીન માટે અરજી કરી છે. વાસ્તવમાં, દિલ્હી લિકર પૉલિસી કેસમાં ધરપકડ કરાયેલ સિસોદિયાની અરજી પર સુનાવણી કરી રહેલા ન્યાયાધીશે પોતાને તેનાથી અલગ કરી દીધા છે.
સુપ્રીમ કોર્ટના ન્યાયાધીશ જસ્ટિસ સંજય કુમારે મનીષ સિસોદિયાની જામીન અરજી પર સુનાવણી કરવાથી પોતાને અલગ કરી લીધા છે. દિલ્હીના પૂર્વ ડેપ્યુટી સીએમ વિરૂદ્ધ મની લોન્ડરિંગ અને દારૂ નીતિ મામલે ભ્રષ્ટાચારના મામલામાં કેસ નોંધવામાં આવ્યો છે. સિસોદિયાએ આ કેસમાં જામીન માટે સુપ્રીમ કોર્ટમાં અરજી કરી છે. જસ્ટિસ સંજીવ ખન્ના, સંજય કરોલ અને સંજય કુમાર આ કેસની સુનાવણી કરવાના હતા, પરંતુ કુમારે તેમાંથી પોતાને દૂર કરી દીધા હતા.
AAPના વકીલે કરી હતી તાત્કાલિક સુનાવણીના માંગ
સર્વોચ્ચ અદાલતની બેન્ચે કહ્યું કે મનીષ સિસોદિયાની અરજીની સુનાવણી અન્ય બેન્ચ દ્વારા કરવામાં આવશે, જેમાં જસ્ટિસ સંજય કુમાર ભાગ નહીં હોય. કોર્ટમાં કેસની સુનાવણી થતાં જ જસ્ટિસ ખન્નાએ કહ્યું, - "અમારા ભાઈને થોડી સમસ્યા છે. તેઓ અંગત કારણોસર કેસની સુનાવણી કરવા માંગતા નથી." આના પર આમ આદમી પાર્ટી વતી હાજર રહેલા વરિષ્ઠ વકીલ અભિષેક મનુ સિંઘવીએ બેન્ચને આ મામલાની તાત્કાલિક સુનાવણી કરવા વિનંતી કરી હતી.
15 જુલાઇએ થશે મનિષ સિસોદિયાની જામીન અરજી પર સુનાવણી
એન્ફોર્સમેન્ટ ડિરેક્ટોરેટ (ED) અને સેન્ટ્રલ બ્યૂરો ઑફ ઇન્વેસ્ટિગેશન (CBI) બંનેએ દારૂ નીતિ મામલે મનીષ સિસોદિયા વિરુદ્ધ કેસ નોંધ્યો છે. આનો ઉલ્લેખ કરતા સિંઘવીએ કહ્યું કે બંને કેસમાં હજુ સુનાવણી શરૂ થઈ નથી. તેના પર સુપ્રીમ કોર્ટે કહ્યું કે બીજી બેંચ 15 જુલાઈએ જામીન અરજી પર સુનાવણી કરશે. આ રીતે મનફષ સિસોદિયાની જામીન અરજી પર સોમવારે (15 જુલાઈ) સુનાવણી થવાની છે.
મનિષ સિસોદિયાની ગયા વર્ષે થઇ હતી ધરપકડ
વરિષ્ઠ આમ આદમી પાર્ટી (AAP) નેતા મનિષ સિસોદિયાને CBI દ્વારા 26 ફેબ્રુઆરી, 2023ના રોજ દિલ્હી લિકર પોલિસી કેસમાં તેમની કથિત ભૂમિકા બદલ ધરપકડ કરવામાં આવી હતી. આ પછી દારૂ નીતિ કેસની તપાસ કરી રહેલી EDએ મની લોન્ડરિંગ કેસમાં 9 માર્ચ, 2023 ના રોજ મનિષ સિસોદિયાની ધરપકડ કરી હતી. સીબીઆઈની ધરપકડના બે દિવસ બાદ એટલે કે 28 ફેબ્રુઆરી, 2023ના રોજ સિસોદિયાએ દિલ્હી કેબિનેટમાંથી રાજીનામું આપી દીધું હતું.
ટ્રેન્ડિંગ સમાચાર
ટોપ સ્ટોરી
