મહેસાણામાં જીતુ વાઘાણીની હાજરીમાં યોજાનારી ભાજપની બાઇક રેલી રદ

મહેસાણાઃ આજે મહેસાણામાં ગુજરાત ભાજપ પ્રદેશ પ્રમુખ જીતુ વાઘાની આગેવાનીમાં કાર્યકર્તા સંમેલન યોજાવાનું છે. કાર્યકર્તા સંમેલન દરમિયાન આજે સવારે 8.30 વાગ્યે બાઇક રેલી રાખવામાં આવી હતી. જોકે, પ્રદેશ પ્રમુખ જીતુભાઇ વાઘાણીની ગાંધીનગર ખાતે અગત્યની મીટિંગ હોવાથી તેઓ મહેસાણા મોડા આવવાના છે. જેને લીધી બાઇક રેલી મોકૂફ રાખવામાં આવી છે. જોકે, દિવસના બીજા પ્રોગ્રામ રાબેતા મુજબ ચાલુ છે. નોંધનીય છે કે, આજે જીતુ વાઘાણી મહેસાણા આવવાના છે, ત્યારે પાસ દ્વારા તેમનો વિરોધ કરવાની ચિમકી ઉચ્ચારી હતી. ઉત્તર ગુજરાતના પાસ કન્વીનર નરેન્દ્ર પટેલે એક નિવેદનમાં જણાવ્યું હતું કે, વાઘાણી જ્યાં પગ મૂકશે ત્યાં વિરોધ થશે. એટલું જ નહીં, પાટીદાર સમાજની બહેનો દ્વારા પણ થાળી-વેલણ વગાડી વિરોધ કરાશે. જીતુ વાઘાણી અસલ પાટીદાર હોય તો મહેસાણાની જમીન પર પગ મૂકે, તેવી પણ ચિમકી આપી હતી.