BCCIએ ટીમ ઈન્ડિયાના ઘરેલું સિઝનની કરી જાહેરાત, ગુજરાતના કયા નવા સ્ટેડિયમમાં રમાશે બે મેચો, જાણો વિગત

5 ટેસ્ટ, 9 વન-ડે અને 12 ટી-20 આંતરરાષ્ટ્રીય મેચો રમશે તેવી જાણકારી બીસીસીઆઈના કાર્યવાહક સચિવ અમિતાભ ચૌધરીએ આપી હતી.

નવી દિલ્હી: ભારતીય ક્રિકેટ કંટ્રોલ બોર્ડે (બીસીસીઆઈ) આગામી 2019-20ના ઘરેલું સિઝનની જાહેરાત કરી દીધી છે. આ ઘરેલું સિઝનમાં કુલ 26 મેચો રમાશે. જેમાં 5 ટેસ્ટ, 9 વન-ડે અને 12 ટી-20 આંતરરાષ્ટ્રીય મેચો રમશે તેવી જાણકારી બીસીસીઆઈના કાર્યવાહક સચિવ અમિતાભ ચૌધરીએ આપી હતી. બીસીસીઆઈ તરફથી જાહેર કરેલ નિવેદન પ્રમાણે ભારતની ઘરેલું સિઝનની શરુઆત દક્ષિણ આફ્રિકા સામે ફ્રીડમ ટ્રોફીથી શરુ થશે. આ શ્રેણી 15 સપ્ટેમ્બરથી 23 ઓક્ટોબર દરમિયાન યોજાશે. ત્યાર બાદ બાંગ્લાદેશની ટીમ નવેમ્બરમાં ભારતનો પ્રવાસ કરશે. આ પ્રવાસમાં બાંગ્લાદેશની ટીમ ભારત સામે 3 ટી-20 મેચ અને 2 ટેસ્ટ મેચ રમશે. આ શ્રેણીની ટી-20 મેચ દિલ્હી, રાજકોટ (7 નવેમ્બર) અને નાગપુરમાં રમાશે. જ્યારે ટેસ્ટ મેચ ઈન્દોર અને કોલકાતામાં રમાશે. વેસ્ટ ઇન્ડીઝની ટીમ ડિસેમ્બરમાં ભારતના પ્રવાસે આવશે. જેમાં તે ટીમ ઇન્ડિયા સાથે 3 ટી20 શ્રેણી અને 3 વન-ડે મેચ રમશે. ઝિમ્બાબ્વે જાન્યુઆરી 2020માં ભારતના પ્રવાસે આવશે. જે ત્રણ ટી-20 મેચ રમશે. આ પછી ઓસ્ટ્રેલિયા ભારતના પ્રવાસે ત્રણ વન-ડે મેચ રમવા આવશે. આ શ્રેણીનું આયોજન 14 થી 19 જાન્યુઆરી વચ્ચે થશે. મેચો મુંબઈ, રાજકોટ (17 જાન્યુઆરી) અને બેંગલોરમાં રમાશે.