મુખ્યમંત્રીના કાર્યક્રમની પત્રિકામાં રૂપાણીનું નામ નહીં, મંત્રી બોલ્યાઃ વર્તમાન મુખ્યમંત્રીના કાર્યક્રમમાં રૂપાણીનું નામ લખવું ‘થોડું ઓલું’ લાગે.........
લક્ષ્મીનગર અન્ડર બ્રિજના લોકાર્પણ કાર્યક્રમની આમંત્રણ પત્રિકામાં વિજય રૂપાણી સિવાયના રાજકોટના તમામ ધારાસભ્યોનાં નામ છે ત્યારે રૂપાણીનું નામ જાણી જોઈને કાઢી નંખાયું છે કે શું એવો સવાલ પૂછાઈ રહ્યો છે.
રાજકોટ: ગુજરાતના મુખ્યમંત્રીપદેથી રાજીનામું આપનારા વિજય રૂપાણીની રાજકોટના મુખ્યમંત્રી ભૂપેન્દ્ર પટેલના કાર્યક્રમમાં સાવ બાદબાકી કરી નંખાઈ તેનો વિવાદ વકર્યો છે. આ વિવાદ વચ્ચે રાજકોટના બીજા ધારાસભ્ય અને ગુજરાત સરકારના મંત્રી અરવિંદ રૈયાણીએ સાવ વાહિયાત બચાવ કર્યો છે.
રાજકોટમાં લક્ષ્મીનગર અન્ડર બ્રિજનું આજે 9.45 કલાકે મુખ્યમંત્રી ભુપેન્દ્ર પટેલના હસ્તે લોકાર્પણ કરાયું હતું. લક્ષ્મીનગર અન્ડર બ્રિજના લોકાર્પણ કાર્યક્રમની આમંત્રણ પત્રિકામાં પૂર્વ મુખ્યમંત્રી અને રાજકોટ પશ્ચિમ મતવિસ્તારના ધારાસભ્ય વિજયભાઈ રૂપાણીનું નામ જ નહોતું લખાયું. વિજય રૂપાણી ભલે મુખ્યમંત્રી ના રહ્યા પણ રાજકોટ પશ્ચિમ મતવિસ્તારના ધારાસભ્ય તો છે જ.
લક્ષ્મીનગર અન્ડર બ્રિજના લોકાર્પણ કાર્યક્રમની આમંત્રણ પત્રિકામાં વિજય રૂપાણી સિવાયના રાજકોટના તમામ ધારાસભ્યોનાં નામ છે ત્યારે રૂપાણીનું નામ જાણી જોઈને કાઢી નંખાયું છે કે શું એવો સવાલ પૂછાઈ રહ્યો છે. ભાજપનાં સૂત્રોના મતે, આ વિજય રૂપાણીનું બહુ મોટું અપમાન કહેવાય કેમ કે રૂપાણી કરતાં અનેક ગણા જુનિયર ધારાસભ્યોનાં નામ યાદ આવ્યાં પણ રૂપાણીનું નામ યાદ ના રહ્યું.
આ મુદ્દે રાજકોટના ભાજપના ધારાસભ્ય અને ગુજરાત સરકારના મંત્રી અરવિંદ રૈયાણીએ સાવ વાહિયાત બચાવ કર્યો હતો કે, વિજય રૂપાણી રાજ્યના ભૂતપૂર્વ મુખ્યમંત્રી છે અને વર્તમાન મુખ્યમંત્રી અંડરબ્રિજનું લોકાર્પણ કરતા હોય ત્યારે ભૂતપૂર્વ મુખ્યમંત્રી રૂપાણીનું આમંત્રણ પત્રિકામાં નામ લખવું ‘થોડું ઓલું’ લાગે. રૈયાણીએ ‘થોડું ઓલું લાગે’ એટલે શું તેની સ્પષ્ટતા નહોતી કરી.
વર્તમાન સરકાર અને ભાજપ સંગઠન પણ ઉપેક્ષા કરી રહી હોવાની ચર્ચા સતત ચાલ્યા કરે છે. આ ચર્ચા વચ્ચે રાજકોટમાં બનેલી ઘટનાના પગલે ભાજપમાં જ એવી ચર્ચા છે કે, ગુજરાતના મુખ્યમંત્રીપદેથી રાજીનામું આપ્યા પછી વિજય રૂપાણીને કોરાણે મૂકી દેવાયા છે. ગુજરાતની વર્તમાન સરકાર અને ભાજપ સંગઠન પણ રૂપાણીની ઉપેક્ષા કરી રહી છે તેનો આ વધુ એક પુરાવો છે. રૂપાણીનું નામ કેમ લખાયું જ નહીં એ સવાલ મોટો છે.
ટોપ સ્ટોરી
ટ્રેન્ડિંગ સમાચાર
