Pakistan: ઇસ્લામાબાદ હાઇકોર્ટે ઇમરાન ખાનને આપી મોટી રાહત, લાઇવ ટેલિકાસ્ટનો પ્રતિબંધ હટાવ્યો

પાકિસ્તાનના પૂર્વ વડાપ્રધાન ઈમરાન ખાનને ઈસ્લામાબાદ હાઈકોર્ટમાંથી રાહત મળી છે. હાઈકોર્ટે ઈમરાન ખાન પર લાગેલો પ્રતિબંધ હટાવી લીધો છે

ફાઇલ તસવીર

Source : PTI

લાહોરઃ પાકિસ્તાનના પૂર્વ વડાપ્રધાન ઈમરાન ખાનને ઈસ્લામાબાદ હાઈકોર્ટમાંથી રાહત મળી છે. હાઈકોર્ટે ઈમરાન ખાન પર લાગેલો પ્રતિબંધ હટાવી લીધો છે. આ પ્રતિબંધ પીટીઆઈ ચીફ ઈમરાન ખાનના લાઈવ ટેલિકાસ્ટને લઈને હતો, જે તેમની રેલીમાં આપેલા ભાષણ પછી પાકિસ્તાન ઈલેક્ટ્રોનિક મીડિયા રેગ્યુલર ઓથોરિટી (પેમરા) દ્વારા લગાવવામાં આવ્યો હતો. તે ભાષણને લઈને ઈમરાન ખાન પર આરોપ છે કે તેમણે જાહેર સભામાંથી પોતાના નિવેદનમાં ઘણા સરકારી અધિકારીઓ અને એક મહિલા જજને ખુલ્લેઆમ ધમકી આપી હતી.

ઈસ્લામાબાદ હાઈકોર્ટના મુખ્ય ન્યાયાધીશ અતહર મિનલ્લાહે ઈમરાન ખાન દ્વારા દાખલ કરાયેલી અરજી પર સુનાવણી કરતા સ્વીકાર્યું હતું કે PEMRA એ આ મામલે પોતાના અધિકારોની બહાર જઇને કાર્યવાહી કરી છે. સાથે જ નિર્દેશ આપ્યો કે EMRA એ એક અધિકારીની નિમણૂક કરવી જોઈએ, જે કોર્ટમાં ઈમરાન ખાન પરના પ્રતિબંધને યોગ્ય ઠેરવી શકે. સાથે જ ચીફ જસ્ટિસે કહ્યું કે જે વ્યક્તિ દોષિત ઠર્યો નથી તેના પર પ્રતિબંધ લગાવી શકાય નહીં.

ઈમરાન ખાનના પક્ષને ઠપકો મળ્યો

સોમવારે ઈસ્લામાબાદ હાઈકોર્ટમાં સુનાવણી દરમિયાન મુખ્ય ન્યાયાધીશે મહિલા જજને ધમકી આપવા બદલ ઈમરાન ખાનને ઠપકો પણ આપ્યો હતો. ચીફ જસ્ટિસે ઈમરાન ખાનના વકીલને પૂછ્યું કે શું જજોને આ રીતે ધમકાવવામાં આવશે? જસ્ટિસ અતહરે કોર્ટમાં કહ્યું કે શું તમારા નેતાએ એવું નથી કહ્યું કે તે તેને (મહિલા જજ)ને છોડશે નહીં. જસ્ટિસ અતહરે સવાલ ઉઠાવતા કહ્યું કે મારા વિશે પણ તેમણે આવું કંઈક કહ્યું હોય તો ઠીક હતું પણ મહિલા જજ?

ઈમરાન ખાનના નજીકના સાથી શાહબાઝ ગિલ કેસમાં ઈસ્લામાબાદ હાઈકોર્ટના ચીફ જસ્ટિસે ભારપૂર્વક કહ્યું હતું કે શાહબાઝ સાથે યાતના અસ્વીકાર્ય છે પરંતુ મહિલા ન્યાયાધીશને ડરાવવા ક્ષમાપાત્ર નથી. ચીફ જસ્ટિસે વધુમાં કહ્યું કે આ સમગ્ર મામલાએ શાહબાઝ ગિલની ન્યાયી સુનાવણીને વિવાદાસ્પદ બનાવી દીધી છે.

પાકિસ્તાનના પૂર્વ PM ઈમરાન ખાને રેલીમાં શું કહ્યું?

શનિવારે ઇસ્લામાબાદમાં એક રેલીમાં પાકિસ્તાનના ભૂતપૂર્વ વડાપ્રધાન ઇમરાન ખાને શરીફ સરકાર પર આકરા પ્રહારો કર્યા હતા. નજીકના સાથી શાહબાઝ ગિલની ધરપકડ અને પોલીસ રિમાન્ડમાં શારીરિક અને માનસિક શોષણનો આરોપ લગાવ્યો હતો. ઈમરાન ખાને રેલીમાં ઈસ્લામાબાદના આઈજી પોલીસ અને ડેપ્યુટી આઈજી પોલીસ સામે કેસ દાખલ કરવા માટે ધમકીભર્યા સ્વરમાં વાત કરી હતી.તે જ સમયે ઇમરાન ખાને મહિલા જજને પણ ધમકી આપી હતી. જેમણે તેમના નજીકના મિત્ર શાહબાઝને રિમાન્ડ પર મોકલવાનો આદેશ આપ્યો હતો. ઈમરાન ખાને ન્યાયતંત્ર પર તેમની પાર્ટી સાથે ભેદભાવનો આરોપ લગાવ્યો અને કહ્યું કે શાસક સરકાર તરફ તેનો ઝુકાવ છે. ઈમરાન ખાને મહિલા ન્યાયાધીશને ધમકી આપી હતી અને કહ્યું હતું કે તેમણે પણ ગંભીર પરિણામો ભોગવવા પડશે.

રેલી બાદ ઈમરાન ખાન વિરુદ્ધ અનેક કલમો હેઠળ કેસ નોંધવામાં આવ્યો હતો. પાકિસ્તાન ઇલેક્ટ્રોનિક મીડિયા રેગ્યુલર ઓથોરિટીએ તેમના ભાષણના લાઇવ પ્રસારણ પર પ્રતિબંધ મૂક્યો હતો.