Iran Israel War: ઈરાનના 153 શહેરો પર 1000થી વધુ હુમલા, અમેરિકા-ઈઝરાયલના હુમલામાં 787 મોતનો દાવો
Iran Israel War: અમેરિકા અને ઇઝરાયલી હુમલાઓ શરૂ થયા પછી ઈરાનમાં પરિસ્થિતિ સતત બગડી રહી છે.
Iran Israel War: અમેરિકા અને ઇઝરાયલી હુમલાઓ શરૂ થયા પછી ઈરાનમાં પરિસ્થિતિ સતત બગડી રહી છે. ઈરાનની રેડ ક્રેસેન્ટ સોસાયટીએ મંગળવારે જણાવ્યું હતું કે શનિવારથી અત્યાર સુધીમાં દેશભરમાં 787 લોકો માર્યા ગયા છે. રેડ ક્રેસેન્ટ અનુસાર, 153 શહેરો અને 500થી વધુ સ્થળોએ 1,000 થી વધુ હુમલા થયા છે. તેહરાનના પશ્ચિમમાં આવેલા કરજ અને મધ્ય ઈરાનના શહેર ઇસ્ફહાનમાં પણ વિસ્ફોટ થયા હતા. દરમિયાન, ઇઝરાયલમાં ઈરાની મિસાઈલ હુમલામાં 11 લોકો માર્યા ગયા હતા.
ઈરાન સમર્થિત જૂથ હિઝબુલ્લાહે પણ ઇઝરાયલ પર હુમલો કર્યો હતો. જવાબમાં ઇઝરાયલી કાર્યવાહીમાં લેબનોનમાં 52 લોકો માર્યા ગયા હતા. યુએસ સૈન્યએ છ અમેરિકન સૈનિકોના મૃત્યુની પુષ્ટી કરી હતી. સંયુક્ત આરબ અમીરાતમાં ત્રણ લોકો માર્યા ગયા, જ્યારે કુવૈત અને બહેરીનમાં એક-એક વ્યક્તિનું મોત થયું.
ઈરાનની પરમાણુ ફેસિલિટી સુવિધાઓ પર હુમલો
યુએસ અને ઇઝરાયલે ઈરાનના પરમાણુ ફેસિલિટીને નિશાન બનાવ્યા છે. સંયુક્ત રાષ્ટ્રના પરમાણુ નિરીક્ષક આંતરરાષ્ટ્રીય પરમાણુ ઊર્જા એજન્સી (IAEA) એ જણાવ્યું હતું કે તાજેતરમાં નતાન્ઝ પરમાણુ સંવર્ધન સ્થળને થોડું નુકસાન થયું હતું, પરંતુ કોઈ કિરણોત્સર્ગી જોખમની શંકા નથી. જૂનમાં 12 દિવસના યુદ્ધ દરમિયાન નતાન્ઝ પર પણ હુમલો થયો હતો, જેનાથી ઈરાનના પરમાણુ કાર્યક્રમને નુકસાન થયું હતું. ઇઝરાયલી વડાપ્રધાન બેન્જામિન નેતન્યાહૂએ દાવો કર્યો હતો કે ઈરાન નવી ભૂગર્ભ પરમાણુ સુવિધાઓ બનાવી રહ્યું છે, પરંતુ કોઈ પુરાવા આપ્યા નથી.
અમેરિકા પાસે અનલિમિટેડ હથિયારો છે
હાલમાં તે સ્પષ્ટ નથી કે યુદ્ધ કેટલો સમય ચાલી શકે છે. રાષ્ટ્રપતિ ડોનાલ્ડ ટ્રમ્પે જણાવ્યું હતું કે ઈરાન સામે કાર્યવાહી ચારથી પાંચ અઠવાડિયા સુધી ચાલી શકે છે, પરંતુ જો જરૂરી હોય તો તે વધુ સમય સુધી ચાલુ રાખી શકે છે. તેમણે જણાવ્યું હતું કે અમેરિકા પાસે લગભગ અનલિમિટેડ શસ્ત્રો છે. ઈરાને સંયુક્ત આરબ અમીરાત અને બહેરીનમાં એમેઝોન ડેટા સેન્ટરોને નિશાન બનાવીને બદલો લીધો. કતાર અને સાઉદી અરેબિયામાં ઊર્જા સુવિધાઓ પર પણ હુમલો કરવામાં આવ્યો હતો.
હોર્મુઝ સ્ટ્રેટમાં જહાજો પર હુમલા
હોર્મુઝ સ્ટ્રેટમાં જહાજો પર હુમલાઓને કારણે તેલ અને ગેસના ભાવમાં વધારો થયો છે. ઈરાની અધિકારી ઇબ્રાહિમ જબ્બારીએ કહ્યું કે હોર્મુઝ સ્ટ્રેટ બંધ છે અને ત્યાંથી પસાર થતા જહાજોને આગ લગાવી દેવામાં આવશે. સંઘર્ષ હવે લેબનોનમાં ફેલાઈ ગયો છે. ઇઝરાયલે દક્ષિણ લેબનોનમાં વધારાના સૈનિકો મોકલ્યા અને બેરૂતમાં હવાઈ હુમલા કર્યા. લેબનીઝ સેનાએ કેટલીક સરહદી ચોકીઓ ખાલી કરાવી છે જ્યારે હિઝબુલ્લાહે કહ્યું છે કે તેની પાસે લડવા સિવાય કોઈ વિકલ્પ નથી.
ટોપ સ્ટોરી
ટ્રેન્ડિંગ સમાચાર
