ઓસ્ટ્રેલિયામાં અભ્યાસ માટે જતા ભારતીય વિદ્યાર્થીઓની સંખ્યામાં ઘટાડો, જાણો કારણ ?

ભારતીયોને ઓસ્ટ્રેલિયામાં અભ્યાસ માટે વિઝા મળી રહ્યા નથી. ઓસ્ટ્રેલિયામાં લાગુ કરવામાં આવેલી નવી ઈમિગ્રેશન પોલિસીના કારણે ભારતીય વિદ્યાર્થીઓની સંખ્યામાં ઘટાડો થઈ રહ્યો છે.

ફોટોઃ abp live

ભારતીયોને ઓસ્ટ્રેલિયામાં અભ્યાસ માટે વિઝા મળી રહ્યા નથી. ઓસ્ટ્રેલિયામાં લાગુ કરવામાં આવેલી નવી ઈમિગ્રેશન પોલિસીના કારણે ભારતીય વિદ્યાર્થીઓની સંખ્યામાં ઘટાડો થઈ રહ્યો છે.

આંતરરાષ્ટ્રીય શિક્ષણના ક્ષેત્રમાં ઓસ્ટ્રેલિયા એવા કેટલાક દેશોમાં સામેલ છે જે ભારતીય વિદ્યાર્થીઓને આકર્ષી રહ્યા છે. જો કે, ચાલુ વર્ષના પ્રથમ ચાર મહિના કંઈક અલગ જ જોવા મળી રહ્યું છે. ઓસ્ટ્રેલિયામાં અભ્યાસ કરવા જતા વિદ્યાર્થીઓની સંખ્યામાં 30 ટકાનો ઘટાડો થયો છે.

આનું કારણ ઓસ્ટ્રેલિયાની નવી ઇમિગ્રેશન પોલિસી છે જે ગયા વર્ષે ડિસેમ્બરમાં લાગુ કરવામાં આવી હતી. આ નીતિમાં વિદેશી વિદ્યાર્થીઓની સંખ્યા અને તેમના વિસ્તરણને લઈને ઘણા નિયંત્રણો લાદવામાં આવ્યા છે.

નવી ઈમિગ્રેશન પોલિસીના અમલ પહેલા ગયા વર્ષે જાન્યુઆરીથી એપ્રિલ સુધીમાં ઓસ્ટ્રેલિયાએ 104,808 ભારતીય વિદ્યાર્થીઓને સ્ટડી વિઝા આપ્યા હતા, જ્યારે આ વખતે આ આંકડો માત્ર 74,421 છે. અગાઉ ભારતીય વિદ્યાર્થીઓની સંખ્યામાં આટલો ઘટાડો કોરોના મહામારી દરમિયાન જોવા મળ્યો હતો. 2019-20 અને 2020-21 દરમિયાન આ ઘટાડો 53 ટકાની નજીક હતો.

સ્ટુડન્ટ્સ વિઝા ન મળવાને કારણે ભારતીય વિદ્યાર્થીઓમાં નિરાશા ચોક્કસપણે છે, પરંતુ તેની નકારાત્મક અસર ઓસ્ટ્રેલિયાના અર્થતંત્ર પર પણ જોવા મળી શકે છે. ઓસ્ટ્રેલિયામાં શિક્ષણ ક્ષેત્ર સાથે સંકળાયેલા ઘણા દિગ્ગજો સરકારને તેના નિર્ણય પર પુનર્વિચાર કરવાની સલાહ આપી રહ્યા છે. નિષ્ણાતોનું કહેવું છે કે ઓસ્ટ્રેલિયાની અર્થવ્યવસ્થામાં શિક્ષણ ક્ષેત્રનો મોટો ફાળો છે.

ગયા વર્ષે ઓસ્ટ્રેલિયાએ શિક્ષણ ક્ષેત્રથી 48 બિલિયન ડોલરની કમાણી કરી હતી. નિષ્ણાતો કહે છે કે ઘણા વર્ષોની મહેનત બાદ ઓસ્ટ્રેલિયાએ ગુણવત્તાયુક્ત શિક્ષણ અને કૌશલ્ય પ્રશિક્ષણના ક્ષેત્રમાં પોતાનું આગવું સ્થાન હાંસલ કર્યું છે. સરકારની ખોટી નીતિઓને કારણે આ મહેનત વ્યર્થ જઈ શકે છે.