₹25,000 સુધી પગાર મેળવતા કર્મચારીઓ માટે મોટા સમાચાર: PF ના નિયમોમાં થશે મોટો ફેરફાર

સરકારે ફરજિયાત PF કવરેજ માટેની માસિક પગાર મર્યાદા ₹15,000 થી વધારીને ₹25,000 કરવાની સૈદ્ધાંતિક મંજૂરી આપી દીધી છે, કેબિનેટની મંજૂરી બાદ નવો નિયમ અમલમાં આવશે.

જો તમે નોકરી કરો છો અને તમારો પગાર ₹25,000 સુધી છે, તો તમારા માટે એક બહુ જ મોટા અને સારા સમાચાર છે. છેલ્લા 10 વર્ષથી PF કવરેજ માટેની પગાર મર્યાદા જે ₹15,000 પર અટકેલી હતી, તેમાં હવે મોટો વધારો થવા જઈ રહ્યો છે. મીડિયા રિપોર્ટ્સ અને મની કંટ્રોલની માહિતી અનુસાર, નાણા મંત્રાલયે કર્મચારીઓ માટે ફરજિયાત PF (પ્રોવિડન્ટ ફંડ) કવરેજની માસિક પગાર મર્યાદા ₹15,000 થી વધારીને સીધી ₹25,000 કરવાની મંજૂરી આપી દીધી છે.

આ નવા નિયમના અમલ સાથે, હવે દર મહિને ₹25,000 સુધીની કમાણી કરનારા લાખો નવા કર્મચારીઓ આપમેળે જ PF અને પેન્શન યોજનાઓના સુરક્ષા કવચ હેઠળ આવી જશે. જોકે, આ ફેરફારને કેબિનેટની અંતિમ મંજૂરી મળ્યા પછી જ લાગુ કરવામાં આવશે, અને સરકાર દ્વારા હજુ સુધી તેના અમલીકરણની કોઈ સત્તાવાર તારીખ જાહેર કરવામાં આવી નથી.

નવા નિયમની સીધી અસર કર્મચારીઓ, કંપનીઓ અને સરકાર એમ ત્રણેય પર પડશે. મર્યાદામાં આ વધારાનો સીધો અર્થ એ છે કે હવે કંપનીઓ અને સરકારે વધુ કર્મચારીઓ માટે યોગદાન (કોન્ટ્રિબ્યુશન) આપવું પડશે, જેનાથી તેમના એકંદર નાણાકીય ખર્ચમાં વધારો થશે. મની કંટ્રોલના રિપોર્ટ મુજબ, એક અધિકારીએ જણાવ્યું હતું કે અગાઉ સરકારે EPF પગાર મર્યાદા ₹15,000 થી વધારીને ₹30,000 પ્રતિ માસ કરવાનો વિચાર કર્યો હતો. પરંતુ લાંબી ચર્ચા અને સમીક્ષા પછી, નાણા મંત્રાલયે દર મહિને ₹25,000 ની નવી મર્યાદાને જ યોગ્ય માનીને મંજૂરી આપી હતી. આ દરખાસ્ત હવે અંતિમ મહોર માટે કેબિનેટને મોકલવામાં આવશે.

હાલના નિયમ મુજબ, જે કર્મચારીઓનો મૂળ પગાર (Basic Salary) માત્ર ₹15,000 પ્રતિ માસ સુધી છે, તેમને જ ફરજિયાતપણે કર્મચારી ભવિષ્ય નિધિ (EPF) અને કર્મચારી પેન્શન યોજના (EPS) હેઠળ આવરી લેવામાં આવે છે. જો કોઈ કર્મચારી ₹15,000 થી વધુ કમાણી કરતો હોય, તો તેને આ યોજનાઓમાં સામેલ થવું કે નહીં તેનો વિકલ્પ મળે છે, અને નોકરીદાતાઓ (કંપનીઓ) માટે પણ તેમને ફરજિયાત નોંધણી કરાવવાની કોઈ કાયદાકીય જરૂરિયાત રહેતી નથી.

પરંતુ જો પગાર મર્યાદા ₹25,000 સુધી વધારવામાં આવશે, તો જે કર્મચારીઓનો પગાર ₹15,000 થી ₹25,000 ની વચ્ચે છે, તેઓ પણ ફરજિયાતપણે આ યોજનાઓ હેઠળ આવરી લેવાશે. આનાથી ખાનગી ક્ષેત્રમાં નોકરી કરતા ઘણા વધુ લોકો સરકારની PF અને પેન્શન યોજનાઓના સુરક્ષિત દાયરામાં આવશે. સામે પક્ષે, નોકરીદાતાઓ (કંપનીઓ) માટે આનો અર્થ એ થશે કે તેમણે વધુ કર્મચારીઓ માટે PF અને પેન્શનમાં પોતાનો હિસ્સો આપવો પડશે, જેના પરિણામે કંપનીઓના પગાર પાછળના ખર્ચમાં વધારો થશે.

આ પગાર મર્યાદા વધારવાથી માત્ર કંપનીઓ જ નહીં, પરંતુ સરકારના ખર્ચમાં પણ નોંધપાત્ર વધારો થવાની ધારણા છે. કર્મચારી પેન્શન યોજના (EPS) ના નિયમ મુજબ, નોકરીદાતા કર્મચારીના મૂળ પગારના 8.33% ફાળો આપે છે, જ્યારે સરકાર મૂળ પગારના 1.16% ફાળો આપે છે. નવા કર્મચારીઓ ઉમેરાતા સરકારનો આ ફાળો વધશે. નોંધનીય છે કે વર્ષ 2026-27 માટે સરકારે પહેલેથી જ કર્મચારી પેન્શન યોજના માટે ₹11,144 કરોડની મોટી રકમ ફાળવી છે.

હાલમાં, EPF અને EPS ના નિયમો માત્ર એવી જ કંપનીઓ માટે ફરજિયાત છે જ્યાં 20 કે તેથી વધુ કર્મચારીઓ કામ કરતા હોય. નાની કંપનીઓ સ્વેચ્છાએ આ યોજનાઓમાંથી બહાર રહી શકે છે. આ નવી પગાર મર્યાદા મુખ્યત્વે સંગઠિત ખાનગી ક્ષેત્રના કર્મચારીઓને જ અસર કરશે, કારણ કે કેન્દ્ર સરકારના કર્મચારીઓ માટે પહેલેથી જ એક અલગ પેન્શન સિસ્ટમ છે.

એક અધિકારીના જણાવ્યા અનુસાર, ભલે કેબિનેટ દ્વારા આ પ્રસ્તાવને મંજૂરી મળી જાય, તેમ છતાં આ નવી પગાર મર્યાદા રાતોરાત કે તાત્કાલિક લાગુ થવાની કોઈ શક્યતા નથી. સરકાર કંપનીઓને તેમની વર્તમાન પગાર પ્રણાલી (પે-રોલ સિસ્ટમ), પાલન પ્રક્રિયાઓ (કમ્પ્લાયન્સ) અને અન્ય કાર્ય-સંબંધિત સિસ્ટમોને અપડેટ કરવા માટે થોડો વધારાનો સમય ચોક્કસથી આપશે. આનો અર્થ એ છે કે નવી ₹25,000 EPF પગાર મર્યાદા સત્તાવાર રીતે અમલમાં આવે તે પહેલાં એક 'ટ્રાન્ઝિશન પીરિયડ' (સંક્રમણ સમયગાળો) રાખવામાં આવશે.