ચાંદીમાં ₹4,500 નો મોટો ઘટાડો, સોનું 11 અઠવાડિયાના સૌથી નીચલા સ્તરે, જાણો આજનો નવો ભાવ

વૈશ્વિક મંદી અને આંતરરાષ્ટ્રીય પરિબળોની અસરને પગલે સ્થાનિક બજારમાં સોના-ચાંદીના ભાવમાં ઐતિહાસિક ઘટાડો, સોનું 11-સપ્તાહના તળિયે.

બુધવારે સોના અને ચાંદી ખરીદવા માંગતા લોકો માટે મોટા સારા સમાચાર આવ્યા છે. વૈશ્વિક બજારમાં જોવા મળેલી ભારે મંદીની સીધી અસર ભારતીય બુલિયન માર્કેટ પર પડી છે, જેના કારણે કિંમતી ધાતુઓના ભાવમાં મસમોટો ઘટાડો નોંધાયો છે.

મલ્ટી કોમોડિટી એક્સચેન્જ (MCX) પર આજે ચાંદીના ભાવમાં ₹4,500 થી વધુનો ઐતિહાસિક કડાકો બોલી ગયો છે, જ્યારે સોનાના ભાવ પણ ₹2,500 કરતાં વધુ ગગડ્યા છે. આ ઘટાડા પાછળ આંતરરાષ્ટ્રીય સ્તરે અમેરિકા અને ઈરાન વચ્ચેનો તણાવ અને મજબૂત થઈ રહેલો ડોલર મુખ્ય કારણ માનવામાં આવી રહ્યા છે.

આજે સવારે કોમોડિટી બજાર ખુલતાની સાથે જ બંને ધાતુઓ ભારે દબાણ હેઠળ જોવા મળી હતી. MCX પર ઓગસ્ટ વાયદા માટે સોનાના ભાવ પ્રતિ 10 ગ્રામ ₹1,49,926 ના સ્તરે ખુલ્યા હતા. અગાઉના બંધ ભાવ ₹1,52,443 ની સરખામણીમાં આ આશરે ₹2,517 (1.65%) નો મોટો ઘટાડો દર્શાવે છે.

બીજી બાજુ, ચાંદીના ખરીદદારો માટે આજનો દિવસ વધુ રાહત લઈને આવ્યો છે. જુલાઈ વાયદા માટે ચાંદીના ભાવ પ્રતિ કિલો ₹4,519 (લગભગ 1.89%) તૂટીને ₹2,34,009 પર ખુલ્યા હતા, જે અગાઉના સત્રમાં ₹2,38,528 પર બંધ થયા હતા.

આંતરરાષ્ટ્રીય બજારની વાત કરીએ તો, સોનાના ભાવ 11 સપ્તાહના સૌથી નીચલા સ્તરે પહોંચી ગયા છે. અમેરિકા અને ઈરાન વચ્ચે ફરી શરૂ થયેલા તણાવને કારણે ક્રૂડ ઓઈલ મોંઘુ થયું છે, જેથી વૈશ્વિક ફુગાવો વધવાની ચિંતા ઊભી થઈ છે. આ પરિસ્થિતિમાં કેન્દ્રીય બેંકો લાંબા સમય સુધી વ્યાજદર ઊંચા રાખશે તેવી શક્યતાઓ પ્રબળ બની છે.

આંતરરાષ્ટ્રીય માર્કેટમાં હાજર સોનાનો ભાવ 1.8% ઘટીને $4,187.59 પ્રતિ ઔંસ થઈ ગયો છે, જે 23 માર્ચ પછીનું સૌથી નીચું સ્તર છે. યુએસ ગોલ્ડ ફ્યુચર્સ પણ 1.7% ઘટીને $4,213.40 પર પહોંચ્યું છે. સોનાની સાથે હાજર ચાંદી પણ 1.5% ઘટીને $64.43 પ્રતિ ઔંસ થઈ છે. ડોલર વધુ મજબૂત થતાં અન્ય ચલણો ધરાવતા લોકો માટે ડોલરમાં ખરીદાતું સોનું મોંઘું બન્યું છે, જેના પરિણામે સ્થાનિક સ્તરે સોના અને ચાંદીના ભાવમાં સતત ઘટાડો જોવા મળી રહ્યો છે.