પારડી નગરપાલિકાની પ્રથમ સામાન્ય સભા તોફાની બની: વિરોધ પક્ષના નેતાએ રાષ્ટ્રગીત દરમિયાન ટેબલ પર ચડી નાસ્તાની ડિસો ફેંકી

વલસાડ જિલ્લાની પારડી નગરપાલિકામાં ચૂંટણી બાદ મળેલી પ્રથમ સામાન્ય સભા ભારે તોફાની બની હતી.

સભા દરમિયાન પોતાના સવાલોના યોગ્ય જવાબ ન મળતા વિરોધ પક્ષના નેતા રોષે ભરાયા હતા અને મામલો એટલો વણસ્યો કે સામાન્ય સભા પૂર્ણ થયા બાદ રાષ્ટ્રગીત દરમિયાન પણ હંગામો મચાવ્યો હતો.

પ્રાપ્ત માહિતી અનુસાર, પારડી નગરપાલિકાની ચૂંટણી બાદ પ્રથમ વખત સામાન્ય સભા મળી હતી. આ સભામાં એજન્ડાના કામો ઉપરાંત પ્રમુખ સ્થાનેથી રજૂ થતા અન્ય કામો અંગે પણ ચર્ચા થવાની હતી.

જોકે, સામાન્ય સભામાં વિરોધ પક્ષના નેતા બીપીન પટેલે અગાઉની સભાઓમાં રજૂ થયેલા કામો અંગે સત્તાધીશોને સવાલ કરતાં માહોલ ગરમાયો હતો. વિરોધ પક્ષ દ્વારા પોતાની વાત ન સાંભળતા હોવાના આક્ષેપ સાથે ઉગ્ર રજૂઆત કરવામાં આવી હતી.