Mumbai Rains: મુંબઈ-પુણેમાં વરસાદથી હાહાકાર! IMDનું રેડ એલર્ટ, અડધુ શહેર ડૂબ્યું, લોકોને બચાવવા સેના બોલાવવી પડી

Mumbai Rains: મહારાષ્ટ્રમાં ગયા અઠવાડિયે સક્રિય થયેલા ચોમાસાને કારણે રાજ્યના ઘણા વિસ્તારોમાં ભારે વરસાદ થઈ રહ્યો છે. મુંબઈ અને પૂણે વરસાદમાં લગભગ અડધા ડૂબી ગયા છે.

હવામાન વિભાગે કહ્યું કે મુંબઈના લોકોને થોડા દિવસો સુધી ભારે વરસાદથી રાહત નહીં મળે. IMDએ પણ આ અંગે રેડ એલર્ટ જાહેર કર્યું છે. આ પછી બૃહન્મુંબઈ મ્યુનિસિપલ કોર્પોરેશન (BMC) એ ગુરુવારે શહેરની તમામ શાળાઓ અને કોલેજોમાં રજા જાહેર કરી છે.

હવામાન વિભાગની ચેતવણી બાદ BMCએ પણ વાલીઓને જરૂરી સાવચેતી રાખવા વિનંતી કરી છે. ગુરુવારે સવારે 4 થી 1 વાગ્યાની વચ્ચે મુંબઈના ઘણા વિસ્તારોમાં 100 મીમીથી વધુ વરસાદ થયો હતો.

IMDએ જણાવ્યું કે આ સમયગાળા દરમિયાન સૌથી વધુ 157 મીમી વરસાદ અંધેરીના માલપા ડોંગરી વિસ્તારમાં નોંધાયો હતો, ત્યારબાદ પવઈના પાસપોલીમાં 155 મીમી અને દિંડોશીમાં 154 મીમી વરસાદ નોંધાયો હતો. જેના કારણે શહેરના અનેક રેલવે ટ્રેક પર પણ પાણી ભરાયા છે.