દક્ષિણ આફ્રિકાનો આ ક્રિકેટર પાકિસ્તાન તરફથી રમવા માંગતો હતો. તક ના મળી એ અંગે વ્યક્ત કરી નિરાશા, જાણો વિગત

પાકિસ્તાન છોડવું મુશ્કેલ હતું પરંતુ ઈશ્વરની કૃપા મારા પર બની રહી અને દક્ષિણ આફ્રિકા તરફથી આંતરરાષ્ટ્રીય ક્રિકેટ રમી શક્યો.

કેપટાઉનઃ લાંબા સમયથી દક્ષિણ આફ્રિકા ક્રિકેટ ટીમમાં સ્પિનર તરીકે મહત્વનું યોગદાન આપનારા લેગ સ્પિનર ઈમરાન તાહિરનો જન્મ પાકિસ્તાનના લાહોરમાં થયો હતો. તે પ્રારંભિક ક્રિકેટ પાકિસ્તાન તરફથી રમ્યો હતો પરંતુ 2006માં દક્ષિણ આફ્રિકા જતો રહ્યો હતો. દક્ષિણ આફ્રિકાની રાષ્ટ્રીય ટીમ ઉપરાંત વિશ્વભરની અનેક ટી-20 લીગમાં પણ તે રમ્યો છે. તાહિરે દક્ષિણ આફ્રિકા તરફથી 2011ના વર્લ્ડકપમાં ડેબ્યૂ કર્યુ હતું. ઈમરાન તાહિરે જિયો સુપરને જણાવ્યું, હું લાહોરમાં ક્રિકેટ રમતો હતો. આજે જે કંઈ છું તેના કારણે જ છું. હું પ્રારંભિક ક્રિકેટ ત્યાં રમ્યો હતો, પરંતુ મોકો નહોતો મળ્યો. જેનો મને વસવસો છે. તેણે કહ્યું, પાકિસ્તાન છોડવું મુશ્કેલ હતું પરંતુ ઈશ્વરની કૃપા મારા પર બની રહી અને દક્ષિણ આફ્રિકા તરફથી આંતરરાષ્ટ્રીય ક્રિકેટ રમી શક્યો.  2011 વર્લ્ડકપ ઉપરાંત તાહિરે દક્ષિણ આફ્રિકા તરફથી 2015નો વર્લ્ડકપ, 2014 અને 2016નો ટી-20 વર્લ્ડકપ રમ્યો છે. તેણે ગત વર્ષે આઈસીસી વર્લ્ડકપ બાદ વન ડે ક્રિકેટમાંથી નિવૃત્તિ જાહેર કરી હતી. દક્ષિણ આફ્રિકા જતા પહેલા 41 વર્ષીય તાહિર પાકિસ્તાન અંડર-19 અને પાકિસ્તાન એ ટીમ તરફથી રમ્યો હતો. તેણે કહ્યું, મારી પત્નીના કહેવા પર દક્ષિણ આફ્રિકા ગયો. દેશમાં ચાર વર્ષ રહ્યા બાદ કાનૂનનું પાલન કર્યું, જે બાદ દક્ષિણ આફ્રિકા તરફથી રમવા લાયક બન્યો.

ઈમરાન તાહિરે દક્ષિણ આફ્રિકા તરફથી 20 ટેસ્ટમાં 57 વિકેટ, 107 વન ડેમાં 173 વિકેટ અને 38 ટી-20માં 63 વિકેટ ઝડપી છે.